Jasin fɛ’n i kanlɛ m’ɔ ti e junman’n, maan e si i di
“Jasin fɛ i kanlɛ b’ɔ ti ɔ junman’n, di. Junman nga Nyanmiɛn fa wlali ɔ sa nun’n, guɛguɛ i bo.”—2 TIM. 4:5.
?AMÚN TƐ́ SU SƐ?
?Wan mun yɛ jasin fɛ’n i bolɛ’n nun’n, be kle e ajalɛ kpa ɔ?
?Ngue ti yɛ andɛ’n, ɔ ti cinnjin kɛ sran’m be ti jasin fɛ’n niɔn?
?Ngue yɛ ɔ fata kɛ e yo naan y’a si jasin fɛ’n i bo kpa ɔ?
1. ?Ngue ti yɛ e kwla se kɛ Zoova yɛ ɔ ti jasin bofuɛ klikli’n mɔ sran fi tomɛn i ɔ?
ƝANMIƐN ZOOVA yɛ ɔ ti jasin bofuɛ klikli’n niɔn, sran fi tomɛn i. Kɛ Adam nin Ɛvu be yoli ɲin kekle i su’n, ɔ kali lɛ boli jasin fɛ kun. Ɔ seli kɛ ɔ́ wá kún mmusu’m be si Satan. (Bob. 3:15) Kɛ afuɛ’m bé sín’n, Zoova maan i sufuɛ kpa wie’m be klɛli like nga ɔ́ wá yó naan b’a bo i dunman fɛ’n, i su ndɛ. Asa ekun’n, wafa nga Ɲanmiɛn wá síesíe sa kwlaa nga Satan kpɛli be ba’n, be kannin be ndɛ. Kpɛkun, wafa nga é kwlá ɲán ninnge kpakpa nga be to fuannin Adam nin Ɛvu’n, be kannin be ndɛ wie.
2. (a) ?Ngue ti yɛ e kwla se kɛ anzi’m be ti jasin fɛ bofuɛ ɔ? (b) ?Ajalɛ kpa benin yɛ Zezi kle e ɔ?
2 Anzi’m be ti jasin fɛ bofuɛ wie. Asa ekun’n, be uka sran mun naan be kan jasin fɛ’n asiɛ wunmuan’n su. (Lik 1:19; 2:10; Yol. 8:26, 27, 35; Ngl. 14:6) ?Yɛ anzi kpɛnngbɛn Misɛli li? I kusu ti jasin fɛ bofuɛ wie. I nun ng’ɔ o asiɛ’n su wa m’ɔ suan Zezi’n, junman cinnjin kpafuɛ ng’ɔ dili’n yɛle jasin fɛ’n i bolɛ. Ɔ fata kɛ e niɛn i ajalɛ’n su.—Lik 4:16-21.
3. (a) ?Jasin fɛ benin yɛ e bo ɔ? (b) ?Kosan benin mun yɛ ɔ ti cinnjin kɛ e mɔ e ti jasin bofuɛ’n, e tɛ su ɔ?
