E nvle kun aɲia’m be bo’n, aklunjuɛ yɛ e di i Ɲanmiɛn sulɛ’n nun ɔn
1 Afuɛ kwlaa nun’n, kɛ cɛn nga Izraɛlifuɛ’m be di be’n ko ju’n, Zozɛfu nin Mali nin be mma mun, ɔ nin Ɲanmiɛn sufuɛ onga mun’n, be kɔ Zerizalɛmu be ko di. Blɛ sɔ nun’n, be kwlaa be kplin be ɲin naan b’a buman aliɛ ba kwlaa nun sa ng’ɔ o be su’n i akunndan. Sanngɛ, wafa nga be nin Ɲanmiɛn be afiɛn fa ti’n mɔ i yɛ ɔ ti cinnjin kpa’n, i su yɛ be fa be akunndan kwlaa sie ɔ. Kusu’n, be ɲan be ti be bu Zoova i aklunye’n i su akunndan yɛ be koko su yalɛ. Kpɛkun, be fa be ɲin sie i Moizi Mmla’n su. E nvle kun aɲia ng’ɔ́ bá lɛ’n kusu wá mán e atin naan y’a yo ninnge sɔ mun wie naan y’a di aklunjuɛ Zoova i sulɛ’n nun.
2 Ɔ nin fata kɛ e buabua e wun: Kɛ Zezi nin i si nin i nin ɔ nin i niaan’m bé fɛ́ i Nazarɛti bé kɔ́ Zerizalɛmu bé bá’n, be nanti kilo 200. Kannzɛ e siman Zezi i niaan’m be nuan, sanngɛ e wun kɛ Zozɛfu nin Mali be wun siesielɛ’n, w’a yoman blɛblɛ. ?Amun a fa ajalɛ kwlaa ng’ɔ ti mɔ amun fa naan amun a kwla tran e nvle kun aɲia ng’ɔ ba lɛ’n, i cɛn ba nsan’n i bo? Sɛ wunmiɛn lolɛ blɛ yɛ amún fá o, annzɛ sɛ atin yɛ amún srɛ́ i amun junman su lɔ min’n i sa nun o. Sɛ kusu, amun wa’n i suklu klefuɛ’n yɛ amún sé i kɛ ɔ mɛn i atin naan ɔ tran aɲia’n bo o, nja, amun bɔbɔ amun nian. ?Sɛ aofuɛ sua wie nun yɛ amún lá’n, amun a wla amun sua ba liɛ’n i bo b’a sie? ?Aniaan nga be o amun asɔnun’n nun mɔ kekle o be su dan’n, sɛ an kwla uka be naan b’a tran aɲia’n i bo wie’n, amun a fɛ i wun ajalɛ’n?—1 Zan 3:17, 18.
3 Blɛ kun mɔ e tran aniaan tranlɛ: Nanwlɛ, Zuifu’m be cɛn dilɛ blɛ sɔ mun be ti blɛ mɔ be nin be niaan’m be kwla wla be wun fanngan kpa ɔ! E si kɛ Zezi nin i si nin i nin ɔ nin i niaan’m be wun blibli be blɛ sɔ’n nun. Afin be si kɛ bé wá wún be janvuɛ mɔ be wunnin be w’a cɛ’n. Asa, sran kpanngban nga be nin be kɔ Zerizalɛmu annzɛ be nin be sa be sin’n, annzɛ be nin be yia lɔ’n, i Zuifu o i be nga be kacili Zuifu o, be nin be kwla tra janvuɛ.
4 Ndɛ nga be kan be nvle kun aɲia’m be bo lɔ’n, sran kpa nanwlɛfuɛ m’ɔ si ngwlɛlɛ’n, ɔ kwla klɛ i kwlaa fluwa su fa man e. Sanngɛ ɔ yoman sɔ. Sa nga ti yɛ ɔ yomɛn i sɔ mɔ sanngɛ ɔ siesie nvle kun aɲia mun naan y’a yia be bo lɔ y’a tie Ɲanmiɛn ndɛ’n, be nun kun yɛle kɛ blɛ sɔ nun’n, e kwla wla e wiengu fanngan. (Ebr. 10:24, 25) I sɔ’n ti’n, cɛn kwlaa amun siesie amun wun naan amun a ju aɲia’n i bo lɔ ndɛ nun. I liɛ’n, amun nin aniaan’m bé kwlá kókó yalɛ ka naan lika siesiefuɛ’n w’a bo miziki nga é fá fíti aɲia’n su’n i su. Kɛ ɔ́ yó sɔ’n, ɔ fata kɛ e kwlaa e tran ase. Sɛ e fa e aliɛ kan nga é dí i amindi su e kɔ’n, ɔ ti kpa. I liɛ’n, kɛ wunmiɛn lolɛ blɛ’n ko ju’n, e su kɔman aliɛ kunndɛlɛ gua su lɔ. Ɔ maan, é kwlá kɔ́ e niaan’m be wun é kókó yalɛ. Aniaan tranlɛ mɔ e nin e niaan Klistfuɛ mun e tran’n, ɔ ti kɛ like mɔ Zoova fa cɛli e sa. Nán e bu i kɛ sɛ y’a niɛnmɛn i lika’n, ɔ kwlá fiman e sa.—Mis. 2:12.
