Ayeliɛ ng’ɔ manman Ɲanmiɛn’n
1. ?Ngue ti yɛ kɛ Zoova i Lalofuɛ’m bé yó be nvle kun aɲia mun’n, be wlɛ wunlɛ yoman ya ɔ?
1 Kɛ é yó e nvle kun aɲia mun’n, sran’m be wun i sɔ liɛ’n i wlɛ. Lika kpanngban nun’n, be bo e nvle kun aɲia’n i jɔ kle klɔfuɛ mun zronali nin aladio’m be nun. Klɔ’n sufuɛ’m be sie i nzɔliɛ kɛ aɲia’n i su fluwa’n ta aofuɛ’m be wue nun. Ɔ maan ninnge nga é wá kán be ndɛ yɛ’n bé wá kpɛ́n e wla naan kɛ e o klɔ nga é yó e nvle kun aɲia’n i su’n, e ayeliɛ kpa’n w’a manman Ɲanmiɛn.—1 Piɛ. 2:12.
2. ?Klɔ nga é yó e nvle kun aɲia’n su’n, wafa sɛ yɛ e wun wlawlalɛ nun’n e kwla manman Ɲanmiɛn ɔn?
2 Maan e wlawla e wun kpa: Kɛ e wlawla e wun kpa e kɔ e aɲia’n i bo’n, i sɔ’n yo sran’m be ɲɛnmɛn. Sanngɛ like uflɛ yolɛ nun’n, wafa nga e wlawla e wun’n kwla ɲan ta kpa ekun e wun akunndan nga sran’m be bu’n su. I wie yɛle blɛ mɔ é kɔ́ like diwlɛ’m be nun’n, annzɛ kɛ é kɔ́ gua dilɛ’n, ɔ nin like uflɛ ekun yolɛ’n. Kannzɛ bɔbɔ e wlawlaman e wun kɛ e su kɔ aɲia’m be bo sa’n, sanngɛ ɔ fata kɛ e wla tralɛ kpa. Maan be nga bé wún e’n be wun i wlɛ kɛ e nin be nga be suman Ɲanmiɛn’n, ngbaciɛ o e afiɛn. (Rɔm. 12:2) Asa’n, maan e fa aɲia’n i nzɔliɛ like’n e ta e wue nun. I liɛ’n, i sɔ’n bó e nvle kun aɲia’n i jɔ. Asa kusu’n, i sɔ’n mán jasin bolɛ wun atin, kpɛkun e niaan uflɛ nga be ti aofuɛ’m be kwla wun e wlɛ.
3. ?Wafa sɛ yɛ e kwla yi awlɛn tralɛ’n, ɔ nin sran’m be sran bulɛ’n i nglo ɔ?
3 Maan e tra e awlɛn naan e bu sran’m be sran: Blɛ nga e o nun yɛ’n i nun’n, mɛn’n nunfuɛ’m be bu be bɔbɔ be wun akunndan kpɛkun be siman ye. Ɔ maan sɛ e tra e awlɛn naan e bu e wiengu’m be sran’n, wafa nga i sɔ’n yó like diwlɛ’m be nun junman difuɛ’m be fɛ’n, maan e bu i akunndan kan e nian! (2 Tim. 3:1-5) Aɲia’n i bo lɔ’n, kɛ é fá bia é síe e fuɛ mun’n, annzɛ kɛ é lɔ́ngɔ é kó fá ninnge uflɛuflɛ nga anuannzɛ’n yi be’n, ɔ fataman kɛ e bu e ngunmin e wun akunndan. Sanngɛ maan e bu e wiengu’m be akunndan. (1 Kor. 10:23, 24) Kpɛ klikli nga sran kun mɔ Ɲanmiɛn ndɛ loli i’n trannin nvle kun aɲia kun bo’n, ndɛ ng’ɔ kannin’n yɛ: “Cɛn sɔ’n nun’n, ndɛ nga be kɛnnin i ijɔlɛ’m be nun’n, wie fi w’a kaman min klun. Sanngɛ Zoova i Lalofuɛ’m be ayeliɛ kpa’n i liɛfuɛ’n, min wla su fiman su le.”
4. ?Ngue ti yɛ sɛ e le i wun atin’n, ɔ fata kɛ e bu junman nga be klunklo su be di’n i akunndan ɔn?
4 Maan e klunklo su e di junman: Klunklo su like yolɛ’n ti Klistfuɛ kpa’m be nzuɛn kun mɔ be fa sie be nzɔliɛ ɔ. (Jue. 110:3) ?Junman nga e nvle kun aɲia’n kpɛ i ba’n, amun klunklo su amun kwla di wie? Nvle kun aɲia kun bo’n, ka naan aɲia’n w’a bo i bo’n aniaan kɔe 600 be klunklo su be yoli lika’n i yɛinyɛin. Ndɛ nga lika’n i sunianfuɛ’m be kannin’n yɛ: “Nanwlɛ, e nin a wunman like kɛ nga sa le! Kɛ e wun kɛ be kwlaa nga be o yɛ’n, be klunklo su yɛ be di junman’n, i lɛfuɛ’n ɔ bo e nuan.” E su minndɛ kpa kɛ afuɛ 2013 nun e nvle kun aɲia liɛ’m be ju ndɛndɛ naan e tie Ɲanmiɛn ndɛ’n, naan Ɲanmiɛn kle e like. Sanngɛ nɛ́n i ngba ɔ. Yɛle kɛ e su minndɛ kpa kɛ be ju naan e manman Ɲanmiɛn.