Jasin fɛ’n bolɛ aɲia m’ɔ yo jasin bofuɛ’m be ye’n
1. ?Ngue ti yɛ ka naan y’a wɔ jasin fɛ’n bolɛ’n e yia ɔ?
1 Cɛn kun’n, Zezi nin i sɔnnzɔnfuɛ 70 be yiali naan b’a ɔ jasin fɛ’n i bolɛ. (Lik 10:1-11) Zezi wlali be fanngan. Ɔ seli be kɛ Zoova súan be bo. Yɛ ɔ kleli be ajalɛ ng’ɔ fata kɛ be fa’n. I sin’n, ɔ sunmannin be “nɲɔnnɲɔn.” Andɛ kusu’n, ka naan y’a ɔ jasin fɛ’n i bolɛ’n, e yia e wla e wun fanngan.
2. ?Dɔ ɲnɛ yɛ ɔ fata kɛ jasin fɛ’n bolɛ aɲia’n di ɔ?
2 Dɔ nga su’n, jasin fɛ’n bolɛ aɲia’n di miniti 10 annzɛ 15. Aniaan ng’ɔ tinngɛ aɲia’n, ɔ siesie aniaan mun nɲɔnnɲɔn, ɔ kle be lika ng’ɔ fata kɛ be bo jasin fɛ’n, yɛ be srɛ Ɲanmiɛn. Sanngɛ é wá kpɛ́ dɔ nga e fa yo aɲia sɔ’n i sin kan. Yɛle kɛ, kɛ ɔ́ fɛ́ i Avrili i le 1, aɲia sɔ’n, ɔ́ dí miniti nnun annzɛ miniti nso cɛ. Wie liɛ’n, kɛ asɔnun aɲia’n ko wie’n, aniaan’m be yo jasin fɛ bolɛ aɲia. Sɛ ɔ ti sɔ’n, ɔ fataman kɛ jasin fɛ’n bolɛ aɲia’n tra miniti nnun bɔbɔ. Afin asɔnun aɲia’n i bo’n, b’a dun mmua b’a wla aniaan’m be fanngan. Kɛ jasin fɛ’n bolɛ aɲia’n cɛman’n, e ɲan blɛ kpanngban e bo jasin fɛ’n. Kpɛkun, sɛ aniaan wie’m be boli jasin fɛ’n i bolɛ bo ka naan b’a ba jasin fɛ’n bolɛ aɲia’n i bo’n, be su minndɛman lele naan b’a sa be sin b’a ko bo jasin fɛ’n ekun.
3. ?Wafa sɛ yɛ be kwla siesie jasin fɛ’n bolɛ aɲia’n naan w’a yo aniaan’m be ye ɔ?
3 Ɔ fata kɛ be siesie jasin fɛ’n bolɛ aɲia’n i kpa naan ɔ yo aniaan’m be ye. Asɔnun wie’m be nun’n, ɔ ti kpa kɛ jasin fɛ’n bolɛ akpasua kun yo i aɲia liɛ i jasin fɛ bowlɛ’n nun lɔ. I liɛ’n, aniaan’m be su nantiman lele naan b’a ju lɔ. Asa ekun’n, aniaan’m be siesielɛ’n su faman blɛ dan, yɛ aniaan ng’ɔ tinngɛ aɲia’n, ɔ kwla fɛ i ɲin sie aniaan’m be tinuntinun be su. Maan asɔnun kpɛnngbɛn’m be nian sɛ be kwla yo i sɔ be asɔnun liɛ’n nun o. Kwlaa naan b’a srɛ Ɲanmiɛn b’a gua aɲia’n i bo’n, ɔ fata kɛ aniaan’m be tinuntinun be si lika nga bé kó bó jasin fɛ’n, ɔ nin sran nga be nin i bé dí junman’n.
4. ?Ngue ti yɛ jasin fɛ’n bolɛ aɲia’n ti cinnjin ɔn?
