Maan e bu be nga be leman wunmiɛn mun kɛ nga Zoova bu be’n sa

“E lika nga e bu i kɛ ɔ yo-man like fi’n, ɔ yo like.”​—1 KOR. 12:22.

?WAFA SƐ YƐ AMÚN TƐ́ SU Ɔ?

?Wafa sɛ yɛ Zoova bu be nga be ti kɛ be kwlá yoman like fi’n sa mun ɔn?

?Be nga be leman wunmiɛn’n, ngue yɛ é yó naan y’a kle kɛ e bu be kɛ nga Zoova bu be’n sa ɔ?

?Kɛ e uka be nga be leman wunmiɛn’n, wafa sɛ yɛ i bo gua ɔ?

1, 2. ?Ngue ti yɛ kɛ be se kɛ sran kun leman wunmiɛn’n, Pɔlu wunnin i wlɛ ɔ?

Ɔ JU cɛn wie’n, e wun faman e feke. E ti fakafaka. Ɔ maan, e kwlá yoman like nga e waan é yó’n. Kpɛkun é nían ɔn, wafa nga e wun fa yo e’n, ɔ su di cɛn nɲɔn cɛn nsan. ?I lɛ nun’n, wafa sɛ yɛ é kúnndɛ kɛ e wiengu’m be nin e tran ɔn? Nanwlɛ, saan é kúnndɛ kɛ be wun sa ng’ɔ o e su’n i wlɛ naan be si e aunnvuɛ.

² Kɛ be se kɛ sran kun leman wunmiɛn’n, i sɔ sa juli akoto Pɔlu su. Yɛle kɛ, be nga be timan Klistfuɛ’n be kleli i yalɛ. I niaan Klistfuɛ mun bɔbɔ b’a yacimɛn i diin wie. I kwlaa sɔ’n tili i kpa. I sɔ’n ti, blɛ wie nun’n i ɲin w’a tranman su kɛ ɔ́ kwlá dí i junman’n ekun. (2 Kor. 1:8; 7:5) Pɔlu i wla w’a fiman sa sɔ’n su. Ɔ maan, kɛ be se kɛ sran kun leman wunmiɛn’n, ɔ wun i wlɛ. Ɔ seli kɛ: “Sɛ sran kun lɛ-man wunmiɛn’n, n kusu n wun kɛ n lɛ-man wunmiɛn.” (2 Kor. 11:29) Asa ekun’n, ɔ fali asɔnun’n sunnzunnin klɔ sran wunnɛn. Yɛ ɔ seli kɛ: “E lika nga e bu i kɛ ɔ yo-man like fi’n, ɔ yo like.” (1 Kor. 12:22) ?Ngue ti yɛ Pɔlu kannin sɔ ɔ? ?Wafa sɛ yɛ Zoova bu be nga be ti kɛ be kwlá yoman like fi’n sa mun ɔn? ?Wafa sɛ yɛ e kwla bu be kɛ nga Zoova bu be’n sa ɔ? ?Sɛ e yo sɔ’n, wafa sɛ yɛ i bo gúa ɔ?

WAFA NGA ZOOVA BU BE NGA BE LEMAN WUNMIƐN’N

3. ?Ngue ti yɛ wie liɛ’n, e kwla bu e niaan ng’ɔ fata kɛ e uka be’n be wun akunndan tɛ ɔ?

³ Andɛ mɛn nga nun’n, gbanflɛn nin talua mɔ be le wunmiɛn’n, be yɛ sran’m be yi be ayɛ ɔ. Sran ng’ɔ ti kɛ ɔ kwlá yoman like fi sa’n, be bumɛn i wie. Sɛ y’a nianman e wun kpa’n, e kwla bu akunndan sɔ’n wie. Ɔ maan, e niaan ng’ɔ fata kɛ e uka be’n, e ɲin kwla kpa be su. ?Wafa sɛ yɛ e kwla bu aniaan’m be kwlaa kɛ nga Zoova bu be’n sa ɔ?

4, 5. (a) ?Ngue yɛ sunnzun ase nga Pɔlu fali’n, ɔ kle e Zoova su ɔ? (b) ?Kɛ e uka be nga be leman wunmiɛn’n, wafa sɛ yɛ i bo gua man e ɔ?

