Nanwlɛ’n ti’n amún ɲán amun ti
ATO ndɛ nga e boli be su’n, kɔlɛ amun a ti be nun kun le. Annzɛ i sɔ ndɛ yɛ be fa kleli amun ɔn. Sanngɛ atrɛkpa’n, ɔ ti kekle kɛ amun yaci su falɛ. Afin amun lafi su w’a cɛ.
Sɛ amun sisi amun bo sɔ’n, e wun i wlɛ. Afin asɔnun wie’m be nun’n, be kɛn i kɛ ɔ fataman kɛ be fa ndɛ nga be kɛn i lɔ’n, be sunnzun nga Biblu’n kan’n. Asɔnun wie’m be nun kusu’n, kɛ ɔ ko yo naan sran’m b’a lafi ndɛ nga be kan’n su’n, be se be fuɛ’m be kɛ Biblu’n i nun ndɛ’n i wlɛ wunlɛ’n ti kekle. I ti’n, nán sran ngba yɛ ɔ kwla wun i wlɛ ɔ. Kusu nn be nga be yoli Zezi i sɔnnzɔnfuɛ’n, be sunman be timan sran dan yɛ b’a diman suklu dandan. Sanngɛ ndɛ nga Zezi kannin’n, i wlɛ wunlɛ’n yoli pɔpɔ mannin be.—Sa Nga Be Yoli’n 4:13.
Wie liɛ kusu amun kloman kɛ amún bú ndɛ nga amun lafi su’n i akunndan nían naan sɛ ɔ ti nanwlɛ o. Afin amun bu i kɛ sɛ amun yo i sɔ’n, ɔ kle kɛ amun lafiman Ɲanmiɛn su. Sanngɛ yoo: ?Sɛ amun suan Biblu’n mɔ i yɛle ndɛ nga Ɲanmiɛn waan klɔ sran’m be si i’n i nun like naan amun a wun like nga i waan amun yo’n i wlɛ’n, Ɲanmiɛn kwla fa amun wun ya? Cɛcɛ. I li bɔbɔ’n i Ndɛ’n wla amun fanngan kɛ amun bɔbɔ amun suan Biblu’n nun like. Ɔ se kɛ: ‘[Maan] amun wun Nyanmiɛn i klun sa’n i wlɛ, yɛ [maan] amun si sa ng’ɔ ti kpa, b’ɔ jɔ i klun, bɔ maan amún yó kpa’n.’—Rɔmfuɛ Mun 12:2.
Ɲanmiɛn i su ndɛ nanwlɛ’n i suanlɛ’n timan like suanlɛ sa ngbɛn. Ɔ kwla yo maan amun nanti ye. (Zan 8:32) Diani mɔ e kɛnnin i ndɛ, ndɛ akpasua klikli nun’n, siɛn’n i Ɲanmiɛn sulafilɛ’n taka Ɲanmiɛn Ndɛ’n su. I waan: “Kɛ m boli Biblu’n nun like suanlɛ bo’n yɛ n wunnin i kɛ i nun ndɛ’n ti weinwein ɔn. Siɛn’n, m bumɛn i kɛ Zoova ti Ɲanmiɛn kun mɔ klɔ sran’m be ndɛ lomɛn i ɔ. Sanngɛ ɔ ti min Si kpa m’ɔ o ɲanmiɛn su lɔ. Asa’n, n si like nga ti yɛ n wo mɛn nun’n.”
Kɔlɛ’n, amun suannin Biblu’n nun like laa, sanngɛ ɔ yoli amun kɛ amun a ɲanman i su ye sa. Sɛ ɔ ti sɔ’n, nán amun sa sin bubu amun. Sɛ be buali Ɲanmiɛn i su ato be kleli amun laa’n, Biblu’n nun like suanlɛ’n kwla yo kekle man amun. Ɔ ti kɛ amun waan amún kɔ́ lika kun mɔ amun siman lɔ’n sa. Kpɛkun bé klé amun atin ɔn b’a kleman amun kpa. Sɛ amun fa atin’n su kpɛ nɲɔn kun naan amun mlin’n, amun sa sin kwla bubu amun. Sɛ amun waan amún jú lɔ’n, ɔ fata kɛ be kle amun atin kpafuɛ’n naan amun fa su.
?Amun kunndɛman kɛ amún sí Ɲanmiɛn i su ndɛ nanwlɛ’n? É wlá amun fanngan kɛ amun ko wun Zoova i Lalofuɛ’m be wun. Annzɛ amun klɛ be fluwa naan be to amun awlo lɔ be kle amun Biblu’n nun like. Amun su tuaman i ti kalɛ. Sɛ amun klɛ fluwa’n amun fa adrɛsi nga be o fluwa nga i bue 4 su’n be nun kun sie su.
[Ndɛ kwle, bue 9]
‘[Maan] amun wun Nyanmiɛn i klun sa’n i wlɛ, yɛ [maan] amun si sa ng’ɔ ti kpa, b’ɔ jɔ i klun, bɔ maan amún yó kpa’n.’—RƆMFUƐ MUN 12:2