Maan e fa Ɲanmiɛn Ndɛ’n m’ɔ kaciman’n e di junman
“Nyanmiɛn i ndɛ nga ɔ ko kan’n, wuun w’a kan ɔ kaci-mɛn i.”—EBR. 4:12.
?WAFA SƐ YƐ AMÚN TƐ́ SU Ɔ?
?Kɛ é bó jasin fɛ’n, ngue yɛ é yó naan ndɛ nga é kán’n w’a yo sran’m be fɛ ɔ?
?Wafa sɛ yɛ e fluwa nɲa’m be uka e naan kɛ e to sran’n, ɔ nin kɛ é kó níɛn i osu’n, y’a kwla fa Biblu’n y’a di junman ɔn?
?Kɛ é wá kó bó jasin fɛ’n, wafa sɛ yɛ e kwla nian Pɔlu i ayeliɛ’n su ɔ?
1, 2. ?Ngue yɛ Zoova seli Moizi kɛ ɔ yo ɔ? ?Ndɛ benin yɛ Zoova kannin fa wlali Moizi i yakpa ɔ?
MAAN e se kɛ, ɔ fata kɛ e ko jran famiɛn kun m’ɔ le kwlalɛ dan’n i ɲrun naan e kan Ɲanmiɛn ndɛ e kle i. ?Wafa sɛ yɛ i sɔ’n yó e ɔ? Atrɛkpa’n, srɛ kún e, yɛ e wun úsu e. ?Ngue yɛ é yó naan y’a kwla kan ndɛ’n niɔn? ?Ngue yɛ é yó naan y’a kle kɛ Ɲanmiɛn nuan ndɛ yɛ e kan ɔn?
2 Sa kunngba’n yɛ ɔ juli Moizi su ɔ. Moizi ti “wun ase kanfuɛ dan, asiɛ nga su wa sran fi to-mɛn i wun ase kanlɛ’n nun.” Cɛn kun’n, Zoova sunmɛnnin i kɛ ɔ ko kan ndɛ kle Ezipti famiɛn’n. (Kal. 12:3) Kɛ ɔ́ yó sɔ’n nn, Zoova i nvle nunfuɛ’m be ti kanga Ezipti mɛn’n nun. Ezipti Famiɛn’n ti wlɛfuɛ, ɔ timan wɛtɛɛfuɛ kaan sa. (Tul. 5:1, 2) Zoova waan Moizi ko se Ezipti famiɛn’n kɛ ɔ yaci Izraɛlifuɛ’m be nun. Kpɛkun, Moizi usali Zoova kɛ: “?Wan yɛle min bɔ n wɔ n ko to Ezipt famiɛn’n lɔ naan n yo maan Izraɛlfuɛ’m be tu Ezipt lɔ-ɔ?” I lɛ nun’n, Moizi su kle kɛ srɛ kun i. Kɛ ɔ yoli sɔ’n, Ɲanmiɛn wlɛli i yakpa. Ɔ seli i kɛ: “N jin ɔ sin.”—Tul. 3:9-12.
3, 4. (a) ?Ngue ti yɛ srɛ kunnin Moizi ɔ? (b) ?Ngue yɛ i yolɛ’n kwla kun e srɛ ɔ?
3 Moizi seli i klun lɔ kɛ Ezipti famiɛn’n su sɔmɛn i nun, annzɛ ɔ su buman kɛ Ɲanmiɛn Zoova yɛ ɔ sunmɛnnin i sakpa ɔ. Ɔ seli i klun lɔ ekun kɛ i niaan Izraɛlifuɛ’m be su lafiman su kɛ Ɲanmiɛn fɛli i kɛ ɔ fa be Ezipti lɔ fite. I kwlaa sɔ’n ti’n, srɛ kunnin i. Ɔ maan, ɔ seli Zoova kɛ: “Nian, be su lafi-man ndɛ nga ń kán’n su. Bé wá sé min kɛ: ‘Anannganman w’a yimɛn i wun nglo w’a kle-man wɔ.’”—Tul. 3:15-18; 4:1.