4 Nán maan e bu i kɛ aɲia sɔ’n timan cinnjin: Be nga be su kɔ jasin fɛ’n bolɛ’n be ukalɛ ti yɛ be yo jasin fɛ’n bolɛ aɲia’n niɔn. Ɔ maan, ɔ nunman nun kɛ saan fii asɔnun’n nunfuɛ’m be ngba be trɛn i bo. Sanngɛ, nán maan e bu i kɛ aɲia sɔ’n timan cinnjin. Jasin fɛ’n bolɛ aɲia’n ti kɛ asɔnun aɲia onga’m be sa. Afin Zoova yɛ ɔ se e kɛ e yia ɔ. Aɲia sɔ’n i bo lɔ’n, e wla e wiengu fanngan naan e klo e wun yɛ e yo sran ye. (Ebr. 10:24, 25) I sɔ’n ti’n, ɔ fata kɛ aniaan ng’ɔ tinngɛ aɲia sɔ’n, ɔ siesie i wun kpa naan ndɛ ng’ɔ́ kán’n, ɔ manman Zoova, yɛ ɔ yo aniaan’m be ye. Maan aniaan nga bé kó bó jasin fɛ’n, be mian be ɲin be tran aɲia sɔ’n i bo.
Maan e bu jasin fɛ’n bolɛ aɲia’n i like cinnjin, afin ɔ ti kɛ asɔnun aɲia onga’m be sa.
5. (a) ?Ngue yɛ ɔ fata kɛ junman sunianfuɛ’n yo ɔ? (b) ?Ngue ti yɛ wie liɛ’n, be kwla se aniaan bla kun kɛ ɔ tinngɛ jasin fɛ’n bolɛ aɲia’n niɔn?
5 Like ng’ɔ fata kɛ aɲia’n i tinngɛfuɛ’n yo’n: Kɛ be man e junman asɔnun aɲia’n i bo lɔ’n, e siesie e wun ndɛ nun. I kunngba’n yɛ ɔ fata kɛ jasin fɛ’n bolɛ aɲia’n i tinngɛfuɛ’n yo ɔ. Sɛ jasin bofuɛ’m be kwlakwla be yoman jasin fɛ’n bolɛ aɲia’n likawlɛ’n, jasin fɛ bolɛ akpasua kun i sunianfuɛ’n annzɛ i ukafuɛ’n, yɛ ɔ́ tínngɛ aɲia’n niɔn. Sanngɛ, sɛ jasin bofuɛ’m be kwlakwla be yia likawlɛ’n, ɔ fata kɛ junman sunianfuɛ’n se aniaan kun kɛ ɔ tinngɛ aɲia’n. Wafa nga be siesieli jasin fɛ bolɛ aɲia’n, junman sunianfuɛ wie’m be klɛ i fluwa kun su. Kpɛkun be fa man be nga bé wá tínngɛ aɲia sɔ’n. I sin’n be ci fluwa sɔ’n i foto yɛ be fa tɛ i tɛbua’n su. Kɛ junman sunianfuɛ’n fá junman’n wlɛ́ i aniaan kun i sa nun’n, ɔ fata kɛ ɔ bu i sin kpa. Afin kɛ aniaan’m be tinngɛ aɲia sɔ’n i kpa’n yɛ ɔ yo aniaan’m be ye ɔ. Ɔ ju wie’n, asɔnun kpɛnngbɛn, annzɛ asɔnunfuɛ’m be lika nianfuɛ, annzɛ kusu aniaan kun m’ɔ kwla di junman sɔ’n nunman lɛ naan b’a se i kɛ ɔ tinngɛ aɲia’n. I lɛ’n nun’n, maan junman sunianfuɛ’n fa aɲia sɔ’n i tinngɛlɛ’n wlɛ i aniaan bla kun mɔ b’a yo i batɛmu m’ɔ kwla di junman sɔ’n i kpa’n i sa nun.—An nian ndɛ akpasua “Sɛ aniaan bla kun yɛ ɔ tinngɛ aɲia’n” nun.
6. ?Ngue ti yɛ ɔ ti cinnjin kɛ aniaan ng’ɔ tinngɛ jasin fɛ’n bolɛ aɲia’n ɔ siesie i wun kpa ɔ?
