BIBLU’N I SU KOSAN’M BE SU TƐLƐ
?Ngue yɛ cɛn wie lele Zezi yó ɔ?
Afuɛ nga be flɛ i 33 nun’n, Zezi wuli. I sin’n, Ɲanmiɛn cɛnnin i. Kpɛkun, ɔ sɛli i sin ɲanmiɛn su lɔ. Kɛ i osu cɛli kpa’n, Ɲanmiɛn sieli i Famiɛn. (Daniɛl 7:13, 14) Cɛn wie lele’n, Zezi wá yó maan fɔundi trán asiɛ wunmuan’n su. Asa ekun’n, ɔ́ yó maan sran’m be su diman yalɛ kun.—An Kanngan Jue Mun 72:7, 8, 13 nun.
Famiɛn Zezi wá yó abonuan sa mun. Ɔ́ yó maan fɔ’n su tranman sran’m be nun kun. Sran fi su yoman oke kun, yɛ be su wuman kun. Be kwlaa be klun jɔ́.—An Kanngan Zan 5:26-29, ɔ nin 1 Korɛntfuɛ Mun 15:25, 26 be nun.
?Kɛ é sé yɛ’n, ngue yɛ Zezi yo ɔ?
Kɛ é sé yɛ’n, Zezi nian jasin fɛ’n mɔ i sɔnnzɔnfuɛ’m be bo i mɛn wunmuan nun’n su. I sɔnnzɔnfuɛ sɔ’m be ko nian sran’m be osu. Kpɛkun be fa Ɲanmiɛn Sielɛ’n i su ndɛ nga Biblu’n kan’n kle be. Zezi seli kɛ ɔ́ súɛn i sɔnnzɔnfuɛ’m be bo lele Ɲanmiɛn Sielɛ’n ɔ́ núnnún mɛn’n nun famiɛn diwlɛ’m be kwlaa.—An Kanngan Matie 24:14; 28:19, 20 nun.
Zezi maan i sɔnnzɔnfuɛ’m be kle sran’m be like naan be nanti klanman. I liɛ’n, kɛ ɔ́ wá núnnún mɛn tɛ nga’n, ɔ́ nían be su lele bé jú mɛn klanman’n nun.—An Kanngan 2 Piɛr 3:7, 13, ɔ nin Sa Nglo Yilɛ 7:17 nun.
Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 8 nun. Zoova i Lalofuɛ mun yɛ be yili ɔ.
A kwla ko fɛ i ɛntɛnɛti lika nga nun lɔ: www.jw.org