4 ?Sɛ ɔ ti e bɔbɔ’n, ngue yɛ é yó ɔ? Atrɛkpa’n, e su jranman kpɛnngbɛn annzɛ famiɛn kun i ɲrun le kɛ é kán ndɛ é klé i. Sanngɛ, kɛ ɔ yo naan e kan Ɲanmiɛn Sielɛ’n i jasin fɛ’n i ndɛ titi’n, atrɛkpa srɛ kun e. I sɔ’n ti’n, maan e nian wafa nga Zoova jrannin Moizi sin’n. I sɔ’n wlá e fanngan kpa.
“?NGUE LIKE YƐ Ɔ O Ɔ SA NUN LƐ’N NIƆN?”
5. ?Ngue yɛ Zoova waan Moizi fa tra nun ɔn? ?Ngue yɛ kpɔnman sɔ’n ti’n, siɛn’n, Moizi kwla yo ɔ?
5 Kɛ Moizi kannin kɛ be su tiemɛn i nuan ndɛ’n, Ɲanmiɛn ukɛli i. Ɔ kleli Moizi like ng’ɔ fata kɛ ɔ yo naan b’a lafi i su’n. Ɲanmiɛn Ndɛ’n waan: “Anannganman usɛli [Moizi] kɛ: ‘?Ngue like yɛ ɔ o ɔ sa nun lɛ’n niɔn?’ I waan: ‘kpɔnman ɔn.’ Anannganman seli i kɛ: ‘Yi i ase.’ Yɛ ɔ yili i ase ɔ, kpɛkuun kpɔnman’n w’a kaci wuo. Moiz waan ɔ́ wánndi wuo’n i nyrun. Naan Anannganman w’a se i kɛ: ‘To ɔ sa’n, naan tra wuo’n i lua’n.’ Moizi toli i sa’n, naan w’a tra wuo’n, kpɛkuun wuo’n kacili kpɔnman i sa nun ekun. Anannganman waan: ‘Like nga á wá yó naan b’a lafi su kɛ min Anannganman [...] n yili min wun nglo n kleli wɔ’n yɛ ɔ o lɛ ɔ.’” (Tul. 4:2-5) Moizi fali like ng’ɔ́ wá fá klé kɛ Ɲanmiɛn sunmɛnnin i sakpa’n. Ɲanmiɛn maan kpɔnman m’ɔ o i sa nun’n, ɔ kacili wuo. I sɔ’n wá klé kɛ Zoova sunmɛnnin i, naan ɔ jin i sin sakpa. Zoova seli Moizi kɛ: “Fa kpɔnman nga, i yɛ á wá fá yí atrɛ mun ɔn.” (Tul. 4:17) Kpɔnman mɔ Zoova waan Moizi tra nun’n ti’n, srɛ su kunmɛn i kun. Siɛn’n, ɔ kwla ko kan ndɛ kle i niaan Izraɛlifuɛ mun nin Ezipti famiɛn’n.—Tul. 4:29-31; 7:8-13.
6. (a) ?Kɛ é bó jasin fɛ’n, ngue yɛ ɔ fata kɛ e fa e tra nun ɔn? (b) ?Ngue ti ɔ? (c) Wafa nga ‘Ɲanmiɛn i ndɛ nga ɔ ko kan’n, nn w’a kan ɔ kacimɛn i, ɔ maan sran’m be kaci’n,’ an yiyi nun.
6 ?Kɛ é bó jasin fɛ’n, ngue yɛ e fa e tra nun ɔn? Blɛ sunman’n, like nga e fa’n yɛle Biblu’n, yɛ e kunndɛ kɛ é kánngan nun é klé sran mun. Sran wie’m be bu i kɛ Biblu’n ti fluwa ngbɛn. Sanngɛ, ɔ timan sɔ. Ɲanmiɛn i nuan ndɛ m’ɔ fa mannin sran mun yɛ be klɛli’n, yɛ ɔ o nun ɔn. (2 Piɛ. 1:21) Ɔ kan Ɲanmiɛn i klun sa’n i ndɛ. Kpɛkun, ɔ kle e ninnge nga Ɲanmiɛn Sielɛ’n wá yó be’n. I sɔ’n ti’n, Pɔlu seli kɛ: “Nyanmiɛn i ndɛ nga ɔ ko kan’n, wuun w’a kan ɔ kaci-mɛn i, ɔ maan sran’m be kaci.” (An kanngan Ebre Mun 4:12 nun.) Like kwlaa nga Zoova se kɛ ɔ́ yó be’n, be kaman ngbɛn. I bɔbɔ yo maan be kpɛn su sɛsɛsɛ. (Eza. 46:10; 55:11) Kɛ sran kun wun i kwlaa sɔ’n i wlɛ’n, like ng’ɔ kɛnngɛn i Ɲanmiɛn Ndɛ’n nun ti’n, ɔ kaci i nzuɛn’n.
