Kɛ é bó jasin fɛ’n maan e yo sran’m be kpa
“Like kwlaa nga an klo kɛ sran yo man amun’n, an yo i kunngba sɔ’n man be.”—MAT. 7:12.
?WAFA SƐ YƐ AMÚN TƐ́ SU Ɔ?
?Kɛ é bó jasin fɛ’n, wafa sɛ yɛ ɔ fata kɛ e yo sran’m be kwlaa ɔ?
?Kɛ é bó jasin fɛ’n, wafa sɛ yɛ e kwla nanti ndɛ ng’ɔ o Matie 7:12 nun’n i su ɔ?
?Like suanlɛ nga nun’n, afɔtuɛ benin yɛ amun sunnzun kɛ amún fá su bé bó jasin fɛ’n niɔn?
1. ?Kɛ é bó jasin fɛ’n mɔ e yo sran’m be kpa’n, wafa sɛ yɛ i bo gua ɔ? An fa sa kun yiyi nun. (An nian foto ng’ɔ o kan like suanlɛ’n bo i bo lɛ’n.)
BE FLƐ abloki lɔ klɔ kun mɔ nzue bo sin yiɛ i’n kɛ Fiji. Cɛn kun mɔ lɔ jasin bofuɛ kun nin i yi’n bé yía sran mun kɛ be bla Klist i wie cɛn dilɛ aɲia’n i bo’n, be nin bla kun be yiali. Kɛ bé bó jasin fɛ’n klé i’n, kpɛkun nzue w’a bo tɔlɛ bo. Katawia m’ɔ o be sa nun’n, be fali kun mannin bla’n naan ɔ fa kɛtɛ i ti. Ye sɔ mɔ be yoli bla’n, ɔ jɔli i klun. Ɔ maan, ɔ bali aɲia’n i bo. Nanwlɛ, jasin bofuɛ’n nin i yi’n be nantili ndɛ nga Zezi kɛnnin i Matie 7:12 nun’n su.
2. ?Ndɛ benin yɛ Zezi kɛnnin i Matie 7:12 nun ɔn? ?Wafa sɛ yɛ e kwla nanti ndɛ sɔ’n su ɔ?
2 Matie 7:12 nun’n, Zezi seli kɛ: “Like kwlaa nga an klo kɛ sran yo man amun’n, an yo i kunngba sɔ’n man be.” ?Wafa sɛ yɛ e kwla nanti ndɛ sɔ’n su ɔ? Kɛ ɔ ko yo naan y’a wun i wlɛ’n, ɔ fata kɛ e tinuntinun e usa e wun kɛ: “?Ngue yɛ n klo kɛ sran uflɛ yo man min ɔn?” Kɛ e ko wun i wlɛ’n, maan e mian e ɲin e yo like kunngba’n e man e wiengu mun.—1 Kor. 10:24.
3, 4. (a) ?E niaan Klistfuɛ’m be ngunmin yɛ ɔ fata kɛ e yo be kpa ɔ? An yiyi nun. (b) ?Ngue yɛ like suanlɛ nga wá fá e ɲin síe su ɔ?
3 Titi’n, e yo e niaan Klistfuɛ’m be ye. Sanngɛ, Zezi w’a seman kɛ be ngunmin yɛ e yo be kpa ɔ. Ɔ seli kɛ be nga be ti e kpɔfuɛ bɔbɔ’n, maan e yo be ye wie. (An kanngan Lik 6:27, 28, 31, 35 nun.) ?Sɛ ɔ ti cinnjin kɛ e yo e kpɔfuɛ’m be kpa’n, be nga e bo jasin fɛ’n e kle be mɔ be ti ‘sran kpa’n,’ yɛ e su yoman be kpa ɔ?—Mat. 10: 11.
4 Kɛ é bó jasin’n, maan e usa e wun kosan cinnjin nnan yɛ mun. ?Wan yɛ n su bo jasin fɛ’n ń klé i ɔ? ?Nin yɛ n su bo jasin fɛ’n niɔn? ?Blɛ benin nun yɛ n su bo jasin fɛ’n niɔn? ?Wafa sɛ yɛ ɔ fata kɛ m bo jasin’n fɛ’n niɔn? Ɔ fata kɛ e bu i kwlaa sɔ’n i akunndan. I liɛ’n, é yó like ng’ɔ ti su’n. I sɔ’n ti’n, like suanlɛ nga wá fá e ɲin síe kosan cinnjin sɔ’m be su.—1 Kor. 9:19-23.
