Nvle kun aɲia’n: Like ng’ɔ fata kɛ e yo’n

◼ Aɲia’n i dɔ’n: Nglɛmun nun dɔ 8:00 su yɛ bé tíke anuan mun ɔn. Cɛn nsan nga bé yó aɲia’n, nglɛmun nun dɔ 9:20 su’n, bé bó miziki. Kɛ bé bó miziki’n, maan e kwlaa e kunndɛ ase tranwlɛ. I liɛ’n, é kwlá bó aɲia’n i bo klanman. Ya cɛn nin Fue cɛn’n, aɲia’n wíe nnɔsua nun dɔ 5:00 su. Kpɛkun Mɔnnɛn cɛn’n, ɔ́ wíe nnɔsua nun dɔ 4:00 su.

◼ Maan e to jue e manman Zoova: Laa’n, Zoova i sufuɛ’m be toli jue be fa mɛnmɛnnin i. Andɛ kusu’n, jue tolɛ’n ti cinnjin kpa Ɲanmiɛn i sulɛ’n nun. (Jue. 28:7) E nvle kun aɲia kwlaa bo i bo nin miziki. Nán ngbɛn ti yɛ be bo miziki’n niɔn. Miziki sɔ’m be uka e Zoova sulɛ’n nun. Ɔ maan kɛ aɲia’n i siesiefuɛ’n se kɛ be su wa bo miziki’n, maan e kunndɛ ase tranwlɛ, yɛ e gua bliin naan e tie. Kɛ e yo sɔ’n, e kle kɛ aniaan nga anuannzɛ’n fa be kɛ be siesie jue nga e to be’n be su miziki’n, e bu be junman’n i like dan. Afin afuɛ kwlaa nun’n, aniaan sɔ’m be tu ajalɛ kpɛ nɲɔn be kɔ Amlɛnkɛn’m be klɔ nga be flɛ i Patɛrsɔnu’n su lɔ, be ko siesie miziki fɛfɛ sɔ mun. Be bɔbɔ yɛ be tua be loto kpa’n niɔn. Kɛ e ko wie miziki’n i tie’n, maan e kwlakwla e bo yo kun e to jue e manman Zoova.

◼ Loto’m be jranwlɛ’n: Sɛ aniaan mun yɛ be nian loto jranwlɛ’m be su’n, kɛ loto’m bé bá’n, nn bé klé be jranwlɛ. Kɛ mɔ wie liɛ’n loto jranwlɛ’n timan dan’n ti’n, sɛ be nga be le loto’n, be nun wie mun be nuan sɛ su be fu loto kunngba nun’n, ɔ fluman tra kɛ sran kun fɛ i loto liɛ’n. Loto nga fɔlɛfuɛ o nun’n, be sieli be jranwlɛ ngunmin. Ɔ maan loto nga be le nzɔliɛ like kun m’ɔ kle kɛ fɔlɛfuɛ wie o nun’n, be ngunmin cɛ yɛ be kwla ko jran lɔ ɔ.

◼ Tranwlɛ’n: Kɛ be ko tike e aɲia’n yowlɛ’n i anuan’n, nán maan e nin e niaan mun e kpli bia mun. Maan e bu e wiengu’m be sran. Nán e bu e ngunmin e wun akunndan. Kɛ e buman e ngunmin e wun akunndan’n, e kle kɛ e ti Klistfuɛ kpa. Kpɛkun, i sɔ’n manman Ɲanmiɛn. (Zan 13:34, 35; 1 Kor. 13:5; 1 Piɛ. 2:12) Be nga e nin be e tu ajalɛ’n, annzɛ e nin be e tran awlo kunngba’n nun’n, annzɛ e kle be Biblu’n nun like’n, be ngunmin cɛ yɛ e kwla kunndɛ tranwlɛ e sie be ɔ. Sɛ w’a yoman kɛ y’a sie sran kun bia’n, nán maan e fa like e sie i bia kun su sa ngbɛn. I liɛ’n, be nga be nin a ɲanman tranwlɛ’n, bé kwlá trán ase. Kpɛnngbɛn mun nin be nga be ti tukpacifuɛ’m be le be tranwlɛ liɛ ngunmin. Kɛ mɔ be tranwlɛ’n i nun bia’m b’a sɔnman’n ti’n, sran kun annzɛ sran nɲɔn nga be nian be lika’n, be ngunmin yɛ ɔ fata kɛ be nin be tran lɔ ɔ.

◼ E wun wlawlalɛ’n: Aɲia’n i bo lɔ’n, maan e wlalwla e wun kpa. Nán maan e wun wlawlalɛ’n yo sukusuku kɛ be nga be suman Zoova’n be liɛ’n sa. (1 Tim. 2:9) Aofuɛ sua nga be sikeli e nun’n, sɛ é wlú lɔ o annzɛ é fíte’n o, annzɛ kusu sɛ e su yiyi e ɲin su o, maan e wlawla e wun kpa. I liɛ’n, e su sisiman e bo naan y’a fa e nzɔliɛ fluwa’n y’a ta e wue’n nun. Kpɛkun, sɛ e ɲan jasin fɛ’n bolɛ’n i wun atin’n, ɲannzuɛn su kunman e. Sɛ e wlawla e wun kpa naan e nzuɛn’n kusu ti kpa wie’n, be nga be awlɛn ti kpa’n bé fá be ɲin síe i Biblu’n nun ndɛ m’ɔ man nguan’n su. Asa ekun’n, Zoova bɔbɔ klun jɔ́.​—Sof. 3:17.

