Ajalɛ nsan mɔ be kwla uka e naan y’a si sran’m be like kle kpa’n
1. ?Ngue ti yɛ ɔ fata kɛ e si sran’m be like kle kpa ɔ?
1 E kwlaa nga e ti jasin bofuɛ’n, sran’m be like klelɛ’n yɛ ɔ ti e junman ɔn. I ti’n, maan ɔ yo kpɛ klikli nga e to sran mun’n nin o, annzɛ kɛ e sa e sin e ko nian be osu’n nin o, annzɛ kusu kɛ e nin be suan Biblu’n nun like’n nin o, blɛ kwlaa sɔ’m be nun’n, e kle be like. Like nga e kle sran mun’n, ɔ ti cinnjin kpa. Afin ɔ uka be naan b’a wun “Nyanmiɛn Ndɛ nga be klɛli’n” i wlɛ, naan b’a ‘si ngwlɛlɛ b’ɔ maan bé ɲán be ti’n.’ (2 Tim. 3:15) Nanwlɛ, junman cinnjin kpa kun yɛ ɔ o lɛ ɔ! I ti’n, kɛ ɔ ko yo naan y’a si sran’m be like kle’n, é wá fá e ɲin é síe i ajalɛ nsan be su.
2. ?Kɛ é klé sran’m be like’n, wafa sɛ yɛ e kwla yo naan ndɛ’n i wlɛ wunlɛ w’a yoman kekle ɔ?
2 Maan ndɛ nga e kan’n i wlɛ wunlɛ yo pɔpɔ: Sɛ sran kun su yiyi ndɛ kun nun kle i wiengu’n, i ijɔlɛ kpanngban’n ti’n, ndɛ’n i wlɛ wunlɛ’n kwla yo kekle. I kunngba’n kɛ amún klé sran’m be Biblu’n nun like’n, nán an yiyi ndɛ’n i ngbɛsungbɛsu kwlaa nun kle sran’n. Sanngɛ, maan an ijɔ kpe kan naan an fa sran’n i ɲin sie i ndɛ ng’ɔ ti cinnjin’n su. Afin nán ndɛ kpanngban mɔ amun kan’n, i ti yɛ amun si like kle ɔ. (Nya. 10:19) Kɛ amún klé sran’m be Biblu’n nun like’n, maan amun kanngan Biblu’n nun ndɛ nga be ti cinnjin’n be ngunmin be nun. Sɛ amun yo sɔ ɔ, ɔ ti kpa. I sin’n, wafa nga Biblu’n nun ndɛ sɔ’n ɔ yo maan ndɛ nga an su kɛn i ndɛ’n i ɲin w’a fite’n, yɛ ɔ ti mɔ amun kan ɔn. Maan e sɔnnzɔn Zezi. Yɛle kɛ ndɛ ng’ɔ kɛnnin i oka’n su lɔ’n, m’ɔ o Matie ndɛ tre 5 lele 7 nun’n, i bo ti kploun kpa. Sanngɛ i wlɛ wunlɛ’n ti pɔpɔ.
3. ?Ngue ti yɛ ɔ ti cinnjin kɛ e fa sunnzun ase mun e uka sran mun ɔn? ?Ajalɛ benin yɛ Zezi kle e i sɔ yolɛ’n nun ɔn?
3 Maan e fa sunnzun ase: Kɛ é klé sran’m be like mɔ e fa sunnzun ase e yiyi ndɛ’n nun’n, ɔ uke be ɲin, ndɛ’n wluwlu be wun, kpɛkun be wla fiman su. Sanngɛ nán maan amun bu i kɛ, kɛ mɔ amun nin kpɛnngbɛn mun amun a sanman nun ti’n, sunnzun ase nga be yo fɛ kpa’n, amun siman be wie fi. I lɛ nun’n, Zezi i ajalɛ’n kwla uka amun. Yɛle kɛ blɛ sunman nun’n, sunnzun ase nga ɔ fali be’n be ti kpekpe kan, kpɛkun be wlɛ wunlɛ’n w’a yoman ya. (Mat. 7:3-5; 18:2-4) Asa ekun’n, amun kwla yi desɛn fluwa kun su. I sɔ’n kwla uka sran’n kpa. Kwlaa naan amun a wɔ sran’n i like klelɛ’n, amun wun siesielɛ nun’n, maan amun bu sunnzun ase nga be kwla uka sran’n, be akunndan.
4. ?Ngue yɛ e kwla yo naan kosan nga e usa’n, w’a uka sran mun ɔn?
4 Maan e usa kosan: Kosan nga e usa like suanfuɛ’n, ɔ yo maan ɔ bu akunndan. I sɔ ti’n, kɛ amun usɛ i kosan’n, maan amun minndɛ kɛ ɔ tɛ su. Ɔ maan, sɛ ɔ wunnin ndɛ’n i bo’n annzɛ w’a wunmɛn i bo’n, amun kwla wun i wlɛ. Sanngɛ sɛ amun yomɛn i sɔ’n, amun su siman ndɛ ng’ɔ o i klun’n. Asa ekun’n, sɛ ɔ tɛman kosan’n su kpa’n, nán maan amun tɛ su be mɛn i. Sanngɛ amun usɛ i kosan uflɛ naan i bɔbɔ w’a wun i su tɛlɛ’n. (Mat. 17:24-27) Nanwlɛ e nun wie fi kwlá seman kɛ like klelɛ nun’n, i liɛ’n w’a wie ju. I sɔ’n ti’n, Biblu’n se e kɛ e nian ninnge nga e kle’n su kpa. Sɛ e yo sɔ’n, é dé e bɔbɔ nin be nga be ti e ndɛ’n.—1 Tim. 4:16.