⁴ Zoova liɛ’n, i sufuɛ’m be kwlaa be ti i sran nanndoliɛ. Korɛntfuɛ Mun i fluwa klikli’n i ndɛ tre 12 nun’n, Pɔlu fali asɔnun’n sunnzunnin e wunnɛn’n. Kpɛkun, ɔ kleli kɛ e lika nga e bu i kɛ ɔ kwlaman like fi yo bɔbɔ’n, ɔ yo like. (An kanngan 1 Korɛntfuɛ Mun 12:12, 18, 21-23 nun.) Be nga be lafi su kɛ sran fi ndo’n, be nun wie’m be waan nán e wunnɛn’n i lika ngba yɛ ɔ ti cinnjin ɔn. I wie yɛle e ja mma kasiɛn’n. Be waan ɔ o lɛ sa ngbɛn.a Sanngɛ koko nun wa’n, fluwa sifuɛ’m be wa wunnin kɛ e ja mma kasiɛn’n di junman dan kpa. Afin e ja mma sɔ’n ti yɛ kɛ e jran nglo’n, e kwla jran trele ɔ.

⁵ Sunnzun ase nga Pɔlu fali’n kle kɛ Klistfuɛ’m be tinuntinun be ti Zoova i cinnjin. Satan kunndɛ kɛ e bu i kɛ e nunman sran’m be nun wie. Sanngɛ Zoova liɛ’n, i sufuɛ bɔbɔ nga e bu i kɛ be kwlaman like fi yo’n, “be yo like.” (Zɔb 4:18, 19) I sɔ’n kle kɛ like nga e tinuntinun e yo i asɔnun nun’n, ɔ ti cinnjin. Wienun ɔn, e nian asɔnun’n i nun sran oke kun lika. Kɛ e yo sɔ’n, ɔ yo aniaan oke’n i fɛ. Sanngɛ e bɔbɔ e ɲan su mmlusuɛ wie. Yɛle kɛ e tra e awlɛn, e klo e niaan mun, yɛ e klun jɔ. Kpɛkun, e yo kpa tra laa’n. (Efɛ. 4:15, 16) E niaan nga be le wunmiɛn o, nga be leman wunmiɛn o, Zoova kunndɛ kɛ e bu be kwlaa be sran. Sɛ e yo sɔ’n, é klé kɛ e like yolɛ yoman ya. Kpɛkun, fɔun trán asɔnun’n nun.

6. ?Ngue ti yɛ Pɔlu seli kɛ aniaan wie’m be “kwla-man like fi yo” ɔ? ?Ngue ti yɛ ɔ seli kɛ aniaan wie’m be liɛ’n “be wun sa wlɛ ɔ”?

⁶ Pɔlu seli kɛ asɔnun’n nun’n, aniaan wie’m be ‘kwlá yo-man like fi.’ Nán kɛ ɔ su se kɛ aniaan’m be ti sɔ sakpa ɔ. Be nga be timan Klistfuɛ’n, be yɛ be bu be bu i sɔ ɔ. I kpa bɔbɔ’n, Pɔlu kɛnnin i bɔbɔ wun ndɛ seli kɛ wie liɛ’n, ɔ yo i kɛ ɔ “kwla-man like fi yo” sa. (1 Kor. 1:26, 27; 2:3) Pɔlu seli ekun kɛ aniaan wie’m be ‘wun sa wlɛ kpa.’ I sɔ’n kleman kɛ aniaan wie’m be ti kpa tra wie mun. (Rɔm. 15:1) Sanngɛ, ɔ fata kɛ be mɔ be wun sa wlɛ’n be tra be awlɛn be uka be nga be wunman sa wlɛ kpa’n. I sɔ ndɛ yɛ Pɔlu su kan ɔn.

MAAN E BU E NIAAN’M BE WUN AKUNNDAN KPA

7. ?Ngue ti yɛ ɔ kwla yo kekle man e kɛ e uka be nga be leman wunmiɛn’n niɔn?