5 Like suanlɛ blɛ: I nun nga Zezi te yo kaan bɔbɔ’n, ɔ kɔ cɛn dilɛ’m be bo ko suan i Si m’ɔ o ɲanmiɛn su lɔ’n, i su like. (Lik 2:41-49) ?Ngue yɛ e nin e awlofuɛ mun e kwla yo naan aɲia’n i bo lɔ ndɛ kwlaa nga bé wá kán’n, i wie fi w’a to w’a fuanman e ɔ? Kɛ bé yó aɲia’n, nán e jaojao yɛ nán e ijɔijɔ ngbɛnngbɛn. Nán e man e selilɛli annzɛ i wunsu ninnge wie’m be atin maan be kle e yalɛ annzɛ be kle sran uflɛ yalɛ. Maan e nian sran ng’ɔ o cenje’n su lɔ’n ɔ kan Ɲanmiɛn ndɛ’n. Nán e to e ɲin lika uflɛ. Kpɛkun, maan e klɛ ndɛ wie mun e sie. Sɛ e le ba’n, maan e nin be tran likawlɛ. I liɛ’n, é wún i wlɛ sɛ be fa be su sie i aɲia’n i bo ndɛ’n su wie o. Nnɔsua’n, maan e koko aɲia’n i bo lɔ ndɛ ng’ɔ yoli e fɛ’n, i su yalɛ.
6 E wun wlawlalɛ nin e wun siesielɛ: Kɛ Zezi nin i si nin i nin ɔ nin i niaan mun kpɛkun Zuifu onga mun’n, bé kɔ́ cɛn dilɛ ɔ nin kɛ bé sá be sin bé bá’n, aata difuɛ nga be timan Zuifu mɔ be nin be yia atin’n su’n, be kwla wun be wlɛ ndɛndɛ kpa be tralɛ’m be nuan njɔlɛ mɔ be sinsinnin su nin jese ble nzue nzue’n ti. (Kal. 15:37-41) Kannzɛ ɔ leman tralɛ trele kun mɔ be fa sie Klistfuɛ’m be nzɔliɛ’n, sanngɛ sran kwlaa si kɛ be wlawla be wun kpa, be siesie be wun cɛcɛɛcɛ kpɛkun be wun ti yɛinyɛin. Kɛ é kɔ́ aɲia’n i bo ɔ nin kɛ é sá e sin é bá’n, annzɛ kɛ e o aɲia klɔ’n su’n, nán maan e ɲin kpa e wun wlawlalɛ’n su. Kannzɛ kɛ aɲia’n ko wie’n é káci e wun tralɛ’n, sanngɛ kɛ sran’m bé wún e’n, maan e nin aɲinyiɛ fata. Kpɛkun, maan e yaci aɲia’n i nzɔliɛ nga e fa ta e wue nun’n i lɛ. I sɔ’n yó maan bé síe i nzɔliɛ kɛ e ti e liɛ ngunmin naan e yo ɲɛnmɛn.
7 E mian ukafuɛ wun: Kɛ ɔ ko yo naan aɲia’n w’a yo ye’n, ɔ fata kɛ sran kaka fɛ i wun wlɛ i i bo lɔ junman’n i dilɛ nun. ?Amun a fa ajalɛ kɛ amún dí junman sɔ’n wie? (Jue. 110:3) Junman nga e di i e aɲia dandan’m be yowlɛ lika’m be nun’n, ɔ ti Ɲanmiɛn liɛ wie. Asa, ɔ yo maan be bo e dunman fɛ. Wafa nga aniaan wie’m be klɛnnin be wun be yoli aɲia dandan yowlɛ sua kun i yɛinyɛin’n, ɔ boli bian nga sua sɔ’n wo i sa nun’n, i nuan. Ɔ maan, ɔ klɛli ndɛ ng’ɔ o yɛ’n: “Min waan ń lá amun ase ɔ nin yialɛ nga kɛ amun yiali mɔ amun sanndili’n, lika’n yoli weiin kɛ nga sa’n. N nin a wunmɛn i wunsu le. E junman nga e di nun’n, be kɛn i titi kɛ Zoova i Lalofuɛ’m be nin sran nga’m be timan kun. Naan, kɛ be wie be aɲia dan’n kun yo mɔ be sanndi’n, lika’n yo weiin tra wafa nga kɛ bé bá’n lika’n fa ti’n. Naan, be nin i finman andɛ. Sanngɛ blɛ liɛ’n, m’an wun i ɔ. Amun nin amun anuannzɛ’n amun bo yoli kun be yoli lika nga klanman mannin e kwlaa. Be nga be dili junman klanman sɔ’n kusu’n, e nin a wunman sran aɲinyiɛfuɛ kɛ be sa le.”
