Aklunjuɛ su maan e siesie e wun e minndɛ E wla kpɛnlɛ cɛn’n
1. ?E wla kpɛnlɛ cɛn m’ɔ ti blɛ ngunmin kun’n i nun’n, wafa sɛ yɛ ɔ fata kɛ e wun yo e ɔ?
1 É yó E wla kpɛnlɛ aɲia’n Jɔlɛ cɛn m’ɔ ti Marsi i le 26 su. Blɛ sɔ’n ti ajalɛ nga Ɲanmiɛn fali naan w’a de e’n, i su aklunjuɛ dilɛ blɛ kpa. (Eza. 61:10) Ka naan aɲia’n i cɛn’n wa ju’n, sɛ e o aklunjuɛ nun’n i sɔ’n úka e naan y’a siesie e wun kpa. ?Wafa sɛ?
2. ?Ngue ti yɛ e tu e klun e siesie e wun naan y’a yo E wla kpɛnlɛ aɲia’n niɔn?
2 E siesie e wun naan y’a yo E wla kpɛnlɛ aɲia’n: E Min’n i Aliɛ Cɛn dilɛ’n ti cinnjin. Kannzɛ e yoman e tratraman su’n, sanngɛ sɛ e siesie e wun ikisa’n, e ɲin su kpaman ninnge cinnjin wie’m be su. (Nya. 21:5) Ɔ maan, ɔ fata kɛ be kle lika’n ɔ nin dɔ nga bé yó aɲia’n. Asa’n, ɔ fata kɛ be bu nzɔliɛ ninnge ng’ɔ nin i fata’n be akunndan. Maan be yo aɲia’n i lika’n i sanwun naan be siesie lɔ ninnge mun. Asa ekun’n, maan aniaan nga be fali nzra nun ijɔlɛ’n be wlɛli i sa nun’n ɔ siesie i wun kpa. Kpɛkun maan be nga bé fá nzɔliɛ ninnge’m bé sínsín’n, ɔ nin ndɛ tiefuɛ mun be si like trele ng’ɔ fata kɛ be yo’n. E lafi su kɛ amun a dun mmua b’a yo i sɔ ninnge’m be nun sunman. E ti kpɔlɛ tɛ’n i su aklunjuɛ m’ɔ e di’n, i ti yɛ e tu e klun e siesie e wun sɔ ɔ.—1 Piɛr 1:8, 9.
3. ?Wafa sɛ yɛ e akunndan’n kwla tran E Min’n i Aliɛ’n su ɔ?
3 Maan e akunndan’n tran E wla kpɛnlɛ cɛn’n su: Ɔ ti cinnjin wie kɛ e akunndan’n tran like nga ti yɛ e yo E wla kpɛnlɛ aɲia’n i su kpa. (Ɛsd. 7:10) I sɔ’n ti’n, Biblu’n nun ndɛ ng’ɔ fata kɛ e kanngan nun blɛ sɔ’n nun’n, maan e sie blɛ naan e kanngan be nun. I sin’n, maan e tinuntinun e bu blɛ kasiɛn nga Zezi dili i asiɛ’n su wa’n, i su akunndan kpa. Wafa nga Zezi klɛnnin i wun’n i su akunndan bulɛ’n ɔ́ wlá e fanngan maan é yó kɛ i sa.—Gal. 2:20.
4. ?E ti kpɔlɛ tɛ’n i su mmlusuɛ’m be nun’n, beninfuɛ’n yɛ ɔ man amun aklunjuɛ kpa ɔ?
4 E ti kpɔlɛ tɛ mɔ Klist yili’n ɔ kle kɛ Zoova le atin sie nglo nin asiɛ’n. Asa’n i sɔ’n yo maan e ɲan e ti fɔ’n nin wie’n be sa nun. (1 Zan 2:2) Asa ekun’n, i sɔ’n yo maan e nin Ɲanmiɛn e afiɛn sɛ kpa kpɛkun e kwla ɲan anannganman nguan. (Kol. 1:21, 22) I kunngba’n, i sɔ’n uka e naan e wun mɔ e fa mannin Zoova’n, y’a yo i nuan su sa. Kpɛkun ɔ uka e naan y’a jran kekle kɛ Klist i sɔnnzɔnfuɛ mun sa. (Mat. 16:24) Maan e wun siesielɛ’n ɔ nin E wla kpɛnlɛ aɲia’n mɔ w’a mantan koko’n i bo tranlɛ’n be yo maan e aklunjuɛ’n ɔ yo dan!