7. ?Ngue yɛ é yó naan y’a yo sran m’ɔ kan “ndɛ nanwlɛ-ɔ ɔ kpɛ-mɛn i wun’n” niɔn?
7 Zoova fɛli i ndɛ nga ɔ kan, nn w’a kan ɔ kacimɛn i’n, ɔ mannin e naan e fa bo jasin fɛ’n. I liɛ’n, é klé kɛ e kpɛman e ti nun e kanman ndɛ. I sɔ’n ti’n, Pɔlu wlali Timote i fanngan kɛ ɔ yo sran m’ɔ kan “ndɛ nanwlɛ-ɔ ɔ kpɛ-mɛn i wun’n.” (2 Tim. 2:15) ?Wafa sɛ yɛ e kwla fa Ɲanmiɛn Ndɛ’n e di junman kpa ɔ? Maan e fa i nun ndɛ trele kun e kanngan nun e kle sran mun. Afin, like nga e kunndɛ’n yɛle kɛ ndɛ nga e kan’n, ɔ wluwlu sran’m be wun. I lɛ’n nun’n, e kwla fa fluwa nɲa nga be fiteli afuɛ 2013 nun’n, e di junman.
MAAN ƝANMIƐN NDƐ NGA É KÁNNGAN NUN’N, Ɔ NIN NDƐ NGA É KÁN’N BE YO KUN
8. ?Fluwa nɲa’m be su ndɛ benin yɛ asɔnun kpɛnngbɛn kun m’ɔ ti junman sunianfuɛ’n, ɔ kannin ɔn?
8 Fluwa nɲa sɔ’m be kwlaa be nun ndɛ’m be siesielɛ wafa’n ti kun. Ɔ maan sɛ e si kun i nun junman di’n, e kwla nian su e fɛ i onga mun e di junman. Fluwa sɔ’m be nun junman dilɛ’n timan kekle. Be flɛ Amlɛnkɛn’m be akpasua’n su lɔ nvle kun kɛ Awai. Lɔ asɔnun kpɛnngbɛn kun m’ɔ nian jasin fɛ bolɛ junman’n su’n seli kɛ: “E wunnin i wlɛ ndɛndɛ kpa kɛ fluwa sɔ’m be nun junman dilɛ yo fɛ kpa. E kwla fa bo jasin awloawlo’m be nun, ɔ nin nzra nun.” Aniaan’n waan wafa nga be klɛli fluwa sɔ mun ti’n, sran’m be kwla kan be klun ndɛ. Fluwa kunngunngun sɔ’m be su kosan’n, ɔ nin i su tɛlɛ fanunfanun’n, be ti kpa dan. Afin kɛ sran’n tɛ́ kosan’n su’n, srɛ kunmɛn i.
9, 10. (a) ?Wafa nga be yili e fluwa nɲa mun ti’n, wafa sɛ yɛ e kwla fa Ɲanmiɛn Ndɛ’n e di junman ɔn? (b) ?Fluwa nɲa benin yɛ amun fa boli jasin mɔ i bo guali kpa ɔ? (c) ?Ngue ti yɛ i bo guali kpa ɔ?
9 Fluwa kunngunngun sɔ’m be fa e ɲin sie i Biblu’n i nun ndɛ mma trelele kun su. E kwla kanngan nun e kle sran ng’ɔ sɔ e nun’n. Be klɛli fluwa sɔ’m be nun kun su kɛ ?Cɛn wie lele’n ɲrɛnnɛn’n wíe? Maan e fa kosan sɔ’n e usa sran’n. I su tɛlɛ ng’ɔ klɛ fluwa’n su’n, ɔ kwla nian su se kɛ “ɛɛn” annzɛ “cɛcɛ” annzɛ “ɔ kwla yo sɔ.” Kɛ sran’n ko tɛ su’n, nán e kan ndɛ uflɛ. Maan e se i kɛ “Ndɛ nga Biblu’n kan’n” yɛ. Kpɛkun, maan e kanngan Sa Nglo Yilɛ 21:3, 4 nun.
