Fluwa nɲa uflɛuflɛ’m be yo ɲɛnmɛn dan!
1. ?Fluwa benin yɛ be yo ɲɛnmɛn mɔ bé wá úka e jasin fɛ’n i bolɛ nun ɔn?
1 Afuɛ 2013 nun’n, e nvle kun aɲia’n mɔ i flɛlɛ’n yɛle “Ɲanmiɛn Ndɛ’n ti nanwlɛ’n” i bo’n, anuannzɛ’n yili fluwa nɲa uflɛuflɛ nnun. Asa ekun’n, anuannzɛ’n fali Sielɛ Blɛ’n i nganniɛn no 38 mɔ i flɛlɛ’n yɛle “?Ɔwuliɛ’m be kwla sa be sin nguan nun ekun?” ɔ fa nannannin fluwa nɲa sɔ’m be su mannin e. Fluwa nɲa nsiɛn sɔ’m be wafa’n yo ɲɛnmɛn. ?Ngue ti yɛ be yili be sɔ ɔ? ?Wafa sɛ yɛ e kwla fa man sran mun awloawlo’m be nun ɔn?
2. ?Kɛ anuannzɛ’n yí fluwa nɲa uflɛuflɛ mun’n, ngue su yɛ ɔ niannin ɔn?
2 Like nga ti yɛ be yili be sɔ’n: Titi kɛ é bó jasin fɛ’n, ajalɛ kpa mɔ e nian su’n yɛ: (1) E ndɛ’n i su fitilɛ nun’n, e usa sran’n i kosan kun. (2) E kanngan Biblu’n nun ndɛ mma kun nun. (3) E man sran’n i fluwa kun kɛ ɔ kanngan nun. (4) E man kosan kun su ka naan y’a srɛ atin’n, kpɛkun cɛn nga é kó nían sran’n i osu’n, e nuan sɛ su. Ajalɛ nnan sɔ’m be su yɛ be niannin yili fluwa nɲa uflɛuflɛ mun ɔn.
3. ?Wafa sɛ yɛ e kwla fa e fluwa nɲa uflɛuflɛ’m be nun kun e di junman ɔn?
3 Wafa nga e kwla fa di junman’n: (1) Kɛ e yo sran’n i like’n, maan e fa kosan ng’ɔ o fluwa’n su mɔ be kwla tɛ su wafa nsan’n e usa sran’n naan ɔ tɛ su. (2) Kɛ mɔ fluwa’n i nun ti buwa’n, siɛn’n maan e tike su naan e fa e ɲin sie i ndɛ ce nga be flɛ i “Ndɛ nga Biblu’n kan’n” su. Sɛ ɔ nin i fata’n, maan e kanngan Biblu’n nun ndɛ mma ng’ɔ o lɛ’n nun. Sɛ ndɛ tiefuɛ’n le blɛ’n, maan e koko ndɛ ce nga be flɛ i “Wafa nga ndɛ sɔ’n kwla yo amun ye’n” i su yalɛ. (3) Maan e fa fluwa nɲa’n e man sran’n, kpɛkun maan e wlɛ i fanngan naan ɔ kanngan fluwa’n i onga’n nun kɛ ɔ klo’n sa. (4) Ka naan y’a srɛ atin’n, ndɛ ce nga be flɛ i “An bu kosan yɛ’n i akunndan” i bo lɛ kosan’n, maan e fa kle i. Kpɛkun cɛn uflɛ nga é fá Biblu’n é tɛ́ kosan sɔ’n su’n, maan e nuan sɛ su.
4. ?Kɛ e kɔ sran osu nianlɛ’n, wafa sɛ yɛ e kwla fa fluwa nɲa uflɛuflɛ mun e di junman ɔn?
4 Sɛ sran kun sɔli fluwa’n nun’n, i osu nianlɛ su yoman ya. Sɛ e kɔ’n, maan e fa Biblu’n nun ndɛ mma ng’ɔ o fluwa nɲa’n i sin’n su’n, e tɛ kosan nga e usɛli i’n su. Ka naan y’a srɛ atin’n, maan e fa fluwa pɛplɛpɛ nga be flɛ i Jasin fɛ i foto’n e kle sran’n. Kpɛkun maan e yi fluwa sɔ’n naan e fɛ i nun like suanlɛ ng’ɔ yiyi ndɛ nga e kokoli su yalɛ’n nun kpa’n e kle sran’n. I sin’n, maan e fa fluwa pɛplɛpɛ’n e mɛn i. Sɛ ɔ kplin su’n, maan e nin i e nuan sɛ su naan cɛn uflɛ’n e koko i nun ndɛ’n su yalɛ. Biblu’n nun like klelɛ bɔbɔ yɛ y’a bo i bo sɔ lɛ ɔ! Wie liɛ kusu’n, e kwla fa fluwa nɲa uflɛuflɛ kun ekun e man sran’n. Kpɛkun cɛn uflɛ nga é kókó i nun ndɛ’n su yalɛ’n, maan e nin i e nuan sɛ su.
5. ?Ngue ti yɛ e fluwa nɲa’m be ti cinnjin jasin fɛ’n bolɛ’n nun ɔn?
5 I afuɛ 130 tra su yɛ, e fa fluwa nɲa mun e bo jasin fɛ’n. Kannzɛ bɔbɔ be kwlaa be wafa’n timan kun’n, sanngɛ be yo nna kpa jasin bolɛ’n nun. I sɔ’n ti’n, maan e fa fluwa nɲa uflɛuflɛ sɔ mun e bo jasin fɛ’n naan Biblu’n nun ndɛ’n tru asiɛ wunmuan’n su.—Nya. 15:7a.