⁷ Zoova uka be nga be leman wunmiɛn’n. Kɛ e yo kɛ i sa’n, i klun jɔ e wun. (Jue. 41:2; Efɛ. 5:1) Sanngɛ wie liɛ’n, i sɔ yolɛ’n timan pɔpɔ. Afin e kwla se kɛ afɛ ng’ɔ o e niaan’n i su’n, ɔ ti i bɔbɔ i ndɛ. Annzɛ kusu e kwla se kɛ e faman e wun mɛntɛnmɛn i. Afin, e wunman ndɛ nga é kán naan y’a fɔnvɔ i’n. Be flɛ aniaan bla kun kɛ Sɛntia.b I wun’n yacili i. I waan: “Kɛ sa kekle tɔ ɔ su’n, sɛ aniaan’m be ukaman wɔ kɛ ng’ɔ nin i fata’n sa’n, i sɔ’n yo ya kpa. Afin kɛ sa tɔ sran kun su’n, ɔ kunndɛ kɛ be suɛn i bo.” I wie yɛle Famiɛn Davidi liɛ’n. Kɛ sa kekle tɔli i su’n, i janvuɛ’m be wanndili i. I sɔ’n yoli i ya kpa.​—Jue. 31:13.

8. ?Ngue yɛ é yó naan y’a si e niaan’m be aunnvuɛ ɔ?

⁸ Maan e bu sa ng’ɔ o e niaan’m be su’n i akunndan. I liɛ’n, é kwlá sí be aunnvuɛ. Wie’m be ti tukpacifuɛ. Wie’m be liɛ’n, be osufuɛ nga be timan Klistfuɛ’n be kle be yalɛ. Sɛ e bɔbɔ yɛ i sɔ sa’m be nun kun o e su’n, é kúnndɛ kɛ e niaan’m be uka e. ?Nɛ́n i ɔ? I nun mɔ Izraɛlifuɛ’m be o Ezipti lɔ’n, be dili yalɛ yɛ be wunnin ɲrɛnnɛn. I sɔ’n ti, kwlaa naan b’a wlu mɛn nga Ɲanmiɛn tali nda kɛ ɔ́ fá mán be’n i nun’n, ɔ seli be kɛ ‘nán be kete be anwlɛn’n.’ Sanngɛ, maan be bu yalɛfuɛ’m be sran naan be uka be.​—Mml. 15:7, 11; Sau. 25:35-38.

9. ?Sɛ sa wie ti e niaan kun leman wunmiɛn’n, ngue yɛ ɔ fata kɛ e yo ɔ? An fa sa kun yiyi nun.

⁹ Sɛ afɛ o e niaan kun su’n, nán maan e ka lɛ e se kɛ i bɔbɔ yɛ ɔ kunndɛli ɔ. Annzɛ nán e bu i wun akunndan tɛ. Sanngɛ, maan e ukɛ i. (Mml. 15:7, 11; Sau. 25:35-38) Maan e fa sunnzun ase kun. Wienun ɔn, sran wie o i moto su, ɔ su kɔ lika wie. Kpɛkun, w’a ko yo asidan. ?Kɛ be fɛ i kɔ dɔɔtrɔ’n, ngue yɛ dɔɔtrɔfuɛ’m bé yó ɔ? ?Bé sé kɛ bé sí sa nga ti yɛ ɔ yoli asidan’n, kwlaa naan b’a yo i ayre? Cɛcɛ. Sanngɛ, bé ká lɛ bé úkɛ i ndɛndɛ kpa. I sɔ kunngba’n, sɛ sa wie ti e niaan kun leman wunmiɛn’n, like cinnjin kpafuɛ ng’ɔ fata kɛ e yo’n, yɛle kɛ e ukɛ i.​—An kanngan 1 Tɛsalonikfuɛ Mun 5:14 nun.

10. ?Kannzɛ ɔ yo e kɛ aniaan wie’m be leman wunmiɛn’n, ngue yɛ ɔ kle kɛ ‘Ɲanmiɛn su mɔ be lafi ti’n, be ti aɲanbeunfuɛ’ ɔ?