3 Zezi seli i sɔnnzɔnfuɛ mun kɛ be yo jasin bofuɛ. (Mat. 28:19, 20; Yol. 1:8) Akoto Pɔlu kusu wlali i wiengu junman difuɛ Timote fanngan seli kɛ: “Jasin fɛ i kanlɛ b’ɔ ti ɔ junman’n, di. Junman nga Nyanmiɛn fa wlali ɔ sa nun’n, guɛguɛ i bo.” (2 Tim. 4:5) ?Jasin fɛ benin yɛ e mɔ e ti Zezi i sɔnnzɔnfuɛ’n, e bo ɔ? E se sran’m be kɛ e Si Zoova m’ɔ o ɲanmiɛn su lɔ’n, ɔ klo sran mun. (Zan 3:16; 1 Piɛ. 5:7) Like nga i Famiɛn Diwlɛ’n wá yó’n, ɔ kle kɛ ɔ klo sran mun. Yɛle kɛ, Zoova wá yó maan ɲrɛnnɛn wunlɛ’n wíe. Yɛ ɔ́ yó maan e wla su kpɛnman sa yaya’m be su kun mlɔnmlɔn. ?Nán jasin fɛ dan yɛle i sɔ’n? (Eza. 65:17) I sɔ’n ti’n, aklunjuɛ su e se sran mun kɛ sran kwlaa ng’ɔ lo i wun man Ɲanmiɛn kɛ ɔ sie i’n, m’ɔ yo like nga Ɲanmiɛn se i kɛ ɔ yo’n, m’ɔ yo sa i nuan su’n, ɔ kaci Ɲanmiɛn i janvuɛ. (Jue. 15:1, 2) Kɛ mɔ e ti jasin bofuɛ’n ti’n, maan e tɛ kosan cinnjin nɲɔn nga’m be su: ?Ngue ti yɛ andɛ’n, ɔ ti cinnjin kɛ sran’m be ti jasin fɛ’n niɔn? ?Yɛ wafa sɛ yɛ jasin fɛ’n i bolɛ m’ɔ ti e junman’n, e kwla di i kpa ɔ?
SA NGA TI YƐ Ɔ TI CINNJIN KƐ SRAN’M BE TI JASIN FƐ’N
4. ?Ɲanmiɛn i su ato benin yɛ sran’m be bua ɔ?
4 Maan ɔ yo amun kɛ an siman amun si’n sa. Be nga kusu mɔ be waan be si i’n, be kɛn i kɛ amun si’n fɛmɛn i wun mantanman sran. Asa ekun’n, be se kɛ ɔ fia sa su naan i klun yo wi kpa. Wie’m be liɛ bɔbɔ’n, be se amun kɛ nán amun bowɛ kpɛ amun si’n i sin atin naan ɔ wuli. I sɔ ndɛ kunngba mun yɛ sran’m be kɛn i Ɲanmiɛn su ɔ. Be waan sran fi kwlá siman Ɲanmiɛn. Naan kusu’n, Ɲanmiɛn klun yo wi kpa. I wie yɛle kɛ Ɲanmiɛn sulɛ wafa’m be su kpɛn’m be waan Ɲanmiɛn wá klé sa tɛ yofuɛ’m be ɲrɛnnɛn kpa lika kun nun. Wie’m be liɛ kusu’n, be waan sa sroesroe nga be ju asiɛ’n su’n, kɛ asiɛ’n m’ɔ keje’n sa’n, be fin Ɲanmiɛn. Naan ɔ yo i sɔ fa tu sran’m be fɔ. Kusu nn kɛ sa sɔ’m be ju’n, nán sran tɛ’m be ngunmin yɛ be wu ɔ.
5, 6. ?Ndɛ nga sran’m be kɛn i kɛ ndo yɛ ɔ kacili sran’n, ɔ nin ato ndɛ nga Ɲanmiɛn sulɛ wafa’m be kan’n, i bo gua sɛ?
5 Sran wie’m be waan ndo yɛ ɔ kacili sran ɔn. Naan nán Ɲanmiɛn yɛ ɔ boli mɛn’n niɔn. Wie’m be kpɛ i kpo be se kɛ Ɲanmiɛn nunman lɛ. Wie’m be liɛ bɔbɔ’n, be waan klɔ sran’n, ɔ ti nnɛn wafa kun naan i sɔ’n ti yɛ wie liɛ’n, i ayeliɛ’n fa nnɛn’m be liɛ’n niɔn. Be se ekun kɛ sran mianmianlɛ kplɔlɔlɔ’n, ɔ o sran’m be mmoja’n nun naan i ti’n, lufle bulɛ’n su wieman le. I lɛ nun’n, be nga be waan ndo yɛ ɔ kacili sran’n, be leman like mɔ be fa be wla gua su ɔ
6 Ndɛ nga sran’m be kɛn i kɛ ndo yɛ ɔ kacili sran’n, ɔ nin ato ndɛ nga Ɲanmiɛn sulɛ wafa’m be kan’n, be timan jasin fɛ. Be kwlaa ti yɛ wie liɛ’n, blɛ kasiɛn nga nun sran’m be fɛ ɔ. (Rɔm. 1:28-31; 2 Tim. 3:1-5) Yɛ kɛ nga akoto Pɔlu fa kannin’n sa’n, i sɔfuɛ’m be ti’n, sran’m be “wun-man sa wlɛ. Nguan nga Nyanmiɛn fa man sran’n, be dunman tɛ-man nun wie.” (Efɛ. 4:17-19) Asa ekun’n, be nga be waan ndo yɛ ɔ kacili sran’n, ɔ nin Ɲanmiɛn sulɛ wafa’m be ato ndɛ’m be ti’n, sran’m be sɔman Ɲanmiɛn i jasin fɛ’n nun.—An kanngan Efɛzfuɛ Mun 2:11-13 nun.
