E Ɲrun dinfuɛ’m be anuannzɛ’n i fluwa ng’ɔ klɛli e’n

E niaan kpa mun:

Asasi Ɲanmiɛn Zoova i dunman m’ɔ o e su’n, nanwlɛ, ɔ ti e cenjele like dan! Dunman wie fi nin i sɛman, ɔ́ ká lɛ tititi, i osu su nunnunman le. Zoova bɔbɔ yɛ ɔ fɛli i dunman’n fa sieli e su ɔ. Kɛ ɔ fɛ i afuɛ nga be flɛ i 1931 nun’n, i yɛ be fa sie e nzɔliɛ siɛn ɔn. (Eza. 43:10) Ɲannzuɛn kunman e mlɔnmlɔn kɛ e se sran’m be kɛ e ti Zoova i Lalofuɛ’n. E fa di e nuan bɔbɔ.

Aliɛ ba blu nin nso nun’n, mmusu’m be si Satan yo like kwlaa ng’ɔ kwla yo naan Ɲanmiɛn i dunman’n w’a mlin. Ɔ wlawla sran mun naan Zoova i dunman’n yo be kain. Babilɔni klɔ dan’n mɔ yɛle Ɲanmiɛn sulɛ wafa kwlaa ng’ɔ timan su’n, i ɲin ci Ɲanmiɛn dunman’n. I sɔ’n ti’n, ɔ yoli maan be wunmɛn i osu Biblu’n sunman nun. Sanngɛ Zezi liɛ’n w’a yoman sɔ. Ɔ buli i Si’n i dunman’n i like dan. Ɔ maan Ɲanmiɛn srɛlɛ ajalɛ ng’ɔ kleli i sɔnnzɔnfuɛ mun nun’n, i yɛ ɔ boli su klikli ɔ. Ɔ seli kɛ: “I sɔ’n ti’n, amun liɛ’n, an se kɛ: ‘E Si m’ɔ o ɲanmiɛn su lɔ’n, maan ɔ dunman’n ɔ yo sanwun.’” (Mat. 6:9, NW) Blɛ uflɛ nun’n, ɔ tuli i klun srɛli i Si kɛ: “N fa ɔ dunman’n kleli sran mɔ a fa be mɛn’n nun mannin min’n.” (Zan 17:6, NW) E kusu’n, e kunndɛ kɛ é bó Zoova i dunman’n i ndolo juejue su asiɛ’n wunmuan su. Naan é yó i sɔ kpa tra laa’n. Afin Zezi i ajalɛ kpa’n su yɛ e kunndɛ kɛ é nían ɔn.

Afuɛ sin Biblu’n nun ndɛ mma’n waan “E kan Ɲanmiɛn Ndɛ’n e guɛguɛ i bo.” Ndɛ sɔ’n wlali e fanngan naan y’a guagua e jasin fɛ’n bolɛ junman’n i bo. (Yol. 20:24, NW) Zoova kusu rali e awlɛn mɔ e trali’n su kpa. Mɛn’n wunmuan nun’n, sran kpanngban kpa be tili jasin fɛ’n, ɔ maan Zoova i dunman’n fuli. Jasin fɛ’n bofuɛ’m be wa yoli sran 7.313.173. Be nuan nin a juman sɔ le. Be boli jasin kleli sran’m be kwlaa yɛ be nga be kunndɛ kekle m’ɔ o be su cɛn kwlaa i trawlɛ’n mɔ be awlɛn ti kpa’n, be kleli be Ɲanmiɛn ndɛ’n. Sran 18.168.323 be trannin E Wla Kpɛnlɛ Cɛn Aɲia’n i bo. I sɔ’n kle kɛ sran akpinngbin ko yo wie be o lɛ mɔ atrɛkpa’n bé bó flɛ́ Zoova kwlaa naan mɛn’n tɛ nga e o nun yɛ’n w’a nunnun.

É bó Ɲanmiɛn Sielɛ’n i jasin fɛ’n lele naan Zoova w’a nunnun mɛn’n. Yɛ like kwlaa nga e ko yo naan sran nga be o e jasin bowlɛ’n nun’n b’a ti jasin fɛ’n yɛ é yó ɔ. (Mat. 24:14; Mar. 13:10) I sɔ’n ti’n aniaan mun’n, maan e kwlaa e mian e ɲin e yo naan sran pɛ lika si Zoova i dunman’n nin i klun sa’n. Sɛ awlo­awlo’m be nun o, sɛ akpɔ’m be nuan o, sɛ telefɔnu nun o, sɛ fluwa yɛ é klɛ́ sran mun o, sɛ e ɲan jasin fɛ’n bolɛ i wun atin’n lika wie o, maan e mian e ɲin e yo sɔ.

E lafi su kɛ cɛn nga Zoova wá yó maan i dunman’n yó sanwun’n, ɔ nunman mmua kun. E lafiman su ngbɛn kusu. (Eze. 36:23) Be nga be saci i dunman’n, be nunnunlɛ w’a mantan koko kpa. Nanwlɛ, kɛ ɔ ko yo sɔ’n, Zoova i sufuɛ nanwlɛfuɛ mɔ be yili i dunman’n i nglo mɔ be jrannin i sin afin be lafili su kɛ ɔ ti Asasi’n, bé bó sró!

E Nvle kun aɲia nin e Nvlenvle’m be aɲia mɔ be flɛ i “Maan e tran minndɛ” mɔ e yoli i’n mɛn’n wunmuan nun’n afuɛ sin’n, be kle weiin kɛ Zoova nian i sran’m be lika klolɛ su. Ɲanmiɛn junman nga e dili i lele fa ju andɛ’n i nun’n, ɔ ti mɔ e sie aɲia sɔ’m be nzɔliɛ ngunmin kun. Afin, be kleli e kɛ ɔ ti cinnjin kpa kɛ e tran e minndɛ Zoova i cɛn’n.—Mar. 13:37; 1 Tɛs. 5:1, 2, 4.

Nanwlɛ, Zoova yo e kpa. I maan aklunjuɛ’n kun e kpo. Ɔ yo maan e lo wunmiɛn lika mɔ ijre nɔnman o lɛ’n nun. Nzue ba bɔ be nuan ti fɔun’n, lɛ yɛ ɔ fa e kɔ ɔ.—Jue. 23:1, 2; 100:2, 5.

Zoova mɔ kɛ é sé yɛ ɔ ra amun su’n, maan amun lafi su kɛ sɛ anglo nga be ba amun ɲrun lɔ’n be nun sɛ amun a yaciman i junman i dilɛ’n, i kusu su yaciman amun su ralɛ.

Aniaan mun’n, maan an si kɛ e klo amun kpa,

Amun niaan mun,