‘Maan sran’m be kwlaa be wun i wlɛ kɛ Ɲanmiɛn dunman’n ti sanwun’
1. ?Afuɛ 2012 nun akpasua kun aɲia’n i flɛlɛ’n yɛle benin? ?Yɛ Biblu’n nun ndɛ mma benin su yɛ ɔ taka ɔ?
1 Nanwlɛ, Zoova m’ɔ sie nglo nin asiɛ’n, i dunman’n m’ɔ o e su’n, ɔ ti e cenjele like dan o! Ɲanmiɛn bɔbɔ yɛ ɔ fɛ i dunman’n sieli e su ɔ. Afuɛ 1931 nun yɛ be sieli e nzɔliɛ kɛ e ti Zoova i Lalofuɛ ɔ. (Eza. 43:10) Zezi m’ɔ ti Ɲanmiɛn i Wa kunngba cɛ’n, ɔ yoli maan Ɲanmiɛn dunman’n yoli sanwun. Ɲanmiɛn srɛlɛ’n nga Zezi kleli i sɔnnzɔnfuɛ mun nun’n, ɔ dun mmua seli kɛ maan Ɲanmiɛn dunman’n yo sanwun. (Mat. 6:9, NW) Zezi i ndɛ sɔ’n su yɛ afuɛ 2012 nun akpasua kun aɲia’n i flɛlɛ’n taka ɔ. I flɛlɛ sɔ’n yɛ: “Maan sran’m be kwlaa be wun i wlɛ kɛ Ɲanmiɛn dunman’n ti sanwun.”
2. ?Ijɔlɛ benin yɛ é tíe be aɲia’n i bo lɔ ɔ?
2 Ijɔlɛ nga é tíe be’n: Fue cɛn’n, ijɔlɛ nga be flɛ i “An fa amun wun wla blɛ kwlaa nun Ɲanmiɛn junman’n dilɛ’n nun naan sran’m be si Ɲanmiɛn” ɔ́ kán like nga ti yɛ blɛ kwlaa nun Ɲanmiɛn junman dilɛ’n, ɔ ti mɛn dilɛ kpa kun’n i ndɛ. Asa ekun’n, Ijɔlɛ nga be kpɛkpɛli nun’n mɔ be flɛ i kɛ “Nán maan e aeliɛ’n saci Ɲanmiɛn dunman’n” ɔ́ úka e naan y’a tɔman aya nnan nun. Be flɛ ijɔlɛ kun kɛ “?Ngue ti yɛ ɔ fata kɛ sran’m be kwlaa be kle kɛ Ɲanmiɛn i dunman’n ti sanwun ɔn?” Ijɔlɛ sɔ’n klé e like ng’ɔ fata kɛ e yo naan y’a bo jasin fɛ’n y’a kle be nga ndɛ’n yoman be fɛ kaan sa bɔbɔ’n. Ɔ́ úka e naan e jasin fɛ’n bolɛ’n w’a ba nvlɛ. Mɔnnɛn cɛn’n, wafa nga e akunndan’n nin e ijɔlɛ nun, ɔ nin e ajalɛ nga e fa be’n nin e aeliɛ’n nun’n, e kwla yo Ɲanmiɛn dunman’n i sanwun’n, ijɔlɛ kun mɔ be kpɛkpɛli nun nnan’n, ɔ́ wá yíyí nun. Nzra nun ijɔlɛ’n nga be flɛ i “Armagedɔn alɛ’n maan Zoova yí i nglo kɛ i dunman dan’n ti sanwun” ɔ́ wá yó be nga bé bá aɲia’n bo uflɛuflɛ’n be fɛ kpa.
3. ?Cenjele like dan benin yɛ e le i ɔ? ?Yɛ wafa sɛ yɛ aɲia’n úka e ɔ?
3 Ɔ ka kaan sa’n, Zoova wá yó i dunman’n i sanwun. (Eze. 36:23) Ka naan i blɛ’n w’a ju’n, e cenjele like dan nga e le i’n, yɛle kɛ like kwlaa nga ɔ kan Zoova i dunman’n, maan e suɛn i bo. E lafi su kpa kɛ akpasua kun aɲia nga, ɔ́ wá úka e ngba nga Ɲanmiɛn dunman’n o e su’n, naan y’a wla e wun ase y’a di e Ɲanmiɛn junman’n kpa.