7, 8. ?Like kunngba cenje nga sran kun kwla yo naan w’a si Ɲanmiɛn i su jasin fɛ’n i kpa’n, yɛle benin?
7 Á wún kɛ sran kun nin Ɲanmiɛn bé nánti’n, nn w’a wun i wlɛ kɛ Ɲanmiɛn o lɛ sakpa naan kusu’n, i silɛ’n timɛn i wun yalɛ klelɛ. E kwla uka sran mun naan b’a si Ɲanmiɛn. Sɛ e waan é yó sɔ’n, maan e wla be fanngan naan be bo be ɲin ase suan ninnge nga Ɲanmiɛn yili be’n, be su like. Kɛ be yo sɔ mɔ be bu i su akunndan’n, be wun i wlɛ kɛ Ɲanmiɛn le tinmin naan ɔ ti ngwlɛlɛfuɛ. (Rɔm. 1:19, 20) Sanngɛ i sɔ yolɛ ngunmin kwlá ukaman sran mun naan b’a si kosan wie’m be su tɛlɛ’n. Kosan sɔ’m be nun wie yɛ: ?Ngue ti yɛ Ɲanmiɛn tran lɛ mɔ sran’m be wun ɲrɛnnɛn ɔn? ?Ngue yɛ Ɲanmiɛn waan ɔ́ yó i asiɛ’n su ɔ? ?E tinuntinun e ndɛ lo Ɲanmiɛn?
8 Like kunngba cenje nga sran kun kwla yo naan w’a si Ɲanmiɛn i su jasin fɛ’n, ɔ nin i klun sa’n be kpa’n, yɛle Biblu’n i nun like suanlɛ. Ɔ maan ukalɛ nga e uka sran mun naan b’a kwla si i sɔ ninnge mun’n, ɔ ti e cenjele like! Sɛ e waan é úka sran mun sakpa naan be kaci Ɲanmiɛn janvuɛ’n, nán ndɛ ngbɛn sa yɛ ɔ fata kɛ e kan ɔn. Sanngɛ, ɔ fata kɛ e tu ndɛ’n i bo weinwein naan be lafi su. (2 Tim. 3:14) I lɛ nun’n, ɔ fata kɛ e nian wafa nga Zezi yoli’n su. ?Wafa sɛ yɛ Zezi yoli mɔ i ndɛ’n wluwluli sran’m be wun dan ɔn? Ajalɛ’m be nun kun ng’ɔ fali’n, yɛle kɛ ɔ sili kosan usa. ?Wafa sɛ yɛ e kwla sɔnnzɔn i ɔ?
JASIN BOFUƐ KPA’M BE SI KOSAN USA
9. ?Sɛ e waan é úka sran mun naan be fa jasin fɛ’n su’n, ngue yɛ ɔ fata kɛ e yo ɔ?
