Mɛn’n i awieliɛ’n i su nanwlɛ’n

‘Be ti asiɛ usu. Be kɔ asiɛ’n su famiɛn’m be kwlaa be sin. Be yiali famiɛn mun lika nga Ebre nun be flɛ i Armagedɔn’n nun lɔ.’​—SA NGLO YILƐ 16:14, 16.

ARMAGEDƆN ti lika kun i dunman. Sanngɛ sran fi kwlá seman kɛ asiɛ’n i bue nga sa yɛ be flɛli i sɔ ɔ.

?Ndɛ mma “Armagedɔn” kpa’n i bo’n yɛle benin? ?Kɛ blɛ sunman’n bé kán sa kɛ alɛ sa m’ɔ tɔ’n i ndɛ’n, ngue ti yɛ be flɛ i kɛ Armagedɔn’n niɔn?

Be yiali lika nga be flɛ i Armagedɔn’n i nun lɔ

Ebre nun ndɛ mma nga be kaci i kɛ Armagedɔn’n i bo’n yɛle “Megido oka.” Kannzɛ b’a flɛman oka kun sɔ’n, sanngɛ be flɛli lika kun Megido. Lika sɔ’n ti lika cinnjin kpa, afin ɔ ti atin cinnjin kpa nɲɔn be aɲialiɛ. Ɔ o kɛ Izraɛlifuɛ’m be trannin lɔ laa’n i nglo lɔ lika’n wia atɔliɛ bue liɛ’n su. Be kunnin alɛ kpanngban kpa lika sɔ’n i wun lɛ. Ɔ maan kɛ be bo Megido dunman’n, sran’m be bu alɛa akunndan.

Sanngɛ, kɛ be kan Megido i ndɛ’n, nán alɛ fanunfanun nga be kunnin be lɔ’n i ti ɔ, sanngɛ like nga ti yɛ be kunnin alɛ sɔ mun’n yɛ ɔ ti cinnjin ɔn. Megido’n wo lika nga Zoova fa mannin Izraɛlifuɛ mun’n i nun wie. (Ezipt Lɔ Tulɛ 33:1; Zozie 12:7, 21) Ɔ seli be kɛ sɛ be kpɔfuɛ’m be fa alɛ wla be sin’n, ɔ́ kplí be ti. Yɛ kusu ɔ yoli sɔ sakpa. (Mmla’n 6:18, 19) I wie yɛle kɛ Megido lɔ yɛ Zoova yoli abonuan sa fa deli Izraɛlifuɛ mun Kanaanfuɛ’m be sa nun ɔn. Blɛ sɔ’n nun’n, Famiɛn Zabɛn nin Sizɛra m’ɔ ti i sonja’m be su kpɛn’n yɛ be klɔklɔli be ɔ.​—Jɔlɛ Difuɛ Mun 4:14-16.

Ɔ maan ndɛ mma “Armagedɔn” ti nzɔliɛ like dan kun. Be fa kan sran nɲɔn mɔ be le wunmiɛn kpa’n be utre dilɛ ndɛ.

Sa Nglo Yilɛ fluwa’n kan blɛ kun m’ɔ ka kaan sa ɔ́ jú’n i ndɛ. Blɛ sɔ’n nun’n, Satan nin i mmusu’m bé wá wláwlá asiɛ’n su famiɛn mun kɛ be yia be sonja mun, naan be fa be ɲin be wlawla Ɲanmiɛn i sran mun, naan be tanndan be junman’n i ɲrun. Sran miliɔn kpanngban kpa bé wá wú blɛ sɔ’n nun, afin Ɲanmiɛn wá klé i kpɔfuɛ’m be nun.​—Sa Nglo Yilɛ 19:11-18.

Biblu’n kan Ɲanmiɛn ndɛ se kɛ: “A ti Nyanmiɛn kun bɔ a yaci sa tɛ’n cɛ. A si aunnvuɛ, sran yo wɔ annvɔ. A fa-man ya ndɛndɛ, ɔ klun-ufue liɛ’n be kan-man.” (Neemi 9:17) ?Yɛ nn ngue ti yɛ i sɔ Ɲanmiɛn liɛ’n kwla gugu kɛ ɔ́ kún sran kpanngban sɔ ɔ? Kɛ ɔ ko yo naan y’a wun like nga ti yɛ Ɲanmiɛn yo sɔ’n, ɔ fata kɛ e tɛ kosan nsan nga’m be su. (1) ?Wan yɛ ɔ boli alɛ’n i bo ɔ? (2) ?Ngue ti yɛ Ɲanmiɛn fɛli i wun wlali nun ɔn? (3) ?Alɛ sɔ’n i bo’n gúa sɛ?

1. ?WAN YƐ Ɔ BOLI ALƐ’N I BO Ɔ?

Nán Ɲanmiɛn yɛ ɔ kpɛli Armagedɔn alɛ’n i ba ɔ. I like liɛ nga i waan ɔ́ yó’n yɛle sran kpa mɔ be waan bé klé be ɲrɛnnɛn’n be delɛ. Be nga be nin alɛ’n bali’n yɛle “asiɛ’n su famiɛn’m be kwlaa.” Afin Satan wlawla be nin be sonja mun kɛ be kun Ɲanmiɛn Zoova i sufuɛ mun.​—Sa Nglo Yilɛ 16:13, 14; 19:17, 18.

