Maan e nian e sran oke’m be lika

“M mma mun, nán maan amun sran klolɛ’n yo amun nuan bui su, nin nuan nun fɛ su, sanngɛ maan be wun i sakpa like nga amun yo’n nun.”​—1 ZAN 3:18.

?AMÚN TƐ́ SU SƐ?

?Kwlaa naan oke yolɛ’n i “ɲrɛnnɛn blɛ’n” w’a ju’n, ngue yɛ awlobo’n kwla yo ɔ?

?Blɛ benin yɛ sran oke’n kwla mian ukalɛ wun kpa ɔ?

?Sɛ sran kun su niɛn i sran oke’n i lika’n, ngue yɛ e kwla yo e ukɛ i ɔ?

1, 2. (a) ?Ngue yɛ ɔ bo siɛ nin niɛn nin ba sunman be wla ɔ? (b) ?Kosan benin yɛ be fa usa be wun ɔn? (c) ?Ngue yɛ siɛ nin niɛn nin ba’m be kwla yo ɔ?

KƐ E wun kɛ e si annzɛ e nin’n, ɔ kwlá yomɛn i bɔbɔ i ninnge mun kun kɛ laa sa’n, i sɔ’n bo wla dan. Wienun ɔn, sa yaya w’a yo e si annzɛ e nin’n, yɛ ɔ kwlaman nun kun. Ɔ kwla yo kɛ ɔ tɔli yɛ i sɔwa’n buli ɔ. Annzɛ kusu’n, ɔ tɔli tukpacɛ yɛ w’a yo i kekle ɔ, annzɛ ɔ wunman sa wlɛ kun. Kɛ ɔ yo sɔ’n, e wla cɛ yɛ ɔ bo e wun ɔn. ?Nɛ́n i ɔ? Siɛ oke annzɛ niɛn oke’n kusu’n, kɛ ɔ wun kɛ ɔ kwlá yomɛn i ninnge mun kɛ laa sa kun’n, i wla bo i wun wie. (Zɔb 14:1) ?Ngue yɛ ba’m bé yó naan b’a nian be sran oke’n i lika ɔ?

² Fluwa kun m’ɔ kan sran oke’m be lika nianlɛ’n i ndɛ’n seli kɛ: “Kɛ ɔ yo naan awlobo kun nunfuɛ’m be koko wafa nga sɛ i blɛ’n ju’n, bé nían be si nin be nin oke’m be lika’n i su yalɛ’n, ɔ kwla yo kekle. Sanngɛ, awlobo nga be fɛ i sɔ ajalɛ’n, ɔ yo be wun sa ye. Afin kɛ be si annzɛ be nin’n wá yó oke’n, bé kwlá wún wafa nga bé níɛn i lika kpa’n.” Ɔ fata kɛ e wun i wlɛ kɛ oke yolɛ’n, ɔ le i su afɛ. Ɔ leman ayre. I sɔ’n ti’n, ɔ ti kpa kɛ awlobo’m be buabua be wun be sie naan oke yolɛ’n i su afɛ’n w’a fuman be nun. ?Wafa sɛ yɛ siɛ nin niɛn, ɔ nin ba’m be kwla buabua be wun sie ɔ?

MAAN E BUABUA E WUN SIE NAAN “NYRƐNNƐN BLƐ’N” W’A JU

3. ?Kɛ siɛ nin niɛn’m be yo oke’n, ngue yɛ ɔ fata kɛ be nin be mma’m be yo ɔ? (An nian foto ng’ɔ o kan like suanlɛ’n bo i bo lɛ’n.)