9 ?Kɛ Zezi sa’n, ngue ti yɛ kɛ é bó jasin fɛ’n, ɔ fata kɛ e usa kosan ɔn? Maan e se kɛ amun wunnɛn yo amun ya kpɛkun, dɔɔtrɔ’n se amun kɛ ɔ le ndɛ fɛ kpa kan kle amun. Yɛle kɛ sɛ ɔ kpaci amun nun’n, amún yó juejue. I yo, amun kwla fɛ i ndɛ’n su. ?Sanngɛ sɛ w’a usaman wafa nga tukpacɛ’n yo amun naan w’a se sɔ’n, amún fɛ́ i ndɛ’n su? Nanwlɛ, i su falɛ yó ya. Kannzɛ dɔɔtrɔ sɔ’n si ayre’n, sanngɛ ɔ fata kɛ ɔ usa amun wafa nga amun wun yo amun’n, naan w’a si ayre ng’ɔ́ fá yó amun’n. I kunngba’n niɔn, sɛ e waan é úka sran mun naan be fa Ɲanmiɛn Sielɛ jasin fɛ’n su’n, ɔ fata kɛ e si be kosan usa naan y’a si ndɛ trele nga é kán klé be’n.
10, 11. ?Sɛ e nian Zezi i like klelɛ wafa’n su’n, wafa sɛ yɛ i sɔ’n kwla uka e naan y’a uka sran mun ɔn?
10 Zezi si kɛ, kɛ bé klé sran kun i like mɔ be usɛ i kosan’n, i sɔ’n yo maan like suanfuɛ’n kɛn i klun ndɛ. Yɛ i sɔ’n uka like klefuɛ’n wie naan w’a si like suanfuɛ’n i su ndɛ. I wie yɛle kɛ, kɛ ɔ kunndɛli kɛ i sɔnnzɔnfuɛ’m be wun i wlɛ kɛ be wun ase kanlɛ ti kpa’n, ɔ usali be kosan kun naan be bu akunndan. (Mar. 9:33) Kɛ i waan ɔ́ úka Piɛli naan ɔ si wafa ng’ɔ kwla jran Ɲanmiɛn Ndɛ’n su fa ajalɛ’n, ɔ usɛli i kosan kun. Kpɛkun, ɔ boli kosan sɔ’n i su tɛlɛ fanunfanun mun kleli i naan ɔ kle kun. (Mat. 17:24-26) Cɛn kun liɛ’n, kosan fanunfanun yɛ Zezi fa usali i sɔnnzɔnfuɛ mun naan be kan be klun ndɛ ɔ. (An kanngan Matie 16:13-17 nun.) Kɛ e fa wun i lɛ’n, like ng’ɔ fata kɛ sran’m be yo’n, Zezi w’a kɛnmɛn i trele w’a kleman be. Sanngɛ, ɔ usali be kosan naan be bu akunndan naan be kaci be mɛn dilɛ wafa’n.
11 Sɛ e si kosan usa kɛ nga Zezi fa yoli’n sa’n, é wún wafa nga é úka sran’m be kpa’n. Yɛ é sí wafa nga é tɛ́ be nga be kpalo e nuan ndɛ’n, be su’n. Kpɛkun, é wún wafa nga é klé sran’m be like naan b’a ɲɛn i su ye’n. Siɛn’n, maan e fa sunnzun ase nsan kun e kle wafa nga e kwla fa akunndan e usa kosan’n.
12-14. ?Wafa sɛ yɛ amun kwla uka amun wa kun naan w’a sroman jasin fɛ’n i bolɛ ɔ?
12 Sunnzun ase klikli’n: Maan e se kɛ e wa’n w’a fin suklu w’a ba. Kpɛkun ɔ se e kɛ i wiengu’m be usali kɛ: ?Kɛ sran wu’n, nin yɛ ɔ kɔ ɔ? Asa ekun’n, i wiengu’m be kannin sin fɛtɛ’n i ndɛ. Sanngɛ w’a wunman wafa ng’ɔ kwla bo jasin fɛ’n kle be ɔ. ?Wafa sɛ yɛ amún úka amun wa’n niɔn? Nán amun ijɔ i annzɛ amun ka lɛ be kle i ndɛ trele ng’ɔ kwla kan kle i janvuɛ mun’n. Sanngɛ kɛ Zezi sa’n, amun usɛ i kosan naan ɔ kɛn i klun ndɛ.