¹⁰ Wie liɛ’n, e kwla bu i kɛ aniaan wie’m be kwlaman like fi yo. Sanngɛ, sɛ e fa e ɲin sie be su kpa’n, é wún kɛ be ti yakpafuɛ. Aniaan bla wie’m be wun’m be suman Zoova. I sɔ’n timan pɔpɔ manman be. Ɔ nin i sɔ ngba’n, be su Zoova nanwlɛ su. Wie’m be kusu’n, be ngunmin yɛ be ta be mma mun ɔn. Sanngɛ, be nin be mma’m be ba aɲia’m be bo titi. Gbanflɛn nin talua wie’m be kusu’n, be janvuɛ’m be kle be yalɛ suklu lɔ. Ɔ nin i sɔ ngba’n, be mian be ɲin be yo Zoova i klun sa titi. Nanwlɛ, sɛ e bu aniaan sɔ’m be klun mɔ be tu be su Zoova i akunndan’n, é wún i wlɛ kɛ be kusu be ti “anyanbeunfuɛ [Ɲanmiɛn] su bɔ be lafi’n ti.”​—Zak 2:5.

MAAN E BU E NIAAN MUN KƐ NGA ZOOVA BU BE’N SA

11, 12. (a) ?Ngue yɛ ɔ́ úka e naan y’a bu e niaan mun kɛ nga Zoova bu be’n sa ɔ? (b) ?Ngue ti yɛ Zoova yacili Aarɔn i sa tɛ’n cɛli i ɔ? ?Ngue yɛ i sɔ’n kle e ɔ?

¹¹ Fɔ o e niaan’m be nun wie. Ɔ nin i sɔ ngba’n, ɔ ti cinnjin kɛ e bu be kɛ nga Zoova bɔbɔ fa bu be’n sa. Biblu’n kle e wafa nga Zoova bu i sufuɛ mun’n. (An kanngan Jue Mun 130:3 nun.) I wie yɛle Aarɔn liɛ’n. Blɛ kun nun’n, ɔ fali sika ɔkwlɛ yili nannin ba kun naan Izraɛlifuɛ’m be sɔ i. I sin’n, ɔ kannin like nga ti yɛ ɔ yoli sɔ’n kleli Moizi. (Tul. 32:21-24) I sin m’ɔ́ lá nun kan’n, Aarɔn kunngba’n sieli i su i niaan bla Mali i nuan bo. Ɔ maan, ɔ nin i be kannin Moizi i wun ndɛ tɛtɛ nvle uflɛ nun bla m’ɔ jɛli i’n ti. (Kal. 12:1, 2) Blɛ wie nun ekun’n, Zoova maan Aarɔn nin Moizi be yoli maan nzue fin yɛbuɛ kun nun fiteli. Sanngɛ, b’a manmanman Zoova. ?Sɛ i blɛ sɔ’n nun e o lɛ’n, wafa sɛ yɛ é bú Aarɔn ɔn?​—Kal. 20:10-13.

¹² Zoova kwla se kɛ ɔ́ bú Aarɔn i fɔ. Sanngɛ, w’a yoman sɔ. Afin, ɔ wunnin sa nga ti yɛ Aarɔn fɔnnin’n. Ɔ wunnin kɛ Aarɔn timan sran tɛ. Naan sran mun yɛ be miɛnmiɛnnin i kɛ ɔ yo sa tɛ ɔ. Asa ekun’n, kɛ Aarɔn wunnin i wlɛ kɛ ɔ fɔnnin’n, ɔ dili i sa tɛ’n i nanwlɛ yɛ ɔ kplinnin su kɛ Zoova tu i fɔ. (Tul. 32:26; Kal. 12:11; 20:23-27) Zoova wunnin kɛ Aarɔn lafi i su naan i sa tɛ’n yoli i nsisɔ. I sɔ’n ti’n, ɔ yacili Aarɔn i sa tɛ’n cɛli i. Kɛ afuɛ kpanngban sinnin bɔbɔ’n, Zoova kleli kɛ ɔ te bu Aarɔn nin i osu nunfuɛ’m be wun akunndan kpa.​—Jue. 115:10-12; 135:19, 20.

13. ?Ngue yɛ é yó naan y’a kle kɛ e bu e niaan mun kɛ nga Zoova bu be’n sa ɔ?

