Maan e fa e fluwa nɲa mun e bo jasin fɛ’n
1. ?Wafa sɛ yɛ Zoova i sufuɛ’m be fali fluwa nɲa’m be dili junman ɔn?
1 Jasin fɛ’n bolɛ junman’n i dilɛ nun’n, nán andɛ sa yɛ Zoova i Lalofuɛ’m be sɔli be fluwa nɲa’m be yilɛ ɔ. Afuɛ nga be flɛ i 1880 nun’n, Charles Russell nin i wiengu’m be boli fluwa Tracts des Étudiants de la Bible be yilɛ bo. Kɛ be ko yi’n, nn be nga be kanngan Sasafuɛ Tranwlɛ’n fluwa’n nun’n be su fa cɛcɛ sran mun. Fluwa nɲa sɔ’m be cinnjin mɔ be ti’n ti’n, afuɛ nga be flɛ i 1884 nun’n, kɛ Charles Russell kpɛ́ susute nga ɔ yi e fluwa mun’n i dunman’n, ɔ fali fluwa nɲa’n i flɛlɛ Angle nun’n ɔ fa wlali nun. I yɛle “tract.” Ɔ maan susute sɔ’n i dunman’n yɛle Zion’s Watch Tower Tract Society. Sanngɛ andɛ’n, be flɛ i Watch Tower Bible and Tract Society of Pennsylvania. Afuɛ nga be flɛ i 1918 i nun’n, Biblu’n nun like suanfuɛ [Zoova i Lalofuɛ] mun be fali fluwa nɲa lele miliɔn 300 be cɛcɛli sran mun. Andɛ nin andɛ’n, be te fa fluwa nɲa sɔ’m be te di junman kpa.
2. ?Ngue ti yɛ fluwa nɲa’m be nun junman dilɛ’n yo fɛ ɔ?
2 ?Ngue ti yɛ fluwa sɔ’m be nun junman dilɛ yo fɛ ɔ? Be nun foto mun nin desɛn’m be ti’n, sran’m be klo be. Be nun ndɛ’n mɔ w’a sɔnman’n ti’n, be nun kannganlɛ yo fɛ, kpɛkun be wun i wlɛ ndɛndɛ. Sran nga e to be awloawlo’m be nun mɔ be kunndɛman kɛ bé fá Biblu’n i akua mun annzɛ periodiki mun’n, be klo fluwa nɲa mun. Kusu be fa manlɛ’n yoman ya. Be nga blɛ li yɛ be su bo jasin fɛ’n bolɛ bo’n, ɔ nin bakanngan mun bɔbɔ be kwla fa man. I kunngba’n, kɛ mɔ fluwa nɲa’m be ti kanngan’n ti’n, be nun tralɛ’n yoman ya.
3. ?Sa benin yɛ amun bɔbɔ be wunnin i annzɛ be kɛnnin i ndɛ e fluwa’m be nun, m’ɔ kle kɛ fluwa nɲa’m be ti kpa ɔ?
3 Kpɛ klikli nga sran wie’m bé wún nanwlɛ ndɛ’n i wlɛ’n, fluwa nɲa’m be su yɛ be wunnin i ɔ. I wie yɛle bla kun m’ɔ o Aiti’n i liɛ’n. Ɔ wunnin e fluwa nɲa’m be nun kun akpɔ’n su. Kɛ ɔ mannin su m’ɔ kanngannin nun’n, ɔ seli kɛ “ɛn-ɛɛn, m’an wun nanwlɛ ndɛ’n siɛn’n!” I sin’n, ɔ ɔli aɲia’m be bo, yɛ ɔ boli Biblu’n nun like suanlɛ bo ɔ. W’a jranman lɛ, be yoli i batɛmu. I kwlaa ngalɛ’n fin Ɲanmiɛn Ndɛ’n m’ɔ le tinmin’n, m’ɔ wunnin i fluwa nɲa kun su’n.