³ Blɛ wie ju’n, sran oke’m be kwlá kukuman be wun kun, saan bé úka be. (An kanngan Akunndanfuɛ’n 12:1-7 nun.) Blɛ sɔ nun’n, ɔ fata kɛ be nin be mma’m be nuan sɛ like nga be tinuntinun be kwla yo’n i su. I sɔ’n ti’n, ɔ fata kɛ be yia be koko i sɔ’n i su yalɛ. Kɛ be yia sɔ’n, siɛ nin niɛn mun o, ba mun o, ɔ fata kɛ sran kun kɛn i klun ndɛ weinwein. Like nga be kwlá yoman’n, nán be se kɛ saan fii yɛ bé yó ɔ. Sɛ ba’m be nun kun ɔ́ fɛ́ i si annzɛ i nin oke’n ɔ́ kó trɛ́n i wun o, sɛ kusu siɛ’n annzɛ niɛn’n ɔ́ ká i bɔbɔ i tranwlɛ lɔ o, maan be koko i kwlaa ngalɛ’n i su yalɛ.a Maan sran kun i like liɛ ng’ɔ kwla yo naan b’a nian be nin annzɛ be si oke’n i lika’n, ɔ kɛn i trele. (Nya. 24:6) I wie yɛle kɛ ba’m be nun kun kwla se kɛ ɔ́ nían sran oke’n i lika cɛn kwlaa. Ba uflɛ kusu kwla se kɛ ɔ́ tó i ayre mun. Maan sran kun wun i like liɛ ng’ɔ fata kɛ ɔ yo’n i wlɛ weiin. Sɛ ɔ́ kɔ́ i ɲrun naan sran kun kwlá yomɛn i like liɛ’n kun’n, sran uflɛ kwla kaci i. Annzɛ kusu like nga bé yó’n, ɔ kwla to be, ɔ to be.

4. ?Nin yɛ awlobo’n kwla kunndɛ ukalɛ ɔ?

⁴ Sɛ ɔ fata kɛ e nian e si annzɛ e nin oke’n i lika’n, maan e wun wafa nga i wun yo i’n i wlɛ kpa. I wie yɛle kɛ sɛ tukpacɛ wie o i wun naan ɔ́ yó i kekle kɔ́ i ɲrun’n, maan e usa nun kpa naan e si i sin sa ng’ɔ́ jú’n. (Nya. 1:5) Sɛ awa nian sran oke’m be lika’n, like ng’ɔ kwla yo man e sran oke’n maan e usa nun kpa wie. I liɛ’n, é kwlá wún wafa nga é níɛn i lika kpa’n. Kɛ e bu i kwlaa sɔ’n i akunndan’n, e wla kwla bo e wun. Sɛ ɔ yo e sɔ’n, maan e bo su kle sran ng’ɔ ti e janvuɛ kpa’n. Sanngɛ i kwlaa i ti nin i bo’n, yɛle kɛ maan e srɛ Zoova e fa sa’n e wlɛ i sa nun. Afin sɛ sa ng’ɔ o e su’n ti sɛ ti sɛ’n, i yɛ ɔ kwla suan e bo naan e wla w’a gua ase ɔ.​—Jue. 55:23; Nya. 24:10; Fil. 4:6, 7.

5. ?Ngue ti yɛ ɔ fata kɛ awlobo’m be dun mmua be koko wafa nga bé nían be sran oke’n i lika’n, i su yalɛ ɔ?

⁵ Awlobo wie’m be yia be koko like nga bé yó naan b’a nian be sran oke’n i lika’n i su yalɛ. Wie liɛ’n, ba’m be nuan kwla sɛ be wun kɛ maan be sran oke’n, ɔ ko tran be nun kun i wun. Annzɛ kusu be nuan kwla sɛ ajalɛ uflɛ su. Kɛ awlobo’n be buabua be wun kɛ ngalɛ’n sa sie’n, be wun oke yolɛ’n i su ‘afɛ nin nyrɛnnɛn’n,’ i trawlɛ. Ɔ maan ɔ wlaman be ɲin nglonglo. (Jue. 90:10) Be nga be yoman sɔ’n, sa’m be fu be nun. Ɔ maan, be nuan sɛman yɛ be fa ajalɛ kplukplu su.​—Nya. 20:18.

6. ?Ngue ti yɛ ɔ ti kpa kɛ awlobo’m be koko lika nga be sran oke’n trán naan b’a niɛn i lika’n, i su yalɛ ɔ?

⁶ ?Sɛ e si annzɛ e nin’n yo oke’n, nin yɛ é kúnndɛ kɛ ɔ tran naan y’a niɛn i lika ɔ? Kɛ ɔ yo naan sran wie’m be nin be si’n annzɛ be nin’n be dun mmua koko i sɔ’n i su yalɛ’n, ɔ ti kekle man be. Sanngɛ, sran kpanngban be wunnin kɛ i sɔ yalɛ kokolɛ’n, ɔ yoli be ye. Afin, kɛ be dun mmua koko be wun naan sa wie w’a ju’n, be kwla koko i wɛtɛɛ su, be ti be wun aniɛn. Kpɛkun, be fa ajalɛ ng’ɔ ti kpa’n. Siɛ annzɛ niɛn wie’m be kwla se kɛ be kunndɛman kɛ bé klé be mma’m be yalɛ naan bé ká be tranwlɛ lɔ. Sanngɛ i kwlaa yoli o, ɔ fata kɛ awlobo wunmuan’n koko lika nga sran oke’n trán’n i su yalɛ. I liɛ’n, sɛ sa’n tɔ cinnjin’n, bé wún i trawlɛ ndɛndɛ.