¹³ Kɛ Aarɔn sa’n, ɔ ju wie’n e niaan’m be fɔn. ?Kɛ ɔ yo sɔ’n, wafa sɛ yɛ e bu be ɔ? ?E bu be kɛ nga Zoova fa bu be’n sa? (1 Sam. 16:7) Wienun ɔn, asɔnun’n nun gbanflɛn kan kun fa ninnge wie mɔ be timan kpa’n fa yiyi i ɲin su. Annzɛ kusu, ɔ yo ninnge uflɛ wie m’ɔ timan kpa ɔ. ?Sɛ e wun i sɔ’n, ngue yɛ é yó ɔ? Nán e ka lɛ e se kɛ ɔ timan sran kpa. Sanngɛ, maan e ukɛ i blɛblɛblɛ naan ɔ fa ajalɛ kpa. Kɛ e tra e awlɛn e uka e niaan mun kɛ ngalɛ’n sa’n, e klo be kpa tra laa’n.

14, 15. (a) ?Kɛ Eli i wla boli i wun’n, ngue yɛ Zoova yoli ɔ? (b) ?Ngue yɛ i sɔ’n kle e ɔ?

¹⁴ ?Be nga be wla bo be wun mɔ be leman wunmiɛn’n, wafa sɛ yɛ ɔ fata kɛ e nin be tran ɔn? Kɛ ɔ ko yo naan y’a wun i wlɛ’n, é wá kán Zoova i sufuɛ kun mɔ i sɔ sa ɲɛnnin i’n i ndɛ. Kpɛkun, wafa nga Zoova nin i be trannin’n, é wá kɛ́n i ndɛ wie. Zoova i sufuɛ sɔ’n yɛle i nuan ijɔfuɛ Eli. Eli ti sran wakawaka. Baali i nuan ijɔfuɛ 450 be ɲrun’n, ɔ kleli kɛ Zoova yɛ ɔ ti Ɲanmiɛn ɔn. Ɔ maan, be kunnin Baali i nuan ijɔfuɛ sɔ’m be kwlaa. Sa sɔ’n ti’n, famiɛn’n i yi Zezabɛli waan ɔ́ kún Eli wie. Kɛ Eli tili i sɔ’n, srɛ kunnin i naan w’a wanndi. Ɔ nantili lele kilo 150 naan w’a ju Beɛr-Seba. I sin’n, ɔ ɔli aawlɛ flɛnnɛn’n nun lɔ. Ɔ ko trannin waka kun bo. Afɛ’n nin awlaboɛ’n ti’n, i waan ɔ fluman kɛ ɔ wu.​—1 Fam. 18:19; 19:1-4.

¹⁵ ?Kɛ Zoova wunnin kɛ i nuan ijɔfuɛ’n i wla w’a bo i wun’n, ngue yɛ ɔ yoli ɔ? W’a seman kɛ i nuan ijɔfuɛ’n w’a yo srɛfuɛ naan ɔ nin i be diman junman kun. Sanngɛ, ɔ sunmɛnnin i anzi kun kɛ ɔ wa fɔnvɔ Eli. Anzi sɔ’n blɛli i aliɛ kpɛ nɲɔn. Ɔ seli i kɛ ɔ di afin ‘atin ng’ɔ o i ɲrun’n ti tɛnndɛn kpa.’ (An kanngan 1 Famiɛn Mun 19:5-8 nun.) Ɔ maan, kwlaa naan Zoova w’a man Eli i afɔtuɛ’n, ɔ sieli i su i nuan bo yɛ ɔ fali ajalɛ wie mun naan w’a ukɛ i.

16, 17. ?Kɛ sa tɔ e niaan’m be su’n, wafa sɛ yɛ e kwla uka be kɛ nga Zoova ukali Eli’n sa ɔ?

¹⁶ ?Wafa sɛ yɛ e kwla nian Zoova i liɛ’n su e yo ɔ? Nán maan e kpli e man afɔtuɛ. (Nya. 18:13) Sɛ e wun kɛ sa wie ti, e niaan kun leman wunmiɛn’n, ɔ flunman kɛ e dun mmua sie e su i nuan bo kpa naan e kle i kɛ i ndɛ lo e. (1 Kor. 12:23) Sɛ e yo sɔ’n, é sí like ng’ɔ miɛn i wun sakpa’n, yɛ é kwlá úkɛ i kpa.