?WAN YƐ N SU BO JASIN FƐ’N Ń KLÉ I Ɔ?
5. ?Kosan benin yɛ ɔ fata kɛ e tinuntinun e fa usa e wun ɔn?
5 Kɛ é bó jasin’n, e to sran fanunfanun. Yɛ ɔ le sran kun nin i su sa. (2 Nyo. 6:29) I sɔ’n ti’n, maan e tinuntinun e usa e wun kosan nga mun: ‘?Sɛ min yɛ sran’n wa toli min’n, wafa sɛ yɛ ń kúnndɛ kɛ ɔ yo min ɔn? ?Ń kúnndɛ kɛ ɔ bu min fɔ kwlaa naan w’a si sran wafa nga n ti’n? Saan ń kúnndɛ kɛ ɔ dun mmua si sran wafa nga n ti’n.’ Sɛ e akunndan trɛn i sɔ’n su titi’n, like nga e kunndɛ kɛ sran’m be yo man e’n i kunngba’n yɛ é yó mán be ɔ.
6, 7. ?Kɛ é bó jasin fɛ’n, sɛ e to sran kun naan ɔ kan e ndɛ tɛtɛ’n, ngue yɛ ɔ fata kɛ e yo ɔ?
6 E mɔ e ti Klistfuɛ’n, e mian e ɲin naan kɛ nga Ɲanmiɛn Ndɛ’n fa kan’n sa’n, e “ijɔlɛ wafa’n yo sran’m be fɛ.” (Kol. 4:6) Sanngɛ fɔ m’ɔ o e nun’n ti’n, e nuan fite tɛtɛ cɛn kunngun. (Zak 3:2) Kɛ i sɔ sa ju’n, e kunndɛman kɛ sran nga e loli i ngasi’n, ɔ bu i kɛ e ti “sran tɛfuɛ.” Sanngɛ, e kunndɛ kɛ ɔ si e aunnvuɛ naan ɔ yaci sa’n cɛ e. E kusu kɛ é bó jasin fɛ’n, sɛ sran’m be kan e ndɛ tɛtɛ’n, maan e yaci e cɛ be. Afin kɛ ɔ́ kɔ́ i ɲrun’n, ndɛ nga be kannin’n kwla yo be nsisɔ.
7 ?Kɛ é bó jasin fɛ’n, sɛ e to sran kun naan ɔ kan e ndɛ tɛtɛ’n, ngue yɛ ɔ fata kɛ e yo ɔ? Maan e si i aunnvuɛ e yaci e cɛ i. Afin atrɛkpa’n, i junman su lɔ annzɛ suklu lɔ’n, ɔ wunmɛn i wun fɛ. Wie kusu ɔ, tukpacɛ wie kle i yalɛ. I kwlaa yoli o, maan e yo sran’m be kpa. Afin sran wie’m be yoli Zoova i Lalofuɛ’m be tɛtɛ. Sanngɛ, kɛ aniaan’m be buli be sran’n ti’n, be kacili.—Nya. 15:1; 1 Piɛ. 3:15.
8. ?Ngue ti yɛ ɔ fata kɛ e bo jasin fɛ’n e kle “sran wafa’n kwlaa” ɔ?
8 E bo jasin fɛ’n e kle sran wafa’n kwlaa. Afuɛ wie mɔ be sinnin nun’n, fluwa Sasafuɛ Tranwlɛ’n i nun ndɛ akpasua kun (La Bible transforme des vies) kannin sran 60 tra su be ndɛ. Laa’n, sran sɔ’m be nun wie’m be ti awiefuɛ, wie’m be ti nzan nɔnfuɛ, wie’m be ti nzaje sa yofuɛ, yɛ wie mun ekun be ti drɔgi nɔnfuɛ. Wie’m be liɛ’n, be ti politikifuɛ. Wie mun ekun be ti Ɲanmiɛn sulɛ wafa wie’m be su kpɛn. Yɛ wie’m be junman’n i dilɛ ngunmin yɛ ɔ ti be cinnjin ɔn. Wie mun kusu’n, be si tekle. Sanngɛ, kɛ be suannin Biblu’n nun like’n be kacili be nzuɛn’n. I sɔ’n ti, nán e bu i kɛ sran wie’m be liɛ’n, be kwlá sɔman jasin fɛ’n nun le. (An kanngan 1 Korɛntfuɛ Mun 6:9-11 nun.) Sanngɛ, maan e bo jasin fɛ’n e kle “sran wafa’n kwlaa.”—1 Kor. 9:22.