7, 8. ?Ninnge benin mun yɛ ɔ fata kɛ siɛ nin niɛn mun, ɔ nin be mma’m be koko be su yalɛ ɔ? ?Ngue ti ɔ?

⁷ Siɛ nin niɛn mun, kɛ amun nin amun mma’m bé kókó wafa nga bé nían amun lika’n i su yalɛ’n, amun kan amun klun ndɛ weinwein. Yɛle kɛ amun kan sika nga amun le i’n, ɔ nin like nga amun klo kɛ be yo man amun’n be ndɛ. I liɛ’n, sɛ cɛn wie lele amun wunman sa wlɛ naan amun a fa ajalɛ’n, ba’m bé kwlá yó like ng’ɔ ti amun klun su’n. Be ɲin m’ɔ yi amun ti’n, like ng’ɔ ti amun klun su mɔ be kwla yo’n, be mían be ɲin bé yó. (Efɛ. 6:2-4) ?Amun kunndɛ kɛ amún kó trán ba’m be nun kun i bo wun? ?Annzɛ kusu’n, amun kunndɛ kɛ be yo like uflɛ? Sɛ blɛ sɔ’n nun’n ba’m be kle ajalɛ wie’n, nán amun se kɛ saan fii amun liɛ’n su yɛ ɔ ka ɔ. Maan amun wun i wlɛ kɛ nán cɛn ngba yɛ awlobo’n i nuan kwla ka lɛ sɛ ajalɛ kun su ɔ. Wie liɛ’n, lele mɔ bé nuan sɛ́ be wun’n, i sɔ’n fa blɛ.

⁸ Sɛ amun nin amun mma’m be dun mmua koko amun afiɛn yalɛ’n, amún wún sa kekle sunman be trawlɛ. (Nya. 15:22) Ayre nga amun klo kɛ be fa yo amun’n, amun nin be koko i su yalɛ. Amun nin be koko ndɛ nga be o fluwa DPA su’n, i su yalɛ wie. Fluwa sɔ’n su’n, sran kun bɔbɔ kle ayre yolɛ wafa ng’ɔ klo kɛ be fa yo i annzɛ nán be fa yo i’n. An kle sran nga sɛ sanvuɛsa ɲan amun naan amun kwlá ijɔman’n, ɔ́ íjɔ amun nuan’n. Maan sran sɔ’n, ɔ nin sran ng’ɔ nian amun lika’n, ɔ nin amun bɔbɔ an ci fluwa sɔ’n i foto be sie. Sran oke wie’m be fa fluwa sɔ’n be sie i lika nga be sie be asiransi fluwa’n, ɔ nin fluwa cinnjin uflɛ wie mun lɛ’n.

MAAN E WUN SA’M BE TRAWLƐ

9, 10. ?Blɛ benin yɛ sran oke’n kwla mian ukalɛ wun kpa ɔ?

⁹ Wie liɛ’n, sran oke’n kwla yo i bɔbɔ i ninnge mun. Yɛle kɛ ɔ kwla tɔn i aliɛ, ɔ kwla cuɛncuɛn i awlo’n nun, ɔ kwla nɔn i ayre mma mun. Annzɛ ɔ kwla yo ninnge wie mun ekun. I lɛ nun’n, ba’m be kwla yaci i naan ɔ yo i bɔbɔ i ninnge mun. Sanngɛ kɛ ɔ́ kɔ́ i ɲrun’n, be kwla wun kɛ be si annzɛ be nin oke’n ɔ kwlá nantiman kun naan se kɛ ɔ́ kó dí gua. Annzɛ kusu’n, be kwla wun kɛ i wla fi ninnge’m be su ndɛndɛ. Kɛ ɔ yo sɔ’n, be kwla fa ajalɛ wie mun naan b’a niɛn i lika.