8 E kwla ɲan jasin fɛ’n bolɛ i wun atin: Sran nga be o klɔ nga é yó aɲia dan’n su lɔ’n, bé wá síe aɲia’n i fluwa nga e fa ta e wue nun’n, i nzɔliɛ. Kpɛkun, bé síe i nzɔliɛ kɛ e wlawla e wun yɛ e siesie e wun kpa. I sɔ’n yó maan bé úsa be wun kosan. Yɛ e kusu, é ɲán atin é kán aɲia’n i ndɛ klé be. Cɛn kun, kɛ aɲia’n wieli’n, ba yasua kun m’ɔ le afuɛ nnan ɔ nin i si nin i nin be ɔli aliɛ diwlɛ kun nun. Fluwa ng’ɔ fiteli uflɛuflɛ aɲia’n bo lɔ’n, ba’n fɛli i liɛ’n fa kleli bla ng’ɔ sɔli be nun’n aliɛ diwlɛ nun lɔ’n. I sɔ’n yoli maan i si nin i nin be yiali bla’n aɲia’n bo.
9 Laa cɛn nga Izraɛlifuɛ’m be di’n, ɔ ka Zuifu nga be klo Ɲanmiɛn ndɛ’n be ngunmin’n, cɛn sɔ’m b’a ju. (Mml. 16:15) Ajalɛ kwlaa nga Zezi nin i si nin i nin ɔ nin i niaan’m be ko fa naan b’a tran cɛn sɔ’m be bo’n, be fa be aklunjuɛ su. E kusu, e klun jɔ e nvle kun aɲia’m be su sɔ wie. Afin, e bu be kɛ be ti like mɔ e Si m’ɔ o nglo lɔ m’ɔ klo e’n, ɔ fa cɛli e ɔ. (Zak 1:17) Afuɛ kwlaa nun’n, aklunjuɛ yɛ e di i Zoova sulɛ’n nun blɛ sɔ’n nun ɔn. Bikisa yɛ ɔ fata kɛ e siesie e wun naan blɛ sɔ’n w’a ju ɔ!
[Kosan mun]
1. ?Wafa sɛ yɛ laa Izraɛlifuɛ’m be cɛn dilɛ’n ɔ nin e nvle kun aɲia nga e yo be andɛ’n, be fa be wun ɔn?
2. ?Kɛ é síesíe e wun naan y’a ɔ e nvle kun aɲia ng’ɔ́ bá lɛ’n bo’n, ngue yɛ ɔ fata kɛ e bu i akunndan ɔn?
3. ?Ngue ti yɛ e kwla se kɛ Izraɛlifuɛ’m be cɛn dilɛ blɛ mun be ti blɛ mɔ be kwla tran aniaan tranlɛ ɔ?
4. ?Ngue yɛ e kwla yo m’ɔ́ klé kɛ e niaan Klistfuɛ mɔ e nin be kwla tran aniaan tranlɛ’n, be ti e cinnjin ɔn?
5. ?Ngue yɛ é yó naan aɲia’n i bo lɔ ndɛ’n kwlaa nga bé wá kan’n, i wie fi w’a to w’a fuanman e ɔ?
6. ?Kɛ é wláwlá e wun mɔ é síesíe e wun’n, ngue yɛ ɔ fataman kɛ e ɲin kpa su ɔ?
7. ?Ngue ti yɛ ɔ fata kɛ e kunndɛ kɛ é fá e wun wlá aɲia dandan’m be bo lɔ junman’m be dilɛ nun wie ɔ?
8. ?Klɔ nga é yó aɲia’n su’n, jasin fɛ’n bolɛ i wun atin benin yɛ e kwla ɲɛn i ɔ?
9. ?Wafa nga Zezi nin i si nin i nin ɔ nin i niaan’m be bu yialɛ nga Zoova yia be’n, wafa sɛ yɛ e kwla nian su ɔ?