?NIN YƐ N SU BO JASIN FƐ’N NIƆN?
9. ?Kɛ é bó jasin fɛ’n, ngue ti yɛ ɔ fata kɛ e bu sran’m be tranwlɛ’n i like ɔ?
9 Blɛ sunman’n, awloawlo be nun yɛ e bo jasin fɛ’n niɔn. (Mat. 10:11-13) Kɛ sran’m be wlu e awlo nun’n, e kunndɛ kɛ be yo ninnge mun cɛcɛ. Afin e kunndɛ kɛ e awlo’n nun yo yɛiinyɛiin. Yɛ e kunndɛ kɛ e wla gua ase e awlo lɔ. E kusu kɛ é bó jasin fɛ’n, maan e bu sran’m be tranwlɛ’n i like.—Yol. 5:42.
10. ?Ngue yɛ é yó naan kɛ é bó jasin fɛ’n, sran’m b’a faman e wun ya ɔ?
10 Andɛ mɛn nga nun’n, sa tɛ yolɛ’n w’a kaci sran’m be nzuɛn. Ɔ maan, sran sunman be sisi be bo naan b’a sɔ sran nga be simɛn i’n i nun. (2 Tim. 3:1-5) I sɔ’n ti, kɛ e ju sran’m be awlo’n i ɲrun’n, nán e yo sa wie mɔ maan bé bú i kɛ e ti awiefuɛ annzɛ sa tɛ yofuɛ ɔ. Wienun ɔn, y’a bobo sran’n i anuan’n, kpɛkun sran fi tikeman. Kɛ ɔ yo sɔ wie liɛ’n, e tinndin e ti sran’n i fenɛtri nun, annzɛ e bo sin yia awlo’n naan é nían sɛ sran wie o lɛ o. (Yol. 10:42) Kɛ e kunndɛ kɛ é bó jasin fɛ’n é klé sran mun’n, i su ɔ. (Rɔm. 1:14, 15) Sanngɛ, maan e fa akunndan e nanti. Nán e yo naan sran’m be fa e wun ya. Akoto Pɔlu seli kɛ: “E klo-man kɛ sran fi kan e junman’n i wun ndɛ, i sɔ’n ti’n, e yo-man sa fi b’ɔ saci sran ti nun-ɔn.” (2 Kor. 6:3) Kɛ sran’m be wun kɛ e bu be tranwlɛ’n i like’n, ɔ yo be fɛ. Ɔ maan, be kwla sie be su jasin fɛ’n i bo.—An kanngan 1 Piɛr 2:12 nun.
?BLƐ BENIN NUN YƐ N SU BO JASIN FƐ’N NIƆN?
11. ?Ngue ti yɛ e kunndɛ kɛ sran’m be bu e blɛ’n i akunndan ɔn?
11 Klistfuɛ kwlaa i su junman’n sɔnnin. Kɛ ɔ ko yo naan y’a kwla yo e ninnge mun ti’n, e sie like kun nin i yolɛ blɛ. (Efɛ. 5:16; Fil. 1:10) Kpɛkun e kunndɛman kɛ sran tanndan e ɲrun, annzɛ ɔ saci e blɛ’n. I wie yɛle kɛ sɛ e sa o like nun naan sran wie ba e wun wunlɛ’n, e kunndɛman kɛ ɔ cɛ ngboko. I sɔ mɔ e kunndɛ kɛ sran’m be yo man e’n, kɛ é bó jasin fɛ’n, maan e yo man be wie.
12. ?Ngue yɛ ɔ fata kɛ e dun mmua bu i akunndan naan y’a ɔ jasin fɛ’n i bolɛ ɔ?
