Ndɛ nanwlɛ’n ti á ɲán ɔ ti

Cɛn kun mɔ Zezi o Zerizalɛmu lɔ’n, ɔ kɛnnin i Si Zoova i ndɛ. Kpɛkun, ɔ yiyili ato mɔ Zuifu’m be Ɲanmiɛn sulɛ wafa’m be su kpɛnngbɛn’m be bua’n i bo. (Zan 8:12-30) Ndɛ ng’ɔ kɛnnin i cɛn sɔ’n nun’n, ɔ kwla uka e kpa. Yɛle kɛ ɔ uka e naan e nian Ɲanmiɛn i su ndɛ nga be kan’n, sɛ ti nanwlɛ annzɛ ɔ timan nanwlɛ o. Ɔ seli kɛ: “Sɛ an fa min ndɛ nga n kan’n su sakpa, wuun an ti n sɔnnzɔnfuɛ sakpa, wuun amún sí ndɛ ng’ɔ ti nanwlɛ’n, yɛ ndɛ nanwlɛ sɔ’n ti amún nyán amun ti.”​—Zan 8:31, 32.

Zezi seli kɛ: “An fa min ndɛ nga n kan’n su.” Ndɛ sɔ m’ɔ kannin’n kle e like ng’ɔ fata kɛ e yo’n. Yɛle kɛ maan e nian sɛ ndɛ nga Ɲanmiɛn sulɛ wafa’m be kan’n, ɔ ti ‘ndɛ nanwlɛ’ o. I sɔ’n ti’n, sɛ e ti Ɲanmiɛn i su ndɛ wie’n, maan e fa kosan nga mun e usa e wun: ‘?Ndɛ nga m’an ti i yɛ’n, ɔ nin ndɛ nga Zezi kannin be’n, be ti kun? ?Yɛ ɔ nin Ɲanmiɛn ndɛ wunmuan’n be kɔ likawlɛ?’ Kɛ sran wie’m be tili akoto Pɔlu’n i ndɛ’n, like nga be yoli’n, nian su yo. “Cɛn kwlaa be fa Nyanmiɛn ndɛ nga be klɛli’n nin ndɛ nga Pɔl kan kle be’n, be sunnzun nian sɛ ɔ ti kun o.”​—Sa Nga Be Yoli’n 17:11.

Fluwa nga i nun ndɛ klikli nun’n, e kannin Marko nin Roza nin Rɛmɔndu be ndɛ. Be boli be ɲin ase kpa be fali Ɲanmiɛn i su ndɛ nga be tili’n sunnzunnin nga Zoova i Lalofuɛ’m be kleli be niannin. ?Kɛ be yoli sɔ’n, i bo guali sɛ?

Marko: “E Biblu’n nun like klefuɛ’n, ɔ fali Ɲanmiɛn Ndɛ’n tɛli kosan kwlaa nga min nin min yi e usali’n be su. Ɔ maan blɛblɛblɛ e wa kloli Zoova, yɛ min nin min yi e afiɛn wa sɛli kpa trali laa’n.”

Roza: “M buli i kɛ Ɲanmiɛn i su akunndan nga sran’m be bu’n yɛ ɔ o Biblu’n nun ɔn. Sanngɛ kɛ ɔ́ kɔ́ i ɲrun’n, n wa wunnin kɛ Biblu’n tɛ min kosan kwlaa su. Siɛn’n, n si kɛ Zoova o lɛ, yɛ n kwla lafi i su.”

Rɛmɔndu: “N srɛli Ɲanmiɛn kɛ ɔ uka min naan n si i. Kɛ n yoli sɔ’n, w’a cɛman. Be wa boli min nin min wun e Biblu’n nun like klelɛ bo. Ɔ maan, e wa sili Zoova i su ndɛ nanwlɛ’n. Kɛ e sili Ɲanmiɛn i sran wafa ng’ɔ ti’n, i sɔ’n yoli e fɛ dan.”

Ɲanmiɛn i su ndɛ nga sran’m be kan m’ɔ ti ato’n, Biblu’n ti e kwla si i. Sanngɛ nɛ́n i ngba ɔ. Biblu’n kan Ɲanmiɛn i nzuɛn m’ɔ yo ɲɛnmɛn’n i ndɛ wie. Biblu’n ti Ɲanmiɛn nuan ndɛ mɔ be klɛli ɔ. Ɔ uka e naan “e si like kwlaa nga Nyanmiɛn mannin ye i klun-ufue’n ti’n.” (1 Korɛntfuɛ Mun 2:12) I sɔ’n ti’n, suan Biblu’n nun like naan nian. Á wún kɛ Ɲanmiɛn i su kosan, ɔ nin ninnge nga i waan ɔ́ yó be’n, ɔ nin e ɲrun lɔ sa’m be su kosan kwlaa nga sran’m be usa’n, Biblu’n tɛ be su. Kosan sɔ’m be nun wie’m be su tɛlɛ’n o ɛntɛnɛti su. Nian lika nga be flɛ i www.jw.org/bci nun. Kpɛkun, klɛklɛ lika nga be klɛli i lɛ kɛ “amun kunndɛ Biblu’n nun like suanlɛ” i nun. Sɛ kusu a wun Zoova i Lalofuɛ kun’n, se i naan ɔ kle wɔ Biblu’n nun like. Sɛ a yo sɔ’n, á wún kɛ Ɲanmiɛn i klolɛ timan kekle. Yɛ á wá kló i kpa.