NDƐ NG’Ɔ KLƐ FLUWA’N SU’N | ?A BU I KƐ ƝANMIƐN BU WƆ AKUNNDAN?
Ɲanmiɛn fɛ i wun mantan wɔ
“Sran fi kwlá ba-man n sin saan be nga n Si b’ɔ sunmannin min’n ɔ maan be ba n sin’n.”—ZAN 6:44.
LIKE NGA TI YƐ SRAN WIE’M BE LAFIMAN SU SƆ’N: Sran sunman be lafi Ɲanmiɛn su. Sanngɛ, be bumɛn i kɛ be nin i be afiɛn kwla mantan. Bla kun mɔ be flɛ i Klistina, ɔ buli i sɔ wie. Sanngɛ nn ɔ kɔ asɔnun. Ɔ seli kɛ: “N si kɛ Ɲanmiɛn yili ninnge kwlaa. Sanngɛ n simɛn i. N bumɛn i kɛ n kwla fa min wun m mɛntɛn i bɔbɔ.”
LIKE NGA ƝANMIƐN NDƐ’N KLE’N: Kɛ afɛ’n tin e su m’ɔ yo e kɛ y’a mlin sa’n, Ɲanmiɛn wla fiman e su. Ɔ nian e lika titi. Zezi fali e lika mɔ Ɲanmiɛn nian’n i su sunnzun ase naan e wun i wlɛ. Ɔ seli kɛ: “?Sɛ sran kun lɛ bua ya naan be nun kun mlin’n, an bu-mɛn i kɛ ɔ́ yáci ablangwlan-nin-ngwlan’n oka’n su lɛ ɔ́ kó kúnndɛ be nun kun ng’ɔ mlinnin’n? [...] I kunngba nin-ɔn, amun Si b’ɔ o nyanmiɛn su lɔ’n ɔ klo-man kɛ ba kanngan nga’m be nun kun mlin.”—Matie 18:12-14.
Kɛ nga e fa kɛnnin i lɛ’n sa’n, sran’m be kwlakwla be ti Ɲanmiɛn i cinnjin. Ɔ kunndɛman kɛ “be nun kun mlin.” ?Wafa sɛ yɛ Ɲanmiɛn “ko kunndɛ be nun kun ng’ɔ mlinnin’n” niɔn? Yɛle kɛ i bɔbɔ fa sran’n bɛ i sin.
Maan e fa sa wie mun naan e wun wafa nga Ɲanmiɛn fa sran mun bɛ i sin’n. Klistfuɛ klikli’m be blɛ su cɛn kun’n, Etiopi bian kun ti i kakaklolo’n nun ɔ su kɔ i lika. Kɛ ɔ́ kɔ́’n, nn ɔ́ kánngan Ɲanmiɛn nuan ijɔfuɛ kun i fluwa’n nun. Ɲanmiɛn seli Filipu m’ɔ ti Klistfuɛ’n kɛ ɔ wanndi ko to bian sɔ’n naan ɔ yiyi ndɛ m’ɔ su kanngan nun’n, i nun kle i. (Sa Nga Be Yoli’n 8:26-39) Be flɛ bian kun kɛ Kɔrnɛyi. Ɔ ti Rɔmu sonja’m be su kpɛn’n kun. Ɔ miɛn i ɲin su Ɲanmiɛn yɛ ɔ koko yalɛ kle Ɲanmiɛn titi. Cɛn kun’n, Ɲanmiɛn seli Piɛli kɛ ɔ wɔ bian sɔ’n i awlo lɔ naan ɔ ko kle i like. (Sa Nga Be Yoli’n 10:1-48) Asa ekun’n, Ɲanmiɛn maan Pɔlu nin i wiengu’m be ɔli Filipi klɔ’n i sin lɔ nzue kun nuan. Kɛ be juli lɔ’n, be wunnin “bla kun b’ɔ su Nyanmiɛn’n.” Be flɛ bla sɔ’n kɛ Lidi. “E Min’n maan i akunndan tran[nin] ndɛ bɔ Pɔl kan’n su, naan w’a fa su.”—Sa Nga Be Yoli’n 16:9-15.
Sa kwlaa sɔ’m be nun’n, e wun kɛ Zoova fali ajalɛ naan be nga be kunndɛ i’n be si i. ?Wan mun yɛ andɛ’n, be kan Ɲanmiɛn Ndɛ’n awloawlo’m be nun nin lika kwlaa ɔ? Sran kpanngban be si kɛ “Zoova i Lalofuɛ mun” ɔn. Usa ɔ wun kɛ: ‘?Nán Ɲanmiɛn yɛ ɔ su fa sran sɔ mun úka min naan n fa min wun n mɛntɛn i ɔ?’ I sɔ’n ti’n, é srɛ́ wɔ kɛ a sɔ sran sɔ’m be nun klanman.
[Ja ngua lɛ ndɛ’n]
Sɛ a kunndɛ kɛ á sí ndɛ sɔ’n nun ekun kpa’n, nian ɛntɛnɛti su video nga be flɛ i ?Ngue ti yɛ Biblu’n nun like suanlɛ’n ti cinnjin ɔn? www.jw.org/bci su.