13 I wie yɛle kɛ amun nin i be kwla kanngan fluwa Biblu’n kle i ndɛ tre 6 nun kan. Kpɛkun amun usɛ i kɛ, kɛ i bɔbɔ niɛn i sa’n, fluwa’n i nun ndɛ benin yɛ ɔ kle weiin kɛ be nga be wuli’n be wunman be ɲrun sin fɛtɛ wie nun ɔn. Maan an wlɛ i fanngan naan ɔ kɛn i klun ndɛ. (Rɔm. 12:2) Yɛ amun se i kɛ ɔ nunman nun kɛ saan fi ndɛ ng’ɔ́ kán’n, ɔ nin amun liɛ’n yo kun.
14 Amun yiyi nun kle amun wa’n kɛ, wafa nga amun nin i be kokoli yalɛ’n, ɔ kwla niɛn i sɔ’n su naan ɔ nin i wiengu’m b’a koko yalɛ. Amun nin ba’n be yi i sɔ ajalɛ’n i nglo. Amun yo kɛ amun ti suklu ba’m be nun kun sa, naan ɔ bo jasin’n kle amun. Ɔ kwla fa sunnzun ase kun. I sin’n, ɔ usa amun kosan naan amun kan amun klun ndɛ. I wie yɛle kɛ ɔ kwla jran ndɛ ng’ɔ o fluwa Biblu’n kle i ndɛ tre 6 i ndɛ kpɔlɛ 17 su usa amun kɛ: “?Sɛ siɛ kun waan ɔ́ tú i wa ɲin keklefuɛ kun fɔ’n, ɔ kwla fɛ i wa’n i sa’n wla sin nun?” Kɛ ɔ ko tie amun nuan ndɛ’n, ɔ kwla usa ekun kɛ: “?Sɛ siɛ kun su yomɛn i sɔ’n, Ɲanmiɛn m’ɔ yili sran mun’n yɛ ɔ́ fá sa tɛ yofuɛ mun gúɛ i sin fɛtɛ wie nun tú be fɔ ɔ?” Kɛ ɔ ko yo naan kɛ amun wa’n bó jasin fɛ’n srɛ w’a kunmɛn i’n, amun nin i kwla koko yalɛ kɛ ngalɛ sa titi. Sɛ amun uka amun wa’n naan ɔ si kosan usa’n, ɔ́ kwlá dí jasin fɛ bolɛ m’ɔ ti i junman’n i kpa.
15. ?Kosan benin yɛ e kwla usa sran ng’ɔ lafiman Ɲanmiɛn su’n naan w’a kaci ɔ?
15 Sunnzun ase nɲɔn su’n: Maan e se kɛ amun su bo jasin fɛ’n naan sran nga amun a to i’n, w’a se amun kɛ ɔ lafiman Ɲanmiɛn su, annzɛ Ɲanmiɛn nunman lɛ. Nán maan ndɛ sɔ’n ti’n, amun se kɛ amun boman jasin fɛ’n klemɛn i. Amun kwla usɛ i aɲinyiɛ su kɛ, ɔ bu i sɔ akunndan liɛ’n w’a di afuɛ nɲɛ. Kpɛkun amun se i naan ɔ kan sa nga ti yɛ ɔ lafiman Ɲanmiɛn su’n. Kɛ amun ko tie i nuan ndɛ’n, amun yo i mo. Amun se i kɛ ndɛ ng’ɔ kannin’n, ɔ kle kɛ kwlaa naan w’a se i wun kɛ Ɲanmiɛn nunman lɛ’n, ɔ trannin ase buli akunndan kpa. I sin, amun usɛ i kɛ sɛ amun mɛn i fluwa kun m’ɔ kle kɛ Ɲanmiɛn yɛ ɔ yili ninnge mun’n, ɔ́ kánngan nun. Sɛ ɔ kplin su’n, amun kwla fa afuɛ 2011 nun Sasafuɛ Tranwlɛ’n Fevrie 1 be mɛn i. Kpɛkun, amun fɛ i ɲin sie like suanlɛ nga be flɛ i “Ɲanmiɛn wawɛ’n di junman ninnge’m be yilɛ’n nun” i su. Kɛ e usa sran kun kosan amanniɛn su’n, i sɔ’n kwla yo naan w’a sɔ jasin fɛ’n nun klanman.
