**Maan e bo jasin fɛ’n i kpa tra laa: Maan e fa fluwa Biblu’n kle e man sran mun**

?Ngue ti yɛ ɔ ti cinnjin ɔn? Fluwa Biblu’n kle ti fluwa nga e fa kle sran’m be like’n, be nun cinnjin kpa kun. Sanngɛ kwlaa naan e nin sran kun y’a suan i nun like’n, ɔ fata kɛ e dun mmua e fa mɛn i. I sɔ’n ti’n, ɔ fata kɛ e ngba e si wafa nga e kwla fa fluwa sɔ’n e man sran mun’n i kpa. (Nya. 22:29) I fa manlɛ’n i wun ajalɛ’n sɔnnin. Ajalɛ nga jasin bofuɛ kun fa m’ɔ wun kɛ i bo gua kpa’n, yɛ ɔ fata kɛ ɔ fa ɔ.

?Wafa sɛ yɛ é yó i sɔ ɔ?

Maan e fa kosan fɛfɛ kpa kun m’ɔ kwla yo naan y’a fa sran’n i ɲin y’a sie i fluwa’n i nun ndɛ tre kun su’n, e usɛ i. Lika nga ndɛ tre’m be bo be bo lɛ’n, kosan wie’m be o lɛ. E kwla fa be nun kun e usɛ i. Kɛ sran ko tɛ su’n, maan e kanngan Biblu’n nun ndɛ mma kun m’ɔ nin ndɛ nga e su kan’n be kɔ likawlɛ’n. I sin’n, maan e fa ndɛ kpɔlɛ kun m’ɔ yiyi ndɛ’n nun’n, e kle i. Kpɛkun, e kwla koko i su yalɛ kan.
I kun ekun yɛle kɛ kwlaa naan y’a to ndɛ tre klikli’n, ndɛ nga be fa fitili fluwa’n su’n, e kwla fa be nun kun e kle sran’n. Kpɛkun i sin’n, e fa fluwa’n i bue nga i su yɛ Biblu’n yiyi nun’n, e kle i. I wie yɛle kɛ, e kwla bo sanvuɛsa kun m’ɔ juli koko nun wa’n mɔ be kɛn i ndɛ’n, i su. Kpɛkun e se i kɛ sa sɔ’n ti’n, sran kaka be fali kosan nga be o fluwa’n i bue 3 su’n, be usali be wun. Annzɛ kusu’n, e kwla se sran’n kɛ e su nian sran’m be osu naan e kan wafa nga asiɛ’n su tranlɛ’n wá yó fɛ’n i ndɛ é klé be. I sin’n, maan e fa desɛn nga be o fluwa’n i bue 4-5 su’n e kle i naan e usɛ i kɛ: “?Ninnge nga Ɲanmiɛn seli kɛ ɔ́ yó be wa yɛ’n, beninfuɛ’n yɛ a klo kɛ ɔ yo ɔ?” I kun ekun yɛle kɛ, e kwla se sran’n kɛ e su nian sran’m be osu naan e uka be naan be si kosan cinnjin wie mun mɔ be fa usa be wun’n be su tɛlɛ’n. I sin’n, maan e fa kosan nga be o fluwa’n i bue 6 su’n e kle sran’n kpɛkun e usɛ i kɛ: “?Beninfuɛ’n yɛ ɔ ti ɔ cinnjin ɔn?”
E kwla kan Biblu’n nun like suanlɛ’n i ndɛ trele e kle sran’n. E kwla se i kɛ: “Fluwa ng’ɔ o yɛ’n, be fa suan Biblu’n nun like. E su fa kle sran mun. ?W’a wun wie le? [Maan sran’n tɛ su.] N kunndɛ kɛ ń klé wɔ wafa nga a kwla fa suan ɔ bɔbɔ ɔ Biblu’n i nun like’n. N su cɛman.”

Anglo nga nun’n, maan e yo nga e nian:

Kɛ amún wá sú Ɲanmiɛn awlo lɔ’n, amun yi fluwa’n i fa manlɛ’n i nglo.
Kɛ amún bó jasin fɛ’n, ndɛ nga amún wá kán’n, amun bo su kle jasin bofuɛ wie mun. (Nya. 27:17) Sɛ amun fali ajalɛ kun naan i bo w’a guaman kpa’n, amun kaci i.