NDƐ NG’Ɔ KLƐ FLUWA’N SU’N | ?A BU I KƐ ƝANMIƐN BU WƆ AKUNNDAN?

Ɲanmiɛn si wafa nga a ti’n

“Anannganman, a si min klun lɔ akunndan’n, a si min wafa bɔ n ti’n.”​—JUE MUN 139:1.

LIKE NGA TI YƐ SRAN WIE’M BE LAFIMAN SU SƆ’N: Sran sunman be waan Ɲanmiɛn bu sran mun sa tɛ yofuɛ mun ngunmin, naan i ndɛ nunman be ndɛ nun. I sɔ akunndan yɛ bla kun mɔ be flɛ i kɛ Kɛndra, ɔ buli ɔ. Kɛ m’ɔ kwlá nantiman Ɲanmiɛn nuan ndɛ’n i su kpa’n ti’n, i wla boli i wun dan. I sɔ’n ti, ɔ seli kɛ: “N yacili Ɲanmiɛn srɛlɛ.”

LIKE NGA ƝANMIƐN NDƐ’N KLE’N: Nán ɔ fɔnlɛ’n i ngunmin yɛ Zoova wun i ɔ. Sanngɛ, ɔ wun wafa nga a ti’n i wlɛ wie. Ɲanmiɛn Ndɛ’n waan: “Fɔnlɛ nga e fɔn’n, nán i nuan like yɛ ɔ fa yi e su ɔ. Afin ɔ si like ng’ɔ fa yili ye’n. [...] Ɔ si kɛ fa yɛ ɔ fa yili ye ɔ.” Ɔ maan kɛ e kaci e nzuɛn’n, Ɲanmiɛn yaci sa tɛ nga e yo’n cɛ e.​—Jue Mun 103:10, 14.

Maan e kan Davidi m’ɔ yoli Izraɛli famiɛn’n, i ndɛ ekun e nian. Kɛ cɛn kun ɔ́ srɛ́ Ɲanmiɛn’n, ɔ seli kɛ: “I nun bɔ n tɛ yo mmoja bɔbɔ’n, ɔ nyin ta min. Asiɛ’n su cɛn ba nga n ko di’n, a dun mmua klɛli i ngba guɛli i ɔ fluwa’n nun [...]. Ee Nyanmiɛn, nian min anwlɛn nun!” (Jue Mun 139:16, 23) Davidi si kɛ ɔ ti sa tɛ yofuɛ. Blɛ wie nun bɔbɔ’n, ɔ yoli sa tɛ dan. Sanngɛ, ɔ lafili su kpa kɛ Zoova niɛn i awlɛn nun lɔ, naan ɔ si kɛ i sa tɛ’n yoli i nsisɔ.

Sran fi siman wɔ kɛ Zoova fa si wɔ’n sa. Afin Zoova bɔbɔ se kɛ: “Sran’m be nian nga be nyinma wun i’n, sanngɛ min liɛ’n, n nian lele ju anwlɛn’n i bo lɔ.” (1 Samiɛl 16:7) Ɲanmiɛn wun like nga ti yɛ e yo sa wie mun’n, i wlɛ kpa. Ɔ wun i wlɛ kɛ wie liɛ’n, e nin i sɔ’n fin e nin klun. Wie liɛ kusu’n, ɔ fin wafa nga be tali e’n annzɛ lika nga e trannin lɛ’n. Wie liɛ ekun’n, e bɔbɔ yɛ e fɛli i sɔ nzuɛn’n niɔn. Ɔ maan kannzɛ e fɔn’n, Ɲanmiɛn wun e ɲin mɔ e mian naan é yó sa kpa’n, yɛ ɔ bu i like dan.

Ɲanmiɛn si wafa nga a ti’n. Ɔ maan, i yɛ ɔ kwla cici ɔ wla kpa ɔ. ?Ngue yɛ ɔ yo fa cici ɔ wla ɔ?