16. ?Kɛ e kle sran kun i Biblu’n nun like’n, ngue ti yɛ ɔ fataman kɛ e kplin i su naan ɔ kanngan kosan’m be su tɛlɛ’n ɔ guɛ i lɛ ngbɛn ɔn?
16 Sunnzun ase nsan su’n: Kɛ é klé sran kun i Biblu’n nun like’n, nán maan e kplin i su naan ɔ kanngan kosan’m be su tɛlɛ’n, ɔ guɛ i lɛ ngbɛn. Afin sɛ ɔ yo i sɔ’n, ɔ su lafiman Ɲanmiɛn su kpa. Kpɛkun ɔ su kwlá kɔmɛn i ɲrun Zoova i sulɛ’n nun. Sɛ afɛ’n nin yalɛ klelɛ’n be tɔ i su’n, ɔ́ yáci Nyanmiɛn sulɛ. Ɔ́ yó kɛ awie m’ɔ tɔli akpuɛ’n su sa. Kɛ mɔ w’a ɲanman ndin wlawlɛ’n ti’n, ɔ wuli. (Mat. 13:20, 21) I sɔ’n ti’n, maan e se like suanfuɛ’n kɛ ɔ kan wafa nga ɔ bu like nga ɔ suan’n, i ndɛ. Yɛle kɛ sa nga ti yɛ ɔ bu i kɛ like nga e kle i’n, ɔ ti nanwlɛ naan ɔ́ míɛn i ɲin fá su’n, annzɛ ɔ timan nanwlɛ’n, maan ɔ kan. Kpɛkun maan e ukɛ i naan ɔ fa Ɲanmiɛn Ndɛ’n ɔ yiyi ndɛ nga ɔ kannin’n nun. I liɛ’n, Ɲanmiɛn Ndɛ’n i su yɛ ɔ́ láfi ɔ. (Ebr. 5:14) I sɔ’n ti’n, maan e si kosan usa kpa. I liɛ’n, é kwlá úka like suanfuɛ mun naan b’a lafi Ɲanmiɛn su kpa. Ɔ maan kannzɛ sran’m be tanndan be ɲrun annzɛ be kunndɛ kɛ bé láka be’n, be su kpɔciman Ɲanmiɛn. (Kol. 2:6-8) ?Ngue yɛ e kwla yo i ekun naan jasin fɛ’n bolɛ junman nga Ɲanmiɛn fa wlali e sa nun’n, y’a di y’a guɛguɛ i bo ɔ?
JASIN BOFUƐ KPA’M BE SUAN BE WIENGU BO
17, 18. ?Jasin fɛ’n i bolɛ nun’n, wafa sɛ yɛ e kwla uka e wun ɔn?
17 Zezi sunmɛnnin i sɔnnzɔnfuɛ mun nɲɔnnɲɔn naan be ko bo jasin fɛ’n. (Mar. 6:7; Lik 10:1) Asa ekun’n, kɛ i osu lali nun’n, akoto Pɔlu kannin i niaan Klistfuɛ’m be ndɛ seli kɛ be ti i “wiengu junman difuɛ” naan ɔ nin be “kplili jasin fɛ’n i bolɛ’n i wun.” (Fil. 4:3) Ɔ maan kɛ ɔ fɛ i afuɛ nga be flɛ i 1953 nun’n, anuannzɛ’n seli kɛ jasin bofuɛ’m be uka be wiengu jasin fɛ’n i bolɛ nun.