4. ?Anglo kun nun’n, sɛ fluwa nɲa mun yɛ ɔ fata kɛ e fa man’n, be fa manlɛ nun’n, ngue yɛ ɔ fata kɛ e ɲin tran su ɔ?
4 Kɛ é bó jasin fɛ’n awloawlo’m be nun’n: Kɛ mɔ fluwa nɲa’m be nun junman dilɛ’n yo fɛ sɔ’n ti’n, ɔ ju wie’n, be yɛ é fá mán sran mun anglo wie’m be nun ɔn. É bó i bo Novamblu nun. Nán fluwa’n i fa manlɛ ngbɛn sa ɔ, sanngɛ kɛ é fá mán’n, maan e kunndɛ kɛ e nin sran mun é bó yalɛ kokolɛ bo. Sɛ i nun ndɛ’n yo be fɛ’n, kɛ é kó nían be osu’n, maan e fa e fluwa Biblu’n kle annzɛ like suanlɛ fluwa uflɛ naan e bo be Biblu’n nun like klelɛ bo. ?Kɛ é bó jasin fɛ’n awloawlo’m be nun’n, wafa sɛ yɛ e kwla fa fluwa nɲa mun e man sran mun ɔn? Kɛ m’ɔ le kun nin i nun ndɛ liɛ’n ti’n, ɔ fata kɛ e si be nun ndɛ mun naan y’a fa man.
5. ?Kɛ é bó jasin fɛ’n awloawlo’m be nun’n, wafa sɛ yɛ e kwla fa fluwa nɲa mun e man ɔn?
5 Maan ndɛ nga é kán’n, ɔ yo e jasin bowlɛ’n i nunfuɛ’m be fɛ. Kpɛkun nán maan ɔ nin fluwa nɲa’n i nun ndɛ’n be sansan be wun. E kwla bo i bo nin fluwa nɲa’n i fa manlɛ. Kɛ mɔ foto annzɛ desɛn o i sin bui’n su’n ti’n, atrɛkpa’n sran’m be konvi ká su. I wie ekun yɛle kɛ e kwla fa fluwa nɲa kpanngban e kle, kpɛkun e se sran’n kɛ ɔ nian nun fa be nun kun. Sɛ jasin bowlɛ’n nun lɔ’n, sran’m be tikeman be anuan mun’n, maan e sie fluwa’n i kpa naan be wun i sin bui’n. Annzɛ kusu e kwla se i kɛ é fá fluwa’n é wlɛ́ i anuan’n i bo naan e kunndɛ kɛ é úsɛ i ngwlɛlɛ afɛ. Sɛ fluwa nɲa’n i flɛlɛ’n ti kosan’n, e kunndɛ kɛ sran kle e wafa nga ɔ́ tɛ́ su’n. Annzɛ kusu’n, e bɔbɔ e kwla usɛ i kosan nga mɔ maan ɔ kwla kɛn i klun ndɛ’n. Kpɛkun i sin’n, e nin i e kwla kanngan fluwa nɲa sɔ’n i bue kun nun. Sɛ kosan o i bue sɔ’n nun’n, kɛ e ko kanngan nun’n, maan e jran kan naan sran’n kɛn i klun ndɛ. Kpɛkun Biblu’n nun ndɛ mma nga be o nun’n, maan e tike e Biblu’n su naan e kanngan be nun. Kɛ e ko wie fluwa nɲa’n i nun ndɛ kpɔlɛ wie’m be su yalɛ koko’n, e kwla jrɛn i lɛ. Kpɛkun cɛn nga é kó níɛn i osu ekun’n, e nuan kwla sɛ su. Sɛ titi asɔnun’n yaci fluwa man be nga be toman be awlo’n, maan amun fa fluwa nɲa’n be wlɛ i anuan’n i bo kpa naan be nga bé sín’n b’a wunmɛn i.
6. ?Wafa sɛ yɛ e kwla fa fluwa nɲa mun e bo jasin fɛ’n akpɔ nuan ɔn?