6 Kɛ be man e junman Ɲanmiɛn junman dilɛ suklu’n annzɛ junman dilɛ aɲia’n i bo’n, e tu e klun e siesie e wun. Nán blɛ mɔ e o atin su e su kɔ aɲia’n i bo’n yɛ e bu ndɛ nga é kán’n i akunndan ɔn. I kunngba’n yɛ ɔ fata kɛ aniaan ng’ɔ́ tínngɛ jasin fɛ bolɛ aɲia kun’n, ɔ yo ɔ. Kɛ mɔ é wá kpɛ́ aɲia sɔ’n i dɔ’n su’n ti’n, i sɔ yolɛ’n ti cinnjin kpa. Asa ekun’n, lika nga aniaan’m bé bó jasin fɛ’n, ɔ fata kɛ ɔ dun mmua bu i akunndan sie.
7. ?Ndɛ benin yɛ aɲia’n i tinngɛfuɛ’n ɔ nin aniaan’m be kwla koko su yalɛ ɔ?
7 Like nga aɲia’n i tinngɛfuɛ’n kwla fa aniaan’m be ɲin sie su’n: Ndɛ ng’ɔ fata kɛ e koko su yalɛ jasin fɛ’n bolɛ aɲia’n i bo’n, sran kpa nanwlɛfuɛ’n w’a yiyiman nun tɛkɛtɛkɛ. Kuku nga be flɛ i “Like nga jasin fɛ’n bolɛ aɲia’n i tinngɛfuɛ’n kwla fa aniaan’m be ɲin sie su’n” i nun’n, be kle ajalɛ kpa wie mun. Titi’n, aɲia’n i tinngɛfuɛ’n ɔ nin aniaan’m be koko Biblu’n nun ndɛ’m be su yalɛ. Be kwla yi ajalɛ kpa wie’m be nglo. Annzɛ kusu’n, ɔ kwla fa aniaan’m be ɲin sie i e ɛntɛnɛti adrɛsi’n i su video kun su. Kɛ aɲia’n i tinngɛfuɛ’n síesíe i wun’n, maan ɔ bu ndɛ ng’ɔ kwla yo aniaan’m be ye cɛn sɔ’n nun’n i akunndan.
Kɛ aɲia’n i tinngɛfuɛ’n síesíe i wun’n, maan ɔ bu ndɛ ng’ɔ kwla yo aniaan’m be ye cɛn sɔ’n nun’n i akunndan.
8. ?Fue cɛn nin Mɔnnɛn cɛn’n, ngue yɛ aɲia’n i tinngɛfuɛ’n kwla fa aniaan’m be ɲin sie su ɔ?
8 Fue cɛn’n, fluwa Sasafuɛ Tranwlɛ’n nin Réveillez-vous ! yɛ aniaan kpanngban be fa bo jasin fɛ’n niɔn. Sanngɛ, kɛ ɔ́ fɛ́ i Kisie cɛn lele m’ɔ́ fá jú Fue cɛn’n, aniaan be nun wie’m be kwlá kɔman jasin fɛ’n i bolɛ. Ɔ maan wie liɛ’n, kannzɛ kɛ bé sú Ɲanmiɛn awlo lɔ’n be kannin wafa nga be kwla fa fluwa sɔ’m be man’n i ndɛ’n, sanngɛ be wla kwla fi su. I sɔ’n ti’n, aɲia’n i tinngɛfuɛ’n kwla kan ajalɛ nga be o fluwa Ɲanmiɛn Sielɛ Blɛ junman i sin’n be ndɛ. Wafa nga aniaan’m be kwla fa sa wie m’ɔ juli’n, annzɛ cɛn wie mɔ sran’m be su di’n, be fiti be ndɛ’n su naan b’a fa periodiki mun b’a man’n, aɲia’n i tinngɛfuɛ’n kwla kɛn i ndɛ. Ndɛ nga e kwla kan kle sran mun naan b’a kplin su kɛ e ko nian be osu ekun’n, ɔ kwla bo su wie. Sɛ aniaan wie’m b’a fa periodiki nga é fá mán sran mun anglo sɔ’n nun b’a man sran wie mun’n, aɲia i tinngɛfuɛ’n kwla se be kɛ be kan ajalɛ nga be fali’n i ndɛ. Annzɛ sɛ aniaan wie’m be boli jasin fɛ naan i bo guali kpa’n, be kwla bo su. Mɔnnɛn cɛn’n, ɔ kwla fa aniaan’m be ɲin sie fluwa nga bé fá mán sran mun anglo sɔ’n nun’n i su. E kwla fa fluwa Jasin fɛ annzɛ Biblu’n kle ɔ nin Amun tie Ɲanmiɛn ndɛ’n e man sran mun blɛ kwlaa nun. I sɔ’n ti’n, wafa nga e kwla fa fluwa sɔ’m be nun kun e man’n, aɲia’n i tinngɛfuɛ’n kwla kɛn i ndɛ kpe kan.
