Wafa nga amun jasin fɛ’n bolɛ akpasua’n kwla uka amun’n
1. ?Ye benin yɛ e dili i e Asɔnun’n i fluwa nun ndɛ suanlɛ’n nun mɔ e te di i e jasin bolɛ akpasua’n nun ɔn?
1 ?Amun konvi kali Asɔnun’n i fluwa nun ndɛ suanlɛ’n su? Kɛ mɔ e nga e yia sɔ’n y’a sɔnman’n ti’n, e afiɛn kwla mantan kpa e tra janvuɛ, yɛ e wla e wiengu fanngan. (Nya. 18:24) Akpasua kaan sɔ’n i su nianfuɛ’n ɔ si e e tinuntinun, ɔ maan ɔ kwla nian nun wla e fanngan e tinuntinun. (Nya. 27:23; 1 Piɛ. 5:2, 3) Ye kunngba’n yɛ e di i e jasin bolɛ akpasua’n nun ɔn.
2. ?Ajalɛ benin yɛ amun kwla fa naan amun nin amun niaan nga be o amun jasin bolɛ akpasua’n nun’n, amun afiɛn w’a mantan naan amun a wla amun wiengu fanngan Ɲanmiɛn sulɛ nun ɔn?
2 Amun kpɛ i wun atin: Jasin bolɛ akpasua mun nin Asɔnun’n i fluwa nun ndɛ suanlɛ’m be nun sran b’a sɔnman. Kɛ é bó jasin fɛ’n mɔ e ‘akunndan’n ti kun’n,’ janvuɛ tralɛ kpa kwla tran e afiɛn. (Fil. 1:27) ?Amun jasin bolɛ akpasua’n nun’n, sran nɲɛ yɛ amun nin i b’a di junman le ɔ? ?Amun kwla mian amun ɲin naan amun nin sran kpanngban b’a bo jasin fɛ’n? (2 Kor. 6:13) Ɔ ju wie’n, e kwla yia e akpasua’n nun sran wie kɛ ɔ tran e awlobofuɛ’m be Ɲanmiɛn sulɛ’n i bo, annzɛ e kwla yiɛ i kɛ ɔ bla naan e di like kan. Asɔnun wie’m be nun’n, jasin bolɛ akpasua’m be tɔn like be man ijɔfuɛ aofuɛ’n. Sɛ i sɔ yolɛ’n to akpasua kun’n, kannzɛ ijɔfuɛ aofuɛ’n w’a kwlá ɲɛnmɛn i ti w’a diman like’n wie’n, sanngɛ akpasua’n i nunfuɛ’m be yia be di like likawlɛ, kpɛkun be wla be wiengu fanngan.
3. ?Wafa sɛ yɛ be kwla wla amun fanngan amun jasin bolɛ akpasua’n nun ɔn?
3 Kannzɛ bɔbɔ le mɔcuɛ kun nun’n, asɔnun’n yia kpɛ nɲɔn cɛ’n, i sɔ’n kleman kɛ asɔnun kpɛnngbɛn’m be nianman jasin bofuɛ’m be lika kpa kun. Jasin bolɛ akpasua kun nun’n, akpasua sɔ’n i sunianfuɛ’n wla aniaan’m be fanngan be tinuntinun naan be sa w’a tɔ jasin fɛ’n bolɛ junman’n nun. ?Sɛ amun nin amun lɔ jasin bolɛ akpasua’n i sunianfuɛ’n nin a boman jasin le’n, ngue ti yɛ amun semɛn i kɛ amun nin i bó jasin likawlɛ ɔ? Asa ekun’n, anglo kwlaa nun’n, junman sunianfuɛ’n nin jasin bolɛ akpasua kun be bo jasin likawlɛ. Asɔnun nga i nun jasin bolɛ akpasua’m b’a sɔnman’n, afuɛ kun nun’n, junman sunianfuɛ’n nin i be bo jasin kpɛ nɲɔn. ?Kɛ aniaan sɔ’n ko ba amun jasin bolɛ akpasua’n i osu nianlɛ’n, amun nin i bo jasin likawlɛ?
4. (a) ?Wafa sɛ yɛ be siesie jasin fɛ’n bolɛ aɲia’n niɔn? (b) ?Jasin fɛ’n bolɛ aɲia mɔ be kwla yo i e awlo lɔ’n, ngue ti yɛ ɔ fata kɛ e bu i akunndan ɔn?
4 Kɛ le mɔcuɛ kwlaa nun’n, jasin bolɛ akpasua kun yo i aɲia liɛ’n i jasin bolɛ lika nun lɔ’n, ɔ ti kpa dan. Afin kɛ be yo aɲia’n lika fanunfanun nun’n, ɔ ti pɔpɔ man aniaan mun. Afin be kwla ko yo aɲia’n i ndɛndɛ naan b’a ko bo jasin’n. Kpɛkun jasin bolɛ akpasua’n i sunianfuɛ’n kwla nian i akpasua’n nunfuɛ’m be lika kpa. Ɔ ju wie’n, jasin bolɛ akpasua nɲɔn annzɛ akpasua kpanngban be bo yo kun be ko bo jasin’n. Ɔ kwla yo anglo kwlaa nun Fue cɛn klikli’n, annzɛ kusu kɛ be ko wie Sasafuɛ Tranwlɛ’n i nun like suan’n. Sanngɛ ɔ ti kpa kɛ jasin bolɛ akpasua kun nunfuɛ’m be tran likawlɛ naan be jasin bolɛ akpasua sunianfuɛ’n man be junman ka naan b’a srɛ Ɲanmiɛn b’a gua aɲia’n i bo.—Amun nian kuku’n “?Be kwla yia amun awlo lɔ?”
5. ?Kannzɛ bɔbɔ e yoman Asɔnun’n i fluwa nun ndɛ suanlɛ aɲia’n kun’n, ngue yɛ e kwla lafi su ɔ?
5 Kannzɛ bɔbɔ e yoman Asɔnun’n i fluwa nun ndɛ suanlɛ aɲia’n kun’n, sanngɛ like kwlaa nga e miɛn i wun naan y’a yo Zoova i klun sa’n, ɔ fa man e. (Ebr. 13:20, 21) Zoova nian e lika, like fi mianman e. (Jue. 23:1) E jasin bolɛ akpasua’n ti’n, e kwla di aklunjuɛ kpanngban. Sɛ e fa ajalɛ naan e “di fie dan’n,” é ‘nyán like kpanngban.’—2 Kor. 9:6.
[Kuku, bue 6]
?Be kwla yia amun awlo lɔ?
Asɔnun wie’m be kan jasin bolɛ akpasua’m be bo nun afin be leman awlo kpanngban naan b’a yia. Jasin fɛ’n bolɛ aɲia’m be o asɔnun’n i junman dilɛ’n nun wie. Ɔ maan sɛ be yo i sɔ aɲia’n e awlo lɔ’n, ɔ ti e cenjele like dan. ?Be kwla yia amun awlo lɔ? Nán maan amun se kɛ, kɛ mɔ amun sua’n w’a cɛnman’n ti’n, amún sísí amun bo. Lika nga amun tran’n, ɔ nin wafa nga amun sua’n ti’n, i nuan su ajalɛ yɛ asɔnun kpɛnngbɛn’m bé fá ɔ. Sɛ amun klo kɛ be yia amun awlo lɔ’n, amun bo su kle amun jasin bolɛ akpasua’n i sunianfuɛ’n.