◼ Nán e ajulisu mannzin’m be kle sran’m be yalɛ: Kɛ ɔ ko yo naan e selilɛli’n w’a tɛman naan w’a kleman sran’m be yalɛ’n, maan e nuɛn i, annzɛ e to i amule. Sɛ e waan é fá ninnge nga be yo be aɲia’n i bo lɔ’n, é síe i e kamela annzɛ mannzin uflɛ wie su’n, maan e yo i ngwlɛlɛ su. I liɛ’n, e su kataman aniaan’m be ɲrun. Asa ekun’n, kɛ bé yó aɲia’n, nán maan e klɛ ndɛ wie e selilɛli nun, annzɛ e ɔrdinatɛli su e ko man sran uflɛ.

◼ Amindi su aliɛ’n: Sɛ e fa aliɛ e awlo lɔ e ba aɲia’n i bo’n, ɔ flunman tra kɛ wunmiɛn lolɛ blɛ nun’n, e ko kunndɛ aliɛ gua su lɔ. Nán maan ninnge nga e aliɛ’m be o nun’n, be yo dandan ngboko. I liɛ’n, e kwla fa be sie e bia’m be bo. Ninnge nga sɛ be tɔ ɔ, be kwla bo’n, nán maan e fa be.

◼ Be klunklo like manlɛ’n: Aɲia’n i bo lɔ’n, e kwla man e klunklo like. Kɛ e yo sɔ’n, e kle kɛ e suan junman nga annuanzɛ’n di naan y’a kwla yo aɲia dandan mun mɛn wunmuan’n nun’n i bo. Sɛ sran wie kunndɛ kɛ ɔ́ mán sɛki’n, (chèque) ɔ fata kɛ ɔ klɛ su kɛ “Association Cultuelle Les Témoins de Jéhovah de Côte d’Ivoire.” Asɔnun kpɛnngbɛn’m be kwla kle e ajalɛ ng’ɔ fata kɛ e fa’n. Sɛ sran wie kusu waan ɔ́ mɛ́n i klunklo like wafa uflɛ’n ɔ kwla man.

◼ Be wun ayre yolɛ’n: Aɲia’n i bo lɔ’n, be su manman sran ayre. Ɔ maan, sɛ sran kun si kɛ ɔ kpinndinman’n, kɛ ɔ́ bá’n, maan ɔ fɛ i ayre mun. Maan be nga be le tukpacɛ nga be flɛ i kɛ diabɛti’n, be fa ninnge nga be fa yoli be wun ayre’n, be guɛ i wla guawlɛ kun m’ɔ ti i sɔ ninnge’m be guawlɛ’n nun. Nán maan be fa guɛ i wla guawlɛ onga’m be nun, annzɛ be yaci be aofuɛ sua nga be sikeli be lɔ’n nun.

◼ Maan e nian e wun su: Nán maan e yo naan sran wie seli annzɛ ɔ tɔ. Afuɛ nuan kwlaa’n, ngbabua nga sran’m be wla’n ti’n, be yo be wun like yaya. I li ngbabua nga be bo ti tɛnndɛn’n yɛ be yi sran’m be ase ndɛndɛ’n niɔn. I sɔ’n ti’n, ngbabua nga e si kɛ, sɛ e wla’n ɔ su kleman e yalɛ’n, yɛ ɔ fata kɛ e wla ɔ.

◼ Be nga be timan sa kpa’n: Ndɛ nga bé kɛ́n aɲia’n i bo lɔ’n, be kwla tie i aladio nun wie. Sɛ amun kunndɛ kɛ amún tíe’n, kɛ amún bá’n, amun fa mannzin kun m’ɔ fa aladio’n ɔ nin i ɲanman mɔ be fa wla be su nun’n be bla.

Palifɛn mun: Lika sunman nun’n, e yo e aɲia’n i sua wie nun. I sɔ ti’n, sɛ e wan e bobo palifɛn nga be bɔn fiaan’n, maan e yo i ngwlɛlɛ su. Afin ɔ kwla kle be nga be kpinndinman’n be yalɛ. Kɛ e yo sɔ’n e kle kɛ e klo e nian mun.—1 Kor. 10:24.

◼ Fluwa Veuillez suivre l’intérêt (S-43): Sɛ e bo jasin fɛ’n e kle sran kun naan ɔ sɔ nun klanman’n, maan e klɛ sran sɔ’n i su ndɛ fluwa Veuillez suivre l’intérêt su. Kpɛkun aɲia’n i bo lɔ’n, maan e fa man anian nga be nian e fluwa uflɛuflɛ’m be su’n mun. Annzɛ kɛ e ko sa e sin’n, maan e fa man e asɔnun’n i fluwa klɛfuɛ’n.