9. ?Sɛ ɔ fata kɛ e fa fluwa wie e cɛcɛ sran mun, ngue yɛ aɲia’n i tinngɛfuɛ’n kwla fa aniaan’m be ɲin sie su ɔ?
9 Wie liɛ’n, annuanzɛ’n fa ajalɛ kɛ e fa fluwa wie e cɛcɛ sran mun. Sɛ ɔ ti sɔ’n, Fue cɛn nin Mɔnnɛn cɛn, aɲia’n i tinngɛfuɛ’n kwla kan wafa nga, e kwla kpanndan periodiki mun nin fluwa sɔ’n e man’n i ndɛ. Annzɛ kusu’n, sɛ sran wie kle kɛ Ɲanmiɛn ndɛ’n ti i cinnjin’n, like ng’ɔ fata kɛ e yo’n, amun kwla koko su yalɛ. Sɛ ndɛ fɛ wie o lɛ m’ɔ kle kɛ junman sɔ’n ti cinnjin kpa’n, an kwla bo su wie.
10, 11. ?Ngue ti yɛ ɔ ti cinnjin kɛ jasin bofuɛ’m be siesie be wun kpa ɔ?
10 Like ng’ɔ fata kɛ jasin bofuɛ’m be yo’n: Ɔ ti cinnjin kɛ jasin bofuɛ’m be siesie be wun kpa wie naan b’a ɲan jasin bolɛ aɲia’n i su ye. I wie yɛle kɛ, kɛ bé sú Ɲanmiɛn awlo lɔ’n, be kwla kan ajalɛ nga be kwla fɛ i jasin fɛ bolɛ’n nun’n i ndɛ. I liɛ’n, bé kwlá bó su klé be wiengu jasin bofuɛ mun. Asa ekun’n, fluwa nga bé fá bó jasin fɛ’n, ɔ fata kɛ be dun mmua kunndɛ be sie kwlaa naan b’a wɔ aɲia’n i bo. I liɛ’n, kɛ aɲia’n ko wie’n, be su cuɛncuɛnman be ja ase naan b’a wɔ jasin fɛ’n i bolɛ.
11 Ɔ ti cinnjin kpa wie kɛ jasin bofuɛ’m be ju jasin fɛ’n bolɛ aɲia’n i bo ka naan dɔ’n w’a ju. I yo, e mian e ɲin e ju aɲia’m be kwlaa be bo dɔ su. Sanngɛ sɛ e juman jasin bolɛ aɲia’n i bo dɔ su’n, i sɔ’n kwla kle aniaan ng’ɔ tinngɛ aɲia’n i yalɛ. Afin kɛ ɔ yo naan ɔ siesie aniaan mun’n, ɔ timan pɔpɔ. Wie liɛ’n, aniaan’m be boli jasin fɛ’n lika kun nun sanngɛ b’a guɛmɛn i bo. I lɛ’n nun’n, sɛ aniaan nga be bali jasin fɛ bolɛ’n b’a sɔnman’n, aɲia i tinngɛfuɛ’n kwla se kɛ be ɔ lɔ. Wie liɛ kusu’n, jasin fɛ bowlɛ’n o mmua. Ɔ maan sɛ aniaan wie’m be le loto’n, ɔ sie be nin be nga be leman loto’n. Sɛ be jasin bowlɛ’n nun lɔ’n, sran’m be yo nzaje sa mun titi’n, ɔ kwla se aniaan yasua wie mun kɛ be nin aniaan bla’m be ko bo jasin fɛ’n likawlɛ. Sɛ aniaan kun ti fɔlɛfuɛ’n, sua nga be nun asikalie’m be timan nglonglo’n, be nun lɔ yɛ ɔ́ sé i kɛ ɔ nin aniaan ng’ɔ nin i bé bó jasin fɛ’n, be wɔ ɔ. Asa kusu’n, jasin bofuɛ nga be boli jasin fɛ’n i bolɛ bo ɔ nin a cɛman’n, aɲia tinngɛfuɛ’n sie be nin aniaan nga be sa w’a tɔ jasin fɛ’n bolɛ nun kpa’n. Ɔ maan sɛ jasin bofuɛ’m be baman dɔ su’n, ɔ kle aniaan ng’ɔ tinngɛ aɲia’n i yalɛ afin ɔ fata kɛ ɔ siesie aniaan mun uflɛ ekun. I yo, wie liɛ’n, kɛ e ka siɛn’n, nán e sa nun sa ɔ. Sanngɛ sɛ i sɔ liɛ’n kaci e nzuɛn’n, ɔ fata kɛ e tran e bu akunndan naan e wun sa ti mɔ e ka siɛn tikatika’n. Atrɛkpa’n, e buman jasin fɛ’n bolɛ aɲia’n i like cinnjin. Annzɛ kusu’n e siesieman e wun ndɛ nun.
