Maan e uka sran mun naan be bu ndɛ sin
1. ?Jasin fɛ’n bolɛ nun’n, ajalɛ benin yɛ ɔ ti kpa ɔ?
1 ?E jasin fɛ’n bolɛ’n nun’n, ajalɛ benin yɛ ɔ ti kpa ɔ? ?Nga mɔ e se kɛ saan fii e ndɛ liɛ’n su yɛ sran’n fa ɔ? ?Annzɛ kusu nga mɔ e uka sran’n naan w’a bu akunndan naan w’a wun sa wlɛ’n niɔn? Kɛ Akoto Pɔlu kán ndɛ klé Tɛsaloniki lɔ Zuifu mun’n, ɔ ukali be naan b’a bu akunndan naan b’a wun sa wlɛ. Ɔ maan ‘be nun wie’m be kacili Ɲanmiɛn i sufuɛ.’ (Yol. 17:2-4) ?Sɛ e waan sran kun bu sa sin naan ɔ wun i wlɛ’n, ngue yɛ ɔ fata kɛ e yo ɔ?
2. ?Kɛ é bó jasin fɛ’n, wafa sɛ yɛ e kwla fa Pɔlu i ajalɛ’n su ɔ?
2 Wafa nga sran’m be bu sa mun’n ɔ nin sran’m be finwlɛ’n: Sɛ e kunndɛ kɛ é úka e jasin bowlɛ’n nun lɔ sran mun naan be bu sa sin’n, ɔ fata kɛ e fa e ɲin sie i wafa nga sran’m be bu sa mun’n i su. Kɛ areopazi lɔ’n, Pɔlu íjɔ Glɛki mɔ be suman Ɲanmiɛn’n be ɲrun’n, ɔ dun mmua kannin ninnge nga be lafi su’n i ndɛ. (Yol. 17:22-31) Ɔ maan kɛ é síesíe e wun é kó bó jasin fɛ’n, maan e bu ninnge nga sran’m be lafi su’n ɔ nin sa ng’ɔ kwla wɔ be safle’n, be akunndan. (1 Kor. 9:19-22) Sɛ e ndɛ tiefuɛ’n kan ndɛ wie kpalo e nuan’n, maan e kunndɛ ndɛ nga e nuan kwla sɛ su’n, naan e koko su yalɛ.
3. ?Wafa sɛ yɛ ngwlɛlɛ su kosan usalɛ’n kwla yo naan y’a uka sran mun naan b’a bu sa sin ɔn?
3 E usa kosan ngwlɛlɛ su: Sɛ sran kun su kɔ lika naan ɔ se e kɛ e kle i atin’n, sɛ e siman lika nga sran sɔ’n wo dɔ nga su’n, e su kwlá klemɛn i atin’n. I kunngba’n, sɛ e kunndɛ kɛ e ndɛ tiefuɛ’n wun i wlɛ kɛ e ndɛ’n ti nanwlɛ’n, ɔ nin i fata kɛ e si i klun akunndan’n. Kwlaa naan Zezi w’a tu ndɛ kun bo w’a kle sran mun’n, kpɛ sunman ɔ dun mmua usa be kosan naan w’a si be klun akunndan’n. Cɛn kun’n, sran kun usɛli i kɛ: “?Nguɛ yɛ ń yó naan m’an nyan anannganman nguan nin-ɔn?” Ka naan Zezi w’a tɛ i su’n, ɔ dun mmua kunndɛli kɛ ɔ́ sí sran sɔ’n i klun akunndan’n. (Lik 10:25-28) Blɛ wie nun mɔ Piɛli w’a tɛman kosan kun su kɛ ɔ nin i fata’n sa’n, Zezi usɛli i kosan ngwlɛlɛ su naan w’a kaci akunndan’n ng’ɔ bu i ndɛ sɔ’n su’n. (Mat. 17:24-26) Ɔ maan, sɛ sran kun usa e kosan annzɛ ɔ kan ndɛ wie m’ɔ timan su’n, e kwla usɛ i kosan naan w’a kwla bu ndɛ’n i sin.
4. ?Ngue ti yɛ ɔ nin i fata kɛ e mian e ɲin naan e uka sran mun naan be bu sa sin ɔn?
4 Kɛ e uka e ndɛ tiefuɛ mun naan b’a bu sa sin’n, e sɔnnzɔn Zezi m’ɔ ti Like Klefuɛ Danfuɛ’n ɔ nin Klistfuɛ klikli’m mɔ be si jasin bo kpa’n. Yɛ, e kle kɛ e bu e ndɛ tiefuɛ’m be sran. (1 Piɛ. 3:15) I sɔ mɔ e yo’n ti’n, be kwla kplin su kɛ cɛn uflɛ e sa e sin e ko nian be osu ekun naan e nin be e koko Ɲanmiɛn i ndɛ’n i su yalɛ.