12 Blɛ nga i nun yɛ e kwla to sran’m be awlo lɔ’n, ɔ fata kɛ e si i sɔ blɛ’n. ?E akpasua liɛ nun’n, blɛ benin nun yɛ sran’m be o be awlo ɔ? ?Blɛ benin nun yɛ e wun kɛ be sɔ e nun ɔn? Ɔ fata kɛ e bu i kwlaa sɔ’n i akunndan naan y’a ɔ jasin fɛ’n i bolɛ. Lika wie nun’n, nnɔsua flɔlɔ yɛ sran’m be o be awlo ɔ. Kɛ aniaan’m be fɛ i sɔ blɛ’n be bo jasin fɛ’n, sran’m be sie be su be nuan bo kpa. Sɛ nnɔsua nun wie yɛ e kwla to sran mun’n, maan e fɛ i sɔ blɛ’n e bo jasin fɛ’n awloawlo’m be nun. (An kanngan 1 Korɛntfuɛ Mun 10:24 nun.) Maan e mian e ɲin e bo jasin fɛ’n blɛ nga i nun yɛ e kwla to sran mun’n. Sɛ e yo sɔ’n, Zoova yrá e su dan.
13. ?Kɛ sran kun sɔ e nun’n, wafa sɛ yɛ e kwla kle kɛ e bu i sran ɔn?
13 ?Sɛ sran kun sɔ e nun’n, wafa sɛ yɛ e kwla kle kɛ e bu i sran ɔn? Nán e ijɔ lele naan e wun flɛn i. Afin atrɛkpa’n, i like cinnjin wie o lɛ mɔ i waan ɔ́ yó ɔ. Sɛ kusu ɔ se kɛ ɔ ɲɛnmɛn i ti’n, maan e se i kɛ e su cɛman ngboko. Kpɛkun, maan e yo sɔ sakpa. (Mat. 5:37) I sin’n, maan e nuan sɛ blɛ nga e kwla sa e sin cɛn uflɛ’n i su. I lɛ nun’n, jasin bofuɛ wie’m be se kɛ: “N klo kɛ ḿ bá ɔ wun cɛn uflɛ. ?A kunndɛ kɛ n dun mmua n flɛ ɔ naan m’an ba?” Kɛ sran’m be ɲanman be ti mɔ e bu be sran kɛ ngalɛ’n sa’n, e nian Pɔlu i ayeliɛ’n su. Ɔ seli kɛ: “M bu-man m bɔbɔ min wun akunndan sanngɛ kɛ ɔ́ yó naan be kpanngban lika b’a nyan be ti’n i akunndan’n yɛ m bu-ɔ.”—1 Kor. 10:33.
?WAFA SƐ YƐ Ɔ FATA KƐ M BO JASIN’N FƐ’N NIƆN?
14-16. (a) ?Sɛ sran kun sɔ e nun’n, ngue yɛ ɔ fata kɛ e yo ɔ? An fa sa kun yiyi nun. (b) ?Ngue yɛ akpasua sunianfuɛ kun yo m’ɔ ti kpa ɔ?
14 Maan e se kɛ sran kun w’a flɛ e telefɔnu nun. Ɔ bomɛn i dunman, kpɛkun ɔ usa e kɛ: “?Aliɛ benin yɛ a klo i ɔ?” I sɔ’n bó e nuan. Afin e siman sran ng’ɔ flɛ e’n. Yɛ e siman like nga ti yɛ ɔ usa e kosan sɔ’n. Ɔ maan atrɛkpa’n, e kwla tɛ i su kan. E su kokoman yalɛ lele. ?Yɛ sɛ sran’n bo i dunman’n, ɔ bo lika ng’ɔ di junman’n, kpɛkun ɔ yiyi sa nga ti yɛ ɔ flɛ e’n i nun nin? ?Ngue yɛ é yó ɔ? Saan é tɛ́ i su klanman. Kɛ e siman sran kun laa’n, sɛ ɔ to e naan ɔ bo i dunman kle e naan w’a fa yalɛ kokolɛ w’a man e’n, i sɔ’n yo e fɛ. Kɛ é bó jasin fɛ’n mɔ e to sran mun’n, maan e yo sɔ wie.
15 Nvle wie’m be nun’n, kɛ jasin bofuɛ’n to sran kun’n, ɔ fata kɛ ɔ kan sa nga ti yɛ ɔ bali’n i ndɛ trele. E kunndɛ kɛ é klé sran’m be like. Sanngɛ kɛ e to sran’n, maan e dun mmua bo e dunman, yɛ e kan like nga ti yɛ e bali’n. Afin amun bɔbɔ amun nian. Sɛ e to sran kun naan e ka lɛ e usɛ i kɛ: “?Sɛ ɔ ti kɛ a kwla yo naan mɛn nun sa’m b’a wie’n, ngue yɛ á yó ɔ?” E kunndɛ kɛ ɔ tɛ su naan é yíyí Ɲanmiɛn Ndɛ’n nun é klé i. Sanngɛ sran’n kwla se i klun lɔ kɛ: ‘?Sran nga fin i liɛ nin m’ɔ ba min kosan usalɛ ɔ? ?Ngue li yɛ ɔ kunndɛ ɔ?’ Nanwlɛ, nán i sɔ yɛ ɔ fata kɛ e yo ɔ. Sanngɛ, maan e yo naan e wun yo sran’m be fɛ. (Fil. 2:3, 4) ?Wafa sɛ yɛ e kwla yo sɔ ɔ?