¹⁷ I wie yɛle aniaan bla Sɛntia mɔ e kɛnnin i ndɛ’n i liɛ’n. Kɛ i wun’n yacili i nin i wa bla nɲɔn mun’n, ɔ yoli be kɛ be leman sran naan w’a nian be lika sa. ?Kɛ ɔ yo sɔ’n, ngue yɛ aniaan wie’m be yoli ɔ? Aniaan bla’n waan: “N flɛli aniaan wie mun telefɔnu nun n kan kleli be. Kɛ ɔ yoli sɔ’n, be bali min osu nianlɛ ndɛndɛ kpa. Kɛ bé bá’n, be le muɛn. Be nin e kali awlo lɛ le nɲɔn kun.” Aniaan’m be sieli i nzɔliɛ kɛ aniaan bla Sɛntia nin i mma’m b’a fɛ kpa yɛ be wla w’a bo be wun. I sɔ’n ti’n, be nun wie’m be yiali be yɛ be nin be wluli awlo. Like nga aniaan’m be yoli i lɛ’n, ɔ nin ndɛ nga Zaki kannin’n be kɔ likawlɛ. Zaki seli kɛ: “Maan e se kɛ wienun-ɔn e niaan bian annzɛ e niaan bla kun lɛ-man tralɛ, yɛ ɔ lɛ-man aliɛ. ?Sɛ amun nun kun se i kɛ: ‘Maan ɔ wun jɔ wɔ fɔuun, maan a nyan tannin kla, yɛ maan ɔ ku yi!’ Bɔ sanngɛ ɔ mɛn-mɛn i like nga i sa miɛn i wun’n, nzu ye yɛ w’a yo a mɛn i-ɔ? Sran ng’ɔ lafi Nyanmiɛn su’n, kɛ i kusu ti sɔ-ɔ, sɛ sa ng’ɔ yo be’n be ti-man kpa’n, wuun i Nyanmiɛn sulafilɛ’n ti ngbɛn.” (Zak 2:15-17) Aniaan’m be ukali Sɛntia nin i mma mun kɛ ng’ɔ nin i fata’n sa. I sɔ’n ti’n, kɛ anglo nsiɛn sinnin’n, ɔ nin i mma’m be fali be wun wlali cɛn kunngun atin bolɛ junman’n nun.​—2 Kor. 12:10.

E ƝAN SU MMLUSUƐ DAN

18, 19. (a) ?Be nga be leman wunmiɛn’n, wafa sɛ yɛ e kwla uka be ɔ? (b) ?Kɛ e yo sɔ’n, wan yɛ ɔ ɲan su mmlusuɛ ɔ?

¹⁸ Kɛ e tɔ tukpacɛ m’ɔ cɛ kpa’n, e kaman lɛ e yoman juejue. I kunngba’n niɔn. Sɛ Klistfuɛ kun fɔn annzɛ sa kekle wie tɔ i su naan i ti ɔ leman wunmiɛn naan w’a su Ɲanmiɛn’n, blɛblɛblɛ yɛ ɔ́ kwlá ɲán wunmiɛn ekun ɔn. I sɔ’n ti’n, ɔ fata kɛ ɔ suan Ɲanmiɛn Ndɛ’n i nun like, ɔ srɛ Ɲanmiɛn kpɛkun ɔ wɔ aɲia’m be bo. Sanngɛ, ɔ fata kɛ e kusu e tra e awlɛn e ukɛ i. ?Wafa sɛ yɛ e kwla yo sɔ ɔ? Maan e yi i nglo kɛ e klo i naan ɔ ti e sran nanndoliɛ.​—2 Kor. 8:8.

¹⁹ Kɛ e uka e niaan mun’n, e bɔbɔ e klun jɔ. Asa ekun’n, e suan aunnvuɛ silɛ nin awlɛn tralɛ. Kusu’n, nán e ngunmin yɛ e ɲan i sɔ yolɛ’n i su mmlusuɛ ɔ. Kɛ aniaan’m be ukauka be wiengu’n, klolɛ tran asɔnun’n nun. Sanngɛ i cinnjin kpafuɛ’n yɛle kɛ, kɛ e uka “be bɔ be leman wunmiɛn’n,” e kle kɛ e sɔnnzɔn Zoova. Afin Zoova liɛ’n, ɔ bu sran’m be kwlaa be tinuntinun be sran.​—Yol. 20:35.

[Ja ngua lɛ ndɛ mun]