10 Be klɛli fluwa sɔ’m be nun kun ekun i su kɛ ?Amun bu Biblu’n i sɛ? Kɛ sran’n ko tɛ kosan sɔ’n su’n, maan e tike fluwa’n su naan e se i kɛ: “Biblu’n se kɛ ‘Nyanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli-ɔ.’” E kwla kan gua su kɛ: “Ndɛ mma sɔ’n kle like nga be kwla fa Ɲanmiɛn Ndɛ’n yo’n.” Kpɛkun, maan e kanngan 2 Timote 3:16, 17 nun.
11, 12. (a) ?Kɛ é bó jasin fɛ’n, ngue yɛ sɛ e kwla yoli’n, ɔ́ yó e fɛ ɔ? (b) ?Wafa sɛ yɛ fluwa nɲa sɔ’m be uka e naan kɛ é kó nían sran’m be osu’n, y’a wun ndɛ kun y’a kan ɔn?
11 Sɛ é yíyí fluwa’n i nun kpa ekun é klé sran’n, annzɛ e su yoman sɔ’n, ɔ fin wafa nga sran’n sɔ e nun’n. Sanngɛ i kwlaa yoli o, sɛ e kwla fali fluwa’n e mannin sran’n, naan e kanngannin Ɲanmiɛn Ndɛ’n i nun kan e kleli i’n, ɔ́ yó e fɛ. I kpalɛ klikli nga e to sran’n, sɛ e kanngannin Biblu’n nun ndɛ mma kun annzɛ nɲɔn cɛ nun’n, ɔ ti kpa. Cɛn uflɛ’n, e kwla yiyi ndɛ’n nun kpa ekun e kle i.
12 Fluwa nɲa kwlaa sɔ’m be sin’n, be klɛli lɛ kɛ: “An bu kosan yɛ’n i akunndan.” Ɲanmiɛn Ndɛ’n i nun ndɛ mma nin kosan wie’m be klɛ lɛ mɔ cɛn uflɛ’n, e nin sran’n e kwla koko be su yalɛ ɔ. I wie yɛle fluwa nga be klɛli su kɛ ?Amun bu i kɛ e ɲrun lɔ’n yó sɛ? I sin lɔ kosan’n waan: “?Ngue yɛ Ɲanmiɛn wá yó naan e mɛn’n w’a yo kpa ɔ?” Kpɛkun, ɔ fa e ɲin sie i Matie 6:9, 10, ɔ nin Daniɛl 2:44 be su. Fluwa nga be klɛli su kɛ ?Ɔwuliɛ’m be kwla sa be sin nguan nun ekun? i sin lɔ kosan’n waan: “?Ngue ti yɛ e yo kpɛnngbɛn mɔ e wu’n niɔn?” Ɔ fa e ɲin sie i Bo Bolɛ 3:17-19, ɔ nin Rɔmfuɛ Mun 5:12 be su.