¹⁰ Sran oke wie’m be wunman sa wlɛ kun. Be akunndan’n sanngan, be timan sa kpa, be wunman ase kpa, yɛ be kaci awlafiɛ. Wie liɛ bɔbɔ’n, be ngunmin be kwlá kɔman abialiɛ annzɛ atin nun. Kɛ e wun kɛ i sɔ sa’n su yo e sran oke’n, maan e kunndɛ ayre e yo i, maan e fɛ i wɔ dɔɔtrɔ ndɛndɛ. Sɛ ɔ fata kɛ ɔ wɔ dɔɔtrɔ kpɛ sunman’n, maan e fɛ i e wɔ. Sɛ kusu ɔ fata kɛ e yo ninnge wie mun e mɛn i’n, maan e yo be. I wie yɛle kɛ e kwla ijɔ i nuan, annzɛ e klɛ i fluwa mun. Sɛ ɔ fata kɛ ɔ tu ajalɛ’n, e kwla fɛ i loto nun.​—Nya. 3:27.

11. ?Ngue yɛ ba’m be kwla yo naan be si annzɛ be nin oke’n i wun w’a yo i fɛ ɔ?

¹¹ Ba mun, sɛ amun si annzɛ amun nin oke’n tɔ tukpacɛ naan ɔ timan le nɲɔn kun like’n, amun kwla kaci ninnge wie’m be yolɛ naan amun a niɛn i lika. Annzɛ kusu’n, an kwla yo ninnge wie mun i awlo lɔ mɛn i. Atrɛkpa’n, like kaan sa yɛ ɔ fata kɛ amun yo naan w’a wun i wun fɛ ɔ. Sɛ amun tran amun sran oke’n i wun mmua’n, amun kwla se amun niaan Zoova i Lalofuɛ wie annzɛ sran oke’n i mantanfuɛ wie kɛ ɔ ko niɛn i osu titi man amun. I liɛ’n, wafa nga amun sran oke’n i wun fa ti’n, ɔ́ kán klé amun. ?Sran yɛ ɔ miɛn i wun kɛ ɔ tɔn like mɛn i, annzɛ ɔ cuɛncuɛn i awlo’n nun ɔn? ?Ɔ fata kɛ be kaci i sua’n nun ninnge wie mun naan w’a kwla ko wunnzin, annzɛ w’a kwla yo ninnge uflɛ wie mun? Wie liɛ’n, like nga sran oke’n kunndɛ’n yɛle kɛ be fa sran naan ɔ di i awlo nun junman’n. Sanngɛ sɛ ɔ kwlá trɛnmɛn i ngunmin’n, ba’m be kwla fa sran kɛ ɔ ko trɛn i wun lɔ titi. I kwlaa yoli o, wafa nga sran oke’n fa ti’n, an nian su fa ajalɛ ng’ɔ nin i fata’n.b​—An kanngan Nyanndra Mun 21:5 nun.

LIKE NGA ANIAAN WIE’M BE YO’N

12, 13. ?Ngue yɛ ba wie’m be yo naan b’a nian be si annzɛ be nin oke’n i lika ɔ?

¹² E klo e si nin e nin mun. I sɔ’n ti’n, e kunndɛ kɛ be wun yo be fɛ. Nanwlɛ, kɛ e nian be lika kɛ ng’ɔ nin fata’n sa’n, e wla gua ase dan. Sa wie’m be ti’n, ba sunman be tran be si nin be nin’m be wun mmua. Sanngɛ kɛ be ɲan blɛ kan, ɔ nin i su alaje’n, be ko nian be si nin be nin’m be osu. Kpɛkun, be uka be naan b’a yo ninnge wie mɔ be ngunmin be kwlá yoman’n. Ba wie’m be liɛ’n, be flɛ be si annzɛ be nin oke’n telefɔnu nun tikatika annzɛ be klɛ be fluwa. Be yo sɔ naan be si annzɛ be nin oke’n, ɔ wun i wlɛ kɛ be klo i.​—Nya. 23:24, 25.