◼ Aliɛ diwlɛ’m be nun: Kɛ e kɔ aliɛ diwlɛ’m be nun’n, maan e ayeliɛ’n manman Zoova. Wafa nga e wlawla e wun’n, maan ɔ nin Klistfuɛ fata. Sɛ amun lika liɛ’n nun lɔ’n, sran’m be tɛ i sɔ yo’n, maan amun man be nga be fa aliɛ’n be blɛ amun’n, be sika kan.

◼ Aofuɛ sua mun:

(1) Nán maan sua nga amun wla be bo’n, be tra nga amun miɛn be wun sakpa’n. Kpɛkun, nán maan sran nga bé lá sua ba kun nun’n, be sɔn tra sran nga be le atin la nun’n.

(2) Sɛ nán kɛ sanvuɛsa wie ti’n, nán amun se aofuɛ sua’n i sunianfuɛ’n kɛ amun su laman sua’n nun kun. Sɛ amún sé i sɔ kusu’n, amun bo su kle i ndɛnndɛ. I liɛ’n ɔ kwla fa sua’n man sran uflɛ. (Mat. 5:37) Asa ekun’n, sɛ ɔ nin i fata kɛ ɔ man amun fluwa kun m’ɔ kle kɛ amun su faman sua’n kun’n, maan ɔ man amun. Sanngɛ sɛ amun minndɛ lele naan ɔ ka cɛn nɲɔn kwlaa naan amun a se kɛ amun faman sua’n kun’n, be su yiman amun sika’n.

(3) Wie liɛ’n, amun kwla sin ɛntɛnɛti su, annzɛ amun kwla fa like nga be flɛ i blɔfuɛ nun kɛ carte de crédit be fa tua aofuɛ sua’n i ti sika’n. Sɛ ɔ ti sɔ’n, maan amun si kɛ wie liɛ’n, be kwla uka sua’n i sika nga be boli’n su. I liɛ’n, sɛ amun saci like wie lɔ’n, bé fá sika’n sɔ’n bé túa. Kɛ amún jáso aofuɛ sua’n nun’n, ɔ́ dí le nɲɔn kun naan b’a yi sika nga be fa guali su’n b’a man amun.

(4) Blɛ mɔ amún wá súa amun trɔ mun’n, i nun yɛ ɔ fata kɛ amun fa kakaklolo’n niɔn. Yɛ kɛ amun ko wie i yo’n, amun fa sa be sin ndɛndɛ naan sran uflɛ fa di i junman liɛ.

(5) Sɛ amun nvle liɛ’n nun lɔ’n be tɛ i sɔ yo’n, amun man be nga be sua amun trɔ mun, annzɛ be nga be nian su’n be sika kan.

(6) Sɛ aofuɛ sua’n i sunianfuɛ’n w’a manman amun atin’n, nán amun tɔn aliɛ sua’n nun lɔ.

(7) Akpasua wie be nun’n, be man aofuɛ’m be aliɛ kan annzɛ kafe kan. Sɛ ɔ ti sɔ’n, maan amun yo aliɛ sɔ’m be cɛcɛ.

(8) Maan amun nin aofuɛ sua’n i nun junman difuɛ’m be tran klanman blɛ kwlaa nun. Sɛ amun tra amun awlɛn be yo i sɔ’n, ɔ́ yó be fɛ kpa afin ɔ fata kɛ be nian sran kpanngban lika.

(9) Maan siɛ nin niɛn’m be nian be mma’m be su kpa blɛ kwlaa nun.

(10) Aofuɛ sua’m be gua’n, ɔ o fluwa kun su. (Liste des lieux d’hébergement recommandés) Sɛ sika nga be se amun kɛ amun tua’n, ɔ tra sika sɔ’n, nán amun kplin su. Amun bo su kle aniaan nga be kunndɛ lawlɛ be man be nga be bali aɲia’n i bo’n.

(11) Kɛ e o aofuɛ sua’n nun lɔ’n, sɛ sa kekle wie ju’n, kɛ e ju nvle kun aɲia’n bo’n lɔ’n, maan e kan kle aniaan nga be kunndɛ lawlɛ be man be nga be bali aɲia’n i bo’n.

◼ Be klunklo junman dilɛ’n: Sran kwlaa ng’ɔ kunndɛ kɛ ɔ́ dí junman aɲia’n i bo’n, maan ɔ ko wun aniaan nga be o biolo ng’ɔ nian be klunklo junman dilɛ su’n be wun. Ba kanngan nga be nin a ɲanman afuɛ 16 be kwla di junman wie. Sanngɛ, ɔ fata kɛ be si annzɛ be nin nian be su. Sɛ kusu sran uflɛ yɛ ɔ fata kɛ ɔ nian be su’n, maan be si annzɛ be nin kplin su ka.