13. Wafa nga e kwla fa fluwa nɲa mun e bo sran’m be Biblu’n nun like klelɛ bo’n, an yiyi nun.
13 Be yili fluwa nɲa sɔ mun naan e fa bo sran’m be Biblu’n nun like klelɛ bo. Sɛ sran’n i selilɛli’n kwla kɔ ɛntɛnɛti su’n, ɔ kwla fa sie i ɛntɛnɛti i su kɔlɛ nzɔliɛ ng’ɔ o fluwa’n su’n, i su. Sɛ ɔ yo sɔ’n, e ɛntɛnɛti adrɛsi’n ɔ́ tíke. Kpɛkun, bé klé i kɛ e kwla kle i Biblu’n nun like. Fluwa nɲa sɔ’m be fa e ɲin sie fluwa nga be flɛ i Jasin fɛ kpa kun fin Ɲanmiɛn! i nun like suanlɛ’m be su. I wie yɛle fluwa nɲa nga be klɛli su kɛ ?Wan yɛ mɛn’n o i sa nun sakpasakpa ɔ? Ɔ fa e ɲin sie i fluwa nga be flɛ i Jasin fɛ kpa kun fin Ɲanmiɛn! i like suanlɛ 5 su’n, i su. Fluwa nɲa nga be klɛli su kɛ ?Awlobo tranlɛ fɛ’n fin ngue? ɔ fa e ɲin sie i like suanlɛ 9 su’n, i su. Sɛ e fa fluwa nɲa sɔ mun e di junman kpa’n, é kwlá fá Biblu’n é klé sran’m be like kpa. Kpɛkun, é ɲán sran kpanngban mɔ é klé be Biblu’n nun like ɔ. ?Ngue ekun yɛ é yó naan y’a fa Ɲanmiɛn Ndɛ’n y’a bo jasin fɛ’n i kpa ekun ɔn?
MAAN E NIN SRAN’N E KOKO NDƐ NG’Ɔ TI I CINNJIN’N I SU YALƐ
14, 15. ?Kɛ é bó jasin fɛ’n, wafa sɛ yɛ e kwla nian Pɔlu i ayeliɛ’n su ɔ?
14 Pɔlu kunndɛli kɛ ɔ́ bó jasin fɛ’n klé ‘sran kpanngban.’ (An kanngan 1 Korɛntfuɛ Mun 9:19-23 nun.) Afin, ɔ kunndɛli kɛ ɔ́ úka “sran wafa’n kwlaa.” I Zuifu o, i be mɔ be timan Zuifu o, ɔ kunndɛli kɛ ɔ́ úka be naan be si ndɛ nanwlɛ’n naan be ɲan nguan. (Yol. 20:21) ?Wafa sɛ yɛ e kwla nian Pɔlu i ayeliɛ’n su e kan ndɛ nanwlɛ’n e kle “sran’m be kwlaa” ɔ?—1 Tim. 2:3, 4.
15 Anglo kwlaa nun’n, Ɲanmiɛn Sielɛ Blɛ junman fluwa’n kle e jasin fɛ bolɛ’n i wun ajalɛ mun. Maan e nian be su e bo jasin fɛ’n. Sanngɛ, sɛ e akpasua liɛ’n su lɔ ndɛ wie’m be ti sran’m be cinnjin’n, kɛ é síesíe e wun’n, maan e bu be su akunndan. Kpɛkun, maan e kunndɛ ndɛ nga é kán naan w’a yo sran’m be fɛ’n. Maan e kunndɛ Biblu’n nun ndɛ mma nga é kánngan nun m’ɔ nin ndɛ nga é kán’n, bé yó kun’n. Akpasua sunianfuɛ kun kannin wafa ng’ɔ nin i yi’n be yo mɔ be fa Ɲanmiɛn Ndɛ’n be bo jasin fɛ’n i kpa’n i ndɛ. I waan: “Kɛ e kan ndɛ’n i trele mɔ e kɛn i kpe kan’n, e sieli i nzɔliɛ kɛ sran’m be man e atin e kanngan Biblu’n nun e kle be. Kɛ e yo be like mɔ be ko ti e jasin ko wie’n, kpɛkun e kanngan Biblu’n nun e kle be.” Ndɛ kpɔlɛ nga bé bá lɛ’n, bé wá fá e ɲin síe i ndɛ nin kosan, ɔ nin Biblu’n nun ndɛ mma wie’m be su. Aniaan wie’m be fa boli jasin fɛ’n, yɛ i bo guali kpa. E kwla nian su e bo jasin fɛ’n e akpasua liɛ’n su lɔ wie.
16. Wafa nga e kwla fa Ezai 14:7 e bo jasin fɛ’n, an kɛn i ndɛ.
16 Wienun ɔn, e akpasua liɛ’n su lɔ’n, sran’m be yo be wiengu’m be like yaya titi annzɛ be yo nzaje sa mun. I lɛ’n nun’n, e kwla se sran ng’ɔ sɔ e nun’n kɛ: “?Kɛ a niɛn i sa’n, a bu i kɛ cɛn wie lele ‘asiɛ wunmuan’n wá jɔ́ fɔuun, yɛ sran’m be klun jɔ́, bé bó sró?’ I sɔ yɛ Ɲanmiɛn Ndɛ’n nun’n, Ezai 14:7 kan ɔn. I kpa bɔbɔ’n, Ɲanmiɛn Ndɛ’n kan ninnge kpakpa sunman ekun mɔ cɛn wie lele Ɲanmiɛn wá yó be’n, be ndɛ.” Kpɛkun ninnge sɔ mɔ Ɲanmiɛn wá yó be’n, maan e kanngan be nun kun nun e kle sran’n.