6 Akpɔ nuan jasin fɛ’n bolɛ: ?Amun a fa fluwa nɲa b’a bo jasin fɛ’n akpɔ nuan le? Sran wie’m be su nanti ndɛndɛ kɔ lika ti’n, be leman blɛ naan b’a jran naan y’a koko yalɛ. Sɛ Ɲanmiɛn ndɛ’n yo be fɛ o, sɛ ɔ yoman be fɛ o, e kwlá wunmɛn i wlɛ. Sɛ e fa periodiki kasiɛn mun e man be’n, sɛ bé kánngan nun o sɛ be su kannganman nun o, e su wunmɛn i wlɛ. I ti’n, ɔ flunman kɛ e fa fluwa nɲa e man be. Kɛ mɔ be sin bui’n ti klanman’n, mɔ be nun ndɛ’n w’a sɔnman’n ti’n, sɛ sran kun le blɛ’n, i nun kannganlɛ kwla yo i fɛ. Sɛ kusu é nían naan be nantiman ndɛndɛ be kɔman lika’n, e nin be e kwla koko fluwa nɲa’n i nun ndɛ wie su yalɛ.
7. ?Sa benin mun yɛ be kle wafa nga e kwla fa fluwa nɲa mun e bo jasin nga e ɲɛn i wun atin’n niɔn?
7 Jasin fɛ’n bolɛ’n mɔ e ɲɛn i wun atin’n: Sɛ e fa fluwa nɲa mun’n, jasin fɛ’n bolɛ’n mɔ e ɲɛn i wun atin’n su yoman kekle. Kɛ aniaan bian kun fíte’n, ɔ fa fluwa nɲa kan fa sie i sa su. Sɛ ɔ nin sran wie yia’n, maan ɔ yo aata difuɛ o, ɔ fa fluwa nɲa’n fa wlɛ i sa nun kɛ ɔ ko kanngan nun. Sran kun nin i yi be ɔli Amlɛnkɛn’m be klɔ nga be flɛ i kɛ New York City su lɔ ninnge’m be niannianlɛ kan. Be si kɛ sɛ be ju lɔ’n, be nin nvle fanunfanun nunfuɛ’m bé yía. I sɔ ti’n, be fali fluwa Nations, ɔ nin fluwa nɲa kpanngban aniɛnaniɛn’m be nun be sieli be sa su. Ɔ maan lɔ’n, i like atɛ yofuɛ nga be kan aniɛn uflɛ’n nin o, i be nga be nin be nanti’n nin o, lika kwlaa nga be o’n, be man sran’m be fluwa nɲa.
8. ?Ngue ti yɛ fluwa nɲa’m be ti kɛ like lualɛ sa’n niɔn?
8 Maan e ‘lua e ninnge mun’: Fluwa nɲa’m be ti kɛ ninnge mɔ be lua’n sa. Fie difuɛ’m be fa ninnge nga ɔ fata kɛ be lua’n be fa sanndi i fie’n nun. Afin be siman nga ɔ́ fífí’n naan w’a yo kpa’n. Akunndanfuɛ’n 11:6 se kɛ: “I sɔ’n ti’n, lua ɔ ninnge mun nglɛmun nun lele fa ju nnɔsua nun, nán de wunmiɛn. Afin a si-man ng’ɔ wa yo kpa-a, sɛ nglɛmun liɛ’n nin o, sɛ nnɔsua nun liɛ’n nin o, sɛ kusu nglɛmun nun liɛ’n nin nnɔsua nun liɛ’m be nnyɔn yɛ bé yó kpa o.” I sɔ’n ti’n, maan e fa jasin fɛ’n bolɛ like kpa sɔ’n e uka e wun naan ‘ndɛ’n ng’ɔ man akunndan’n’ tru.—Nya. 15:7.
[Ndɛ kwle, bue 3]
Kɛ mɔ be fa fluwa nɲa be bo jasin fɛ’n m’ɔ ba nvlɛ’n ti’n, kɛ ɔ́ fɛ́ Novamblu anglo’n nun’n, ɔ ju wie’n, é fá be é wlá fluwa nga e fa e man sran mun anglo kwlaa nun’n, be nun wie.