12. ?Ngue ti yɛ ɔ fataman kɛ e nin sran kunngba’n yɛ e bo jasin fɛ’n cɛn kwlaa ɔ?
12 Kwlaa naan aɲia’n w’a bo i bo’n, jasin bofuɛ wie’m be nuan kwla sɛ su kɛ bé bó jasin fɛ’n likawlɛ. Yɛ kɛ aɲia’n ko wie’n, aɲia i tinngɛfuɛ’n siesie aniaan onga mun nɲɔnnɲɔn. Sanngɛ nán maan jasin bofuɛ’m be se kɛ be nin sran kunngba’n yɛ bé bó jasin fɛ’n cɛn kwlaa ɔ. Maan be nin aniaan fanunfanun be bo jasin fɛ’n naan be kle kɛ ‘be ndɛ lo be.’ (2 Kor. 6:11-13) Sɛ aniaan wie’m be boli jasin fɛ’n i bolɛ bo ɔ nin a cɛman’n, e nin be e kwla bo jasin fɛ’n. I liɛ’n é kwlá úka be naan be sa w’a tɔ jasin fɛ’n i bolɛ’n nun. (1 Kor. 10:24; 1 Tim. 4:13, 15) Maan jasin bofuɛ’m be sie be su aɲia’n i tinngɛfuɛ’n i nuan bo. I wie yɛle kɛ, kɛ ɔ́ klé lika ng’ɔ fata kɛ be bo jasin fɛ’n, maan be fa be ɲin sie su kpa. Kpɛkun, kɛ aɲia’n ko wie’n, nán maan be bɔbɔ be fa ajalɛ kɛ be nin sran uflɛ bé kó bó jasin fɛ’n, yɛ nán maan be sisi be bo naan b’a wɔ jasin fɛ’n i bolɛ.
13. ?Sɛ aɲia’n i tinngɛfuɛ’n nin jasin fɛ bofuɛ’m be kwlakwla be yo like ng’ɔ fata kɛ be yo’n, wafa sɛ yɛ i bo’n gúa ɔ?
13 Kɛ Zezi i sɔnnzɔnfuɛ 70 be ko boli jasin fɛ’n mɔ be sali be sin’n, “be klun jɔli.” (Lik 10:17) Nanwlɛ, aɲia nga Zezi nin be yoli ka naan b’a ɔ jasin fɛ’n i bolɛ’n, ɔ yoli be ye dan. Andɛ kusu’n, jasin fɛ’n bolɛ aɲia’n kwla yo e ye sɔ wie. Sɛ aɲia’n i tinngɛfuɛ’n, ɔ nin jasin fɛ bofuɛ’m be tinuntinun be yo like ng’ɔ fata kɛ be yo’n, aɲia sɔ’n wlá e fanngan, yɛ ɔ́ úka e naan y’a si jasin fɛ’n i bo kpa. Ɔ maan, é kwlá bó jasin fɛ’n naan “sran’n kwlaa be ti Nyanmiɛn ndɛ’n.”—Mat. 24:14.