17. An kan wafa nga e kwla fa Matie 5:3 e bo jasin fɛ’n, i ndɛ.
17 Wienun ekun ɔn, e akpasua liɛ’n su lɔ’n, aɲanbeun ninnge kunndɛlɛ’n yɛ ɔ ti sran’m be cinnjin ɔn. Wie liɛ kusu’n, sran’m be ɲanman sika naan b’a nian be awlobo’n i lika. I lɛ nun’n, e kwla usa sran’n kɛ: “?A bu i kɛ ɔ fata kɛ saan fii sran kun ɲan aɲanbeun ninnge kpanngban naan i liɛ w’a yo ye?” Kɛ sran’n ko tɛ su’n, maan e se i kɛ: “Sran sunman be ti aɲanbeufuɛ. Sanngɛ, be klun jɔman. ?Sɛ ɔ ti sɔ’n niɔn, ngue yɛ ɔ fata kɛ sran’m be ɲɛn i naan be liɛ w’a yo ye ɔ?” I sin’n, maan e kanngan Matie 5:3 nun e kle i. Kpɛkun, maan e se i kɛ e kunndɛ kɛ é klé i Biblu’n nun like.
18. ?Wafa sɛ yɛ e kwla fa Zeremi 29:11 e fɔnvɔ sran mun ɔn?
18 ?Sanvuɛsa w’a ɲan e akpasua liɛ’n su lɔfuɛ wie mun? Sɛ e to sran’n, e kwla se i kɛ: “Fɔnvɔlɛ ndɛ kun o lɛ mɔ n kunndɛ kɛ ń kán klé wɔ ɔ.” (An kanngan Zeremi 29:11 nun.) I sin’n, e kwla usa kɛ: “?E wun akunndan nga Ɲanmiɛn bu’n, a sieli i nzɔliɛ? I waan, ɔ bu e wun ‘akunndan kpa.’ Yɛ ɔ kunndɛ kɛ e “nyrun atin’n yo weiin.” I sɔ’n ti ndɛ fɛ. ?Nɛ́n i ɔ? ?Sanngɛ, ngue yɛ Ɲanmiɛn yó naan i sɔ liɛ’n w’a yo ye ɔ?” I sin’n, maan e fa fluwa Jasin fɛ kpa kun fin Ɲanmiɛn! naan e fa sran’n i ɲin sie i nun like suanlɛ kun su.
19. Wafa nga e kwla fa Sa Nglo Yilɛ 14:6, 7 e bo jasin fɛ’n e kle be nga Ɲanmiɛn sulɛ’n ti be cinnjin’n, an kɛn i ndɛ.
19 ?Lika nga e tran lɛ’n, Ɲanmiɛn sulɛ’n ti sran’m be cinnjin? I lɛ nun’n, e kwla se sran’n kɛ: “?Sɛ Ɲanmiɛn i anzi kun kwla kan ndɛ kle wɔ’n, á síe ɔ su i nuan bo? (An kanngan Sa Nglo Yilɛ 14:6, 7 nun.) ?A wun ndɛ cinnjin nga anzi’n kan’n? I waan: ‘Maan e ɲin yi Ɲanmiɛn.’ ?Sanngɛ, wafa sɛ yɛ e kwla kle kɛ e ɲin yi Ɲanmiɛn sakpa ɔ?” Kɛ sran’n ko tɛ su’n, maan e yo i mo. Kpɛkun maan e kanngan Mmla’n 6:2 nun. I sin’n, e kwla se kɛ: “Kɛ nga e wun i lɛ’n sa’n, sɛ e waan é klé kɛ e ɲin yi Ɲanmiɛn’n, ɔ fata kɛ e nanti i mmla’m be su. Sanngɛ, sran sunman be siman Ɲanmiɛn i mmla kun m’ɔ ti cinnjin kpa’n. Mmla sɔ’n yɛle kɛ maan e klo Ɲanmiɛn kpa.” I sin’n, maan e nin sran’n e nuan sɛ su kɛ cɛn uflɛ’n, é wá klé i wafa nga sran kun kwla kle kɛ ɔ klo Ɲanmiɛn’n.
