BIBLU’N I SU KOSAN’M BE SU TƐLƐ
?Ngue ti yɛ e yo sa tɛ ɔ?
?Wan yɛ ɔ kunndɛli kɛ ɔ́ láka Zezi naan ɔ yo sa tɛ’n niɔn?—Matie 4:8-10.
Titi’n, sran’m be kunndɛ kɛ be nin be wiengu’m bé trán fɔun. Yɛ be kunndɛ kɛ bé yó be wiengu ye. Sanngɛ, e wun kɛ sran’m b’a yo wlɛ, be yo be wiengu’m be like yaya, yɛ be bu be wiengu’m be lufle. Nanwlɛ, sa nga sran’m be yo be mɛn’n nun’n, be yo sro. E ti sa sɔ’m be nganniɛn cɛn kwlakwla. ?Ngue ti yɛ sran’m be yo sɔ ɔ? ?Sran wie yɛ ɔ wlawla be yɛ be yo sa tɛtɛ mun ɔn?—An kanngan 1 Zan 5:19 nun.
?Ɲanmiɛn yɛ ɔ yili sran nin sa tɛ yolɛ’n niɔn? Cɛcɛ. Ɲanmiɛn yili sran’n kɛ i bɔbɔ sa naan ɔ klo sran kɛ i bɔbɔ Ɲanmiɛn fa klo sran mun’n sa. (Bob. 1:27; Zɔb 34:10) Sanngɛ, Ɲanmiɛn mianman sran kɛ ɔ yo like. Adam nin Ɛvu mɔ Ɲanmiɛn dun mmua yili be’n, be yoli sa tɛ. Yɛle kɛ, b’a kplinman su kɛ Ɲanmiɛn sie be. Ɔ maan, be kacili sa tɛ yofuɛ. Yɛ be fali sa tɛ yolɛ’n sali sran’m be kwlakwla.—An kanngan Mmla’n 32:4, 5 nun.
?É yó sa tɛ’n sa trilili?
Ɲanmiɛn kunndɛ kɛ e wla nzuɛn tɛ’n i ase. (Nyanndra Mun 27:11) I sɔ’n ti, ɔ kle e like nga é yó naan y’a yoman sa tɛ’n naan y’a di alaje’n. Sanngɛ dɔ nga su’n, e kwlá kloman sran kɛ Ɲanmiɛn fa klo sran guɛ i ti’n nin i bo’n sa.—An kanngan Jue Mun 32:8 nun.
Sran’m be yo sa tɛ’n i dan. Ɲanmiɛn kusu yaci sran’m be lɛ naan be wun be sa tɛ nga be yo’n i su afɛ’n. (2 Piɛr 3:7-9) Sanngɛ, ɔ cɛ kan’n, sran kpa mɔ be ɲin yi Ɲanmiɛn’n, be ngunmin yɛ bé trán asiɛ’n su ɔ.—An kanngan Jue Mun 37:9-11 nun.