18 ?Kɛ e nin aniaan kun é bó jasin fɛ’n, wafa sɛ yɛ e kwla uka e wun ɔn? (An kanngan 1 Korɛntfuɛ Mun 3:6-9 nun.) Kɛ aniaan’n kánngan Biblu’n nun klé sran kun’n, maan e fa e Biblu’n liɛ’n naan e nian nun wie. Asa ekun’n, maan e ɲin tran yalɛ nga aniaan’n, ɔ nin sran’n be su koko’n i su kpa naan sɛ aniaan’n i ɲin mian’n, y’a kwla ukɛ i. (Aku. 4:12) Sɛ aniaan’n su yiyi ndɛ’n nun klanman’n, nán maan e kpɛ i nuan ndɛ. Sɛ e yo sɔ’n, ɔ cɛman naan aniaan’n i sa sin w’a bubu i. Sɛ sran ng’ɔ sɔli e nun’n kusu yɛ ɔ su kan ndɛ’n, nán maan e kpɛ i nuan ndɛ wie. Afin i sɔ’n kwla bubu i sa sin wie. ?I sɔ’n kle kɛ, ɔ fataman kɛ e ijɔ mlɔnmlɔn? Cɛcɛ. Sanngɛ sɛ e waan é búa ndɛ nun’n, maan ɔ yo kpe kan. Yɛ maan e yo i sɔ kpɛ kunngba annzɛ kpɛ nɲɔn. I sin’n, maan e yaci aniaan’n nun naan ɔ guɛ i ndɛ’n i bo.
19. ?Ngue yɛ ɔ fataman kɛ e wla fi su ɔ? ?Ngue ti yɛ Zoova fali jasin fɛ’n bolɛ junman’n mannin e ɔ?
19 ?Kɛ amun nin aniaan’n be jao awlo kun nun mɔ amún kɔ́ uflɛ nun’n, wafa sɛ yɛ amun kwla suan amun wiengu bo ɔ? Wafa nga amun kwla kan ndɛ’n i kpa ekun naan sran nga amún wá tó i’n, w’a sɔ amun nun klanman’n, an koko i su yalɛ. An nian amun wun su naan amun a kanman jasin bowlɛ’n nun lɔfuɛ’m be wun ndɛ wie m’ɔ kwla bubu sran sa sin’n. Asa ekun’n, nán amun kan aniaan’m be wun ndɛ tɛ. (Gal. 5:15) Nán e wla fi su kɛ fɔ o e kwlaa e nun. Naan aunnvuɛ dan mɔ Zoova si e’n, i ti yɛ ɔ fali jasin fɛ’n i bolɛ m’ɔ ti aɲrunɲan junman’n mannin e kɛ e di, kpɛkun ɔ kle e i dilɛ ɔ. (An kanngan 2 Korɛntfuɛ Mun 4:1, 7 nun.) I sɔ’n ti’n, maan e kwlaa e wla e wun ase naan jasin fɛ’n i bolɛ m’ɔ ti e junman’n, e di i kpa e fa kle kɛ e si ye!
[Foto, bue 7]
[Ndɛ kwle, bue 9]
Sɛ e waan sran’m be lafi e ndɛ’n su’n, maan e si i kan naan be wun i wlɛ kɛ ɔ ti nanwlɛ.
[Foto, bue 10]
Sɛ e si kosan usa’n sran’m bé bú be klun lɔ nian, sɛ ndɛ nga be lafi su’n ti nanwlɛ o.
[Foto, bue 10]
Sɛ e si kosan usa’n sran’m bé bú akunndan, ɔ maan bé fá ndɛ nanwlɛ’n su.
[Foto, bue 10]
Sɛ e si kosan usa’n sran’m bé fá Ɲanmiɛn Ndɛ’n yíyí be ndɛ’n nun, ɔ maan Ɲanmiɛn Ndɛ’n i ngunmin su yɛ bé fá ɔ.