Le nɲɔn nga nun’n, nvle wie’m be nun’n, ɔ ti sran’m be cinnjin kpa kɛ be ɲan atin be kan be klun ndɛ, yɛ Ɲanmiɛn nga be waan bé sú i’n, be kwla su i. Ɔ maan kɛ be se kɛ famiɛn wie’m bé tánndan Ɲanmiɛn sulɛ wafa kun sa i ɲrun’n, annzɛ bé tánnin i mlɔnmlɔn bɔbɔ’n, ɔ kwla bo sran’m be nuan. Sanngɛ famiɛn wie’m be yoli i sɔ laa, yɛ kɛ é sé yɛ’n bɔbɔ’n be te yo i sɔ.b Kannzɛ ɔ ti sɔ’n, sanngɛ ngbaciɛ cinnjin nɲɔn o wafa nga be tanndannin Ɲanmiɛn i sufuɛ’m be ɲrun laa’n ɔ nin wafa nga bé wá yó i Armagedɔn blɛ nun’n be afiɛn. I klikli’n yɛle kɛ asiɛ’n wunmuan su yɛ bé tánndan be ɲrun sɔ ɔ. I nɲɔn su’n yɛle kɛ wafa nga Zoova wá tɛ́ be su kusu’n, i kekle m’ɔ́ wá yó’n, ɔ nin a yoman sɔ le. (Zeremi 25:32, 33) Biblu’n flɛ alɛ sɔ’n kɛ “Anannganman Nyanmiɛn b’ɔ kwla like kwlaa yo’n i cɛn dan’n nun” alɛ.

2. ?NGUE TI YƐ ƝANMIƐN FƐLI I WUN WLALI NUN ƆN?

Zoova kle i sran’m be kɛ be nin be wiengu be tran fɔuun naan be klo be kpɔfuɛ mun. (Mise 4:1-3; Matie 5:43, 44; 26:52) Ɔ maan kɛ be kpɔfuɛ’m bé wá bá kɛ be nin be bé kún’n, be su tɛman be su. Sɛ Ɲanmiɛn w’a fɛmɛn i sa w’a wlaman nun’n, bé núnnún i nvlefuɛ mun mlɔnmlɔn. Ɔ maan Ɲanmiɛn Zoova i dunman’n sáci. Sɛ kusu Ɲanmiɛn i kpɔfuɛ’m be nunnun i nvle’n, ɔ́ yó kɛ Zoova kloman sran naan ɔ yoman sa i nuan su naan kusu ɔ leman wunmiɛn sa. Ɔ kwlá yoman sɔ le!​—Jue Mun 37:28, 29.

Ɲanmiɛn kloman kɛ ɔ́ kún sran kun sa. I ti’n, ɔ kan like nga ɔ́ wá yó’n i ndɛ kle sran kwlaa. (2 Piɛr 3:9) Ɔ fa Biblu’n nun ndɛ’n fa kle e kɛ laa’n, kɛ sran’m be fali alɛ wlɛli i nvlefuɛ’m be sin’n, w’a yaciman w’a cɛman be. (2 Famiɛn Mun 19:35) Biblu’n kle kɛ kɛ Satan nin sran ng’ɔ wlawla be’n bé wá fá alɛ wlá Ɲanmiɛn i nvle’n i sin’n, Zoova bɔbɔ nin be bé yía nun. Ɲanmiɛn Ndɛ’n bɔbɔ kɛnnin i laa kɛ Zoova núnnún klunwifuɛ mun. (Nyanndra Mun 2:21, 22; 2 Tɛsalonikfuɛ Mun 1:6-9) Kɛ blɛ sɔ’n wá jú’n, be nga be klɔklɔli alɛ’n bé sí jrɛiin kɛ be nin Ɲanmiɛn mɔ like fi nunmɛn i sin’n yɛ b’a ɲɛn i ɔ.​—Ezekiɛl 38:21-23.

3. ?ALƐ SƆ’N I BO’N GÚA SƐ?

Armagedɔn alɛ’n yó maan sran miliɔn kpanngban fíte nun. I kpa’n alɛ sɔ’n bó blɛ kun mɔ fɔundi wá trán asiɛ’n su’n i ɲrun atin.​—Sa Nglo Yilɛ 21:3, 4.

Sa Nglo Yilɛ fluwa’n kan kɛ “sran kpanngban kpa” mɔ be kwlá kaman be’n, bé fín alɛ sɔ’n nun fíte. (Sa Nglo Yilɛ 7:9, 14) Bé nían atin nga Ɲanmiɛn kle be’n su bé yó maan asiɛ’n káci Mɛn Klanman kɛ nga Zoova fa sunnzunnin i laa’n sa.

?Amun si blɛ nga bé fá alɛ sɔ’n bé wlá Ɲanmiɛn i nvle’n i sin’n?

[Ja ngua lɛ ndɛ mun]

[Foto, bue 6]

Laa’n, Ɲanmiɛn Zoova deli i nvle’n.

[Foto, bue 7]

Armagedɔn alɛ nun’n Zoova dé i nvle’n ekun.