¹³ Sɛ amun tran amun si annzɛ amun nin oke’n i wun mmua’n, ɔ fata kɛ amun si like ng’ɔ kwla miɛn i sa cɛn kwlaa’n. I lɛ nun’n, sɛ amun si annzɛ amun nin’n ti Zoova i Lalofuɛ’n, amun nin i asɔnun kpɛnngbɛn’m be koko yalɛ naan amun usa be ngwlɛlɛ afɛ. Like ng’ɔ ti cinnjin kpafuɛ’n yɛle kɛ, amun fa sa’n be wlɛ i Zoova sa nun. (An kanngan Nyanndra Mun 11:14 nun.) Sɛ bɔbɔ be timan Zoova i Lalofuɛ’n, an fa afɔtuɛ nga Ɲanmiɛn Ndɛ’n man’n su. Ɔ se kɛ: “Bu ɔ si nin ɔ nin be sran.” (Tul. 20:12; Nya. 23:22) Awlobo ngba su kwlá faman ajalɛ kunngba’n. Awlobo wie’m be nun’n, ba’m be nin be si annzɛ be nin oke’n be tran likawlɛ. Annzɛ be fa be sran oke’n ko tran be wun koko. Sanngɛ wie liɛ’n, i sɔ’n yoman ye. Yɛle kɛ, siɛ nin niɛn wie’m be kloman kɛ bé trán be mma’m be bo wun naan bé klé be yalɛ. Be kunndɛ kɛ bé yó be bɔbɔ be ninnge mun. Sran oke wie’m be kusu be sa nun yo fɛ. Ɔ maan, be kunndɛ kɛ bé ká be tranwlɛ lɛ naan bé fá sran kɛ ɔ nian be lika.​—Aku. 7:12.

14. ?Sa benin yɛ ɔ kwla ju ba nga be fali be si annzɛ be nin’n i lika nianlɛ’n wlɛli i sa nun’n, i su ɔ?

¹⁴ Awlobo wie’m be nun’n, ba ng’ɔ tran siɛ nin niɛn’m be wun koko’n, i yɛ ɔ fa blɛ kpanngban nian be lika ɔ. Sanngɛ kɛ ɔ́ yó sɔ’n, ɔ fata kɛ ɔ yo ngwlɛlɛfuɛ naan i ɲin w’a kpaman i bɔbɔ i awlobo liɛ’n su. Ɔ le sran kun i blɛ ɔ nin like nga i wunmiɛn’n ju nun ɔn. Ɔ maan, sɛ sran ng’ɔ nian sran oke’n i lika’n ɔ kwlá yoman ninnge wie mun kun’n, awlobo’n kwla bu i akunndan fa ajalɛ uflɛ. Wienun ɔn, sran oke’n i wun junman’n sɔnnin yɛ ɔ tin i lika nianfuɛ’n su. Sɛ ɔ ti sɔ’n, ba’m be nuan kwla sɛ be wun naan sran oke’n i lika nianlɛ’n ɔ to be, ɔ to be.

15. ?Ngue yɛ be kwla yo naan junman’n w’a tinman sran oke’n i lika nianfuɛ’n i su ɔ?

¹⁵ Kɛ sran oke’n i wun ninnge yolɛ’n sɔnnin’n, ɔ cɛman naan sran ng’ɔ niɛn i lika’n w’a fɛ ndɛndɛ. (Aku. 4:6) Klolɛ mɔ ba wie’m be klo be si nin be nin mun’n ti’n, be klo kɛ bé nían be lika kpa. Sanngɛ wie liɛ’n, ninnge’m be yolɛ’n tra be kpɛn. Kɛ ɔ yo sɔ’n, ɔ fata kɛ be yo ngwlɛlɛfuɛ naan be kunndɛ ukafuɛ. Sɛ ɔ nin i fata’n, be kwla se be sran kpa wie kɛ ɔ wa uka be cɛn kunngun.

16, 17. ?Akunndan benin yɛ ba ng’ɔ nian i si annzɛ i nin oke’n i lika’n ɔ kwla bu m’ɔ kle i yalɛ ɔ? ?Ngue yɛ ɔ kwla yo naan i wla w’a gua ase ɔ? (An nian kuku nga be flɛ i “Aniaan kun mɔ i si nin i nin be lika nianlɛ’n yo i fɛ’n” i nun.)

¹⁶ Kɛ ba’m be wun afɛ ng’ɔ o be si annzɛ be nin oke’n i su’n, nanwlɛ, i sɔ’n yo be ya kpa. Wie liɛ’n, sran ng’ɔ nian sran oke’n i lika’n i wla kwla bo i wun. Ɔ kwla se i klun lɔ kɛ ɔ yoman ninnge mun kɛ ng’ɔ nin i fata’n sa. Wie liɛ kusu’n, sran oke’n kwla kan ndɛ yaya wie. Annzɛ ɔ kwla yo sa wie m’ɔ kle kɛ ɔ siman ye ɔ. Sɛ i sɔ sa’n ju amun su’n, nán amun fa ya ndɛndɛ. Dɔɔtrɔfuɛ kun seli kɛ sɛ sa wie ti’n, sran kun fa ya annzɛ i wla guaman ase’n, nán ɔ se kɛ i sɔ’n timan su. Yɛ nán ɔ se i klun lɔ kɛ ɔ timan sran kpa. Wafa nga sa’n yo amun’n, amun bo su kle amun wun’n annzɛ amun yi’n. Annzɛ kusu an bo su kle amun osufuɛ kun, annzɛ amun janvuɛ kpa kun. I sɔ yalɛ kokolɛ’n kwla uka amun naan amun wla w’a gua ase.