20. (a) ?Wafa sɛ yɛ e kwla fa Nyanndra Mun 30:4 e kle sran kun Ɲanmiɛn i nzuɛn wafa mun ɔn? (b) ?Biblu’n nun ndɛ mma benin yɛ an fa boli jasin mɔ i bo guali kpa ɔ?
20 Sɛ gbanflɛn annzɛ talua wie yɛ e to i’n, e kwla se i kɛ: “Ɲanmiɛn Ndɛ’n nun’n, kosan cinnjin wie’m be o lɛ. N kunndɛ kɛ ń kánngan be nun ń klé wɔ. (An kanngan Nyanndra Mun 30:4 nun.) Klɔ sran fi kwlá yoman ninnge sɔ mun. Saan e Yifuɛ Ɲanmiɛn kunngba cɛ yɛ ɔ kwla yo be ɔ. ?Sanngɛ, ngue yɛ é yó naan y’a si Ɲanmiɛn ɔn? Sɛ ɔ ti ɔ klun su’n, n kwla fa Biblu’n n kle wɔ Ɲanmiɛn i nzuɛn wafa mun.”
MAAN E FA ƝANMIƐN NDƐ’N MƆ MAAN SRAN’M BE KACI’N, E DI JUNMAN
21, 22. (a) ?Kɛ sran’m be kanngan Ɲanmiɛn Ndɛ’n nun’n, wafa sɛ yɛ i bo kwla gua ɔ? (b) ?Blɛ kwlaa nga e ɲɛn i wun atin’n, ngue yɛ e kunndɛ kɛ é yó ɔ?
21 Kɛ e kanngan Ɲanmiɛn Ndɛ’n nun e kle sran’n, e siman wafa nga i bo kwla gua’n. Maan e fa sa kun e nian. Be flɛ blɔfuɛ’m be nvle kun kɛ Ɔstrali. Cɛn kun’n, lɔ aniaan nɲɔn bé bó jasin fɛ’n, be toli bla kun i awlo lɔ. Be nun kun usali bla’n kɛ: “?A si Ɲanmiɛn i dunman’n? Kpɛkun, ɔ kanngannin Jue Mun 83:19 nun.” Ndɛ sɔ’n boli bla’n i nuan dan. Ɔ seli kɛ: “Kɛ be ɔli’n, n ɔli kan be yo fluwa’m be atɛ lɔ’n. Lika sɔ’n, ɔ nin min tranwlɛ’n be afiɛn ti nun kilo 56. N ko niannin Biblu uflɛ wie’m be nun, yɛ n niannin ndɛ’m be bo tulɛ fluwa kun nun. Kɛ n wunnin kɛ Ɲanmiɛn i dunman’n yɛle Zoova sakpa’n, n wunnin i wlɛ kɛ nán Ɲanmiɛn i su ndɛ ngba yɛ n si i ɔ.” Bla’n nin i wun’n, be wa suannin Biblu’n nun like. Kpɛkun, be yoli be batɛmu.
22 Kɛ sran’m be kanngan Ɲanmiɛn Ndɛ’n nun’n, be kwla kaci be nzuɛn’n. Kpɛkun, be lafi ninnge nga Ɲanmiɛn seli kɛ ɔ́ wá yó be’n, be su. (An kanngan 1 Tɛsalonikfuɛ Mun 2:13 nun.) Ɲanmiɛn nuan ndɛ’n wluwlu sran wun lele tra ndɛ kwlaa nga e kwla kan’n. I sɔ’n ti, blɛ kwlaa nga e ɲɛn i wun atin’n, maan e fa Ɲanmiɛn Ndɛ’n e bo jasin fɛ’n. Afin, Ɲanmiɛn i ndɛ nga ɔ ko kan’n, nn w’a kan ɔ kacimɛn i.