16 Like nga akpasua sunianfuɛ kun yo’n yɛ. Kɛ ɔ ko yo sran’n i like’n, ɔ bo i dunman. Kpɛkun, ɔ fa fluwa ?Amun kunndɛ kɛ amún sí ndɛ ng’ɔ ti nanwlɛ’n? kle sran’n. I sin’n, ɔ se i kɛ: “Andɛ’n, e fa fluwa nga e man sran kwlakwla. Ɔ tɛ kosan nsiɛn su. Ɔ liɛ yɛ.” Aniaan’n waan kɛ ɔ yo sɔ’n, ɔ wun kɛ sran’n i wla gua ase. Ɔ maan, yalɛ kokolɛ yo sran’n i fɛ. Ɔ se sran’n i ekun kɛ: “?W’a fa kosan sɔ’m be nun kun a usa ɔ wun le?” Sɛ sran’n ɔ kle kosan kun’n, aniaan’n nin i be koko su yalɛ. Kpɛkun, ɔ fa Ɲanmiɛn Ndɛ’n yiyi nun kpa. Sɛ sran’n w’a kleman kosan kun trele’n, aniaan’n klemɛn i yalɛ lele. I bɔbɔ fa sran’n i ɲin sie kosan kun su. Kpɛkun, be koko su yalɛ. I yo, ajalɛ kun yɛ aniaan’n kleli i lɛ ɔ. Lika wie’m be nun’n, be ti jasin lele yɛ be yo ninnge wie mun ekun kwlaa naan sran’n w’a kan ndɛ nga ti yɛ ɔ bali’n. I kwlaa yoli o, ndɛ nga é kán naan sran’n w’a sɔ e nun klanman’n yɛ ɔ fata kɛ e kan ɔn.
MAAN E YO SRAN’M BE KPA TITI
17. ?Kɛ é bó jasin fɛ’n, wafa sɛ yɛ e kwla nanti afɔtuɛ ng’ɔ o Matie 7:12 nun’n i su ɔ?
17 ?Kɛ é bó jasin fɛ’n, wafa sɛ yɛ e kwla nanti afɔtuɛ ng’ɔ o Matie 7:12 nun’n su ɔ? Maan e bu sran’m be kwlaa be sran. E bu be tranwlɛ’n i like dan. Yɛ maan e mian e ɲin e bu be blɛ’n i akunndan. Blɛ nga e kwla to be naan b’a sɔ e nun klanman’n, i nun yɛ e ko wun be wun ɔn. Kpɛkun, ndɛ nga é kán mɔ sran’m bé sɔ́ e nun klanman’n, yɛ e kan ɔn.
18. ?Kɛ like nga e klo kɛ sran’m be yo man e’n i kunngba’n yɛ e yo man be’n, wafa sɛ yɛ i bo gua ɔ?
18 Kɛ like nga e klo kɛ sran’m be yo man e’n i kunngba’n yɛ e yo man be’n, e kle kɛ e nanti Ɲanmiɛn Ndɛ’n su. Ɔ maan Ɲanmiɛn ɲan ɲrun. (Mat. 5:16) Asa ekun’n, sran kpanngban be kunndɛ kɛ bé sí ndɛ nanwlɛ’n. (1 Tim. 4:16) Sɛ sran’m be sɔ e nun annzɛ be sɔman e nun o, e klun jɔ. Afin e si kɛ e yoli like kwlaa nga e kwla yo’n. (2 Tim. 4:5) Maan e tinuntinun e nian akoto Pɔlu i ajalɛ’n su. Ɔ seli kɛ: “N yo i kwlaa sɔ’n jasin fɛ’n ti naan like kwlaa nga be nyɛn i jasin fɛ’n ti’n, n liɛ a tran nun wie.” (1 Kor. 9:23) I sɔ’n ti, kɛ é bó jasin fɛ’n, maan e yo sran’m be kpa titi.