¹⁷ Kɛ ɔ́ kɔ́ i ɲrun’n, wie liɛ’n, ba’m be kwlá nianman be sran oke’n i lika kɛ ɔ nin i fata’n sa kun. I lɛ nun’n, be kwla fa ajalɛ uflɛ naan sran wie w’a niɛn i lika kpa dɔ kwlaa su. Nvle wie’m be nun’n, ɔ le sran oke’m be lika nianlɛ lika. Aniaan bla kun fɛli i nin oke’n ko sieli i lika sɔ’n nun. Kpɛkun, ɔ ko niɛn i osu cɛn kwlaa. I waan: “Blɛ wie juli’n, e kwlá nianman e nin’n i lika kpa kun. Kusu’n, kɛ ɔ yo naan e fɛ i ko sie sran oke’m be lika nianwlɛ lɔ’n, ɔ yoli kekle kpa mannin e. Sanngɛ y’a ɲɛnmɛn i yowlɛ. Like ng’ɔ fata kɛ e yo e man e nin’n i nguan cɛn kan m’ɔ ka nun’n, yɛ ɔ o lɛ ɔ. Ɔ maan, i kusu kplinnin su.”

18. ?Ba nga be nian be si annzɛ be nin oke’m be lika’n, wafa sɛ yɛ i bo gua man be ɔ?

¹⁸ Siɛ annzɛ niɛn oke’m be lika nianlɛ’n, ɔ leman ba. Kusu’n, ajalɛ nga awlobo kun nunfuɛ’m be kwla fa’n, nɛ́n i kunngba’n yɛ awlobo uflɛ kwla fa ɔ. Sanngɛ sɛ awlobo’m be buabua be wun kpa’n, be koko be afiɛn yalɛ kpɛkun be srɛ Zoova, bé kwlá nían be sran oke’n i lika kpa. Sɛ amun yo sɔ’n, amun ɲin su guaman ase. Afin like ng’ɔ fata kɛ amun yo’n, yɛ amun yo ɔ. (An kanngan 1 Korɛntfuɛ Mun 13:4-8 nun.) Sanngɛ i cinnjin kpafuɛ’n, yɛle kɛ amún wla gúa ase yɛ Zoova yrá amun su.​—Fil. 4:7.

[Ja ngua lɛ ndɛ mun]

[Kuku, bue 26]

ANIAAN KUN MƆ I SI NIN I NIN BE LIKA NIANLƐ’N YO I FƐ’N

Aniaan bla kun i nin’n ti tukpacifuɛ. Tukpacɛ sɔ’n ti’n, i nin’n wunman sa wlɛ kun. Ɔ nin i niaan bla nsan’n be nian be si oke’n, ɔ nin be nin tukpacifuɛ’n be lika. Kɛ aniaan bla’n fɛ i i tranwlɛ lɔ loto nun lele m’ɔ́ fá jú be si nin be nin’n be wun lɔ’n, ɔ ti dɔ nnan. Aniaan bla sɔ’n waan: “Zezi seli kɛ: ‘Nán an koko ainman liɛ’n, afin ainman bɔbɔ yɛ ɔ́ kúnndɛ i wun like-ɔ. Cɛn ba kun nun afɛ’n ɔ ju cɛn sɔ’n nun.’ M ma wunnin kɛ ndɛ sɔ’n ti nanwlɛ. E nin’n i tukpacɛ’n leman ayre. Ɔ maan, like nga e kwla yo naan baba nin mannin be wla w’a gua ase’n, yɛ e mian e ɲin e yo ɔ. Be niannin e lika kpa. Kɛ n kusu n nian be lika wie’n, ɔ yo min fɛ.” Nanwlɛ, i ayeliɛ sɔ’n jɔ Zoova klun.​—Mat. 6:34; Jue. 68:20.