BIBLU’N I SU KOSAN’M BE SU TƐLƐ

?Ngue ti yɛ Klist bá ekun ɔn?

Afuɛ 33 nun’n, kwlaa naan Zezi Klist w’a ɔ ɲanmiɛn su’n, ɔ seli kɛ ɔ́ bá ekun. Ɔ fɛli i wun sunnzunnin wlengbi kun m’ɔ tuli ajalɛ ɔli lika mmuammua. Ɔ cɛli lɔ lele, be sieli i famiɛn kwlaa naan w’a ba. I lɛ’n kle kɛ Zezi bá naan ɔ́ wá dí famiɛn.​—An kanngan Lik 19:11, 12 nun.

?Kɛ Klist wá bá’n, sran’m bé wún i? Cɛcɛ. Afin Ɲanmiɛn cɛnnin i aolia nun sran. (1 Korɛntfuɛ Mun 15:44-45) Ɔ ɔli ɲanmiɛn su ko trannin Ɲanmiɛn i fama su. (Jue Mun 110:1) Kɛ ɔ cɛli kpa’n, be fali Zezi wunngeli Ɲanmiɛn Zoova i wun lɔ. Zoova mɔ be flɛ i “bian oke’n” fali kwlalɛ’n mɛnnin i naan ɔ sie sran mun. Ɔ maan kɛ Zezi bá famiɛn. Sanngɛ sran fi su kwlá wunmɛn i.​—An kanngan Daniɛl 7:13, 14 nun.

?Kɛ Zezi wá bá’n, ngue yɛ ɔ́ yó ɔ?

Zezi nin i anzi mun yɛ bé bá ɔ. E ɲinma su wunmɛn i. Ɔ́ wá dí sran’m be jɔlɛ. Ɔ́ núnnún klunwifuɛ mun sekeseke. Be nga be kplin su kɛ ɔ sie be’n, ɔ́ mán be anannganman nguan.—An kanngan Matie 25:31-33 nin Jue Mun 37:9-11 nun.

Kɛ Zezi wá síe sran mun’n, ɔ́ yó maan asiɛ’n káci lika klanman. Ɔ́ cɛ́n be nga be wuli’n. Kpɛkun bé dí aklunjuɛ asiɛ’n mɔ w’a kaci lika klanman’n su.​—An kanngan Jue Mun 37:29 nin Zan 11:25 nun.

Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i bue 73-85 nun. Zoova i Lalofuɛ mun yɛ be yili ɔ.

A kwla ko fɛ i ɛntɛnɛti lika nga nun lɔ: www.jw.org

[Foto, bue 32]

Zezi síe sran mun kpa.

[Foto, bue 32]