É cɛ́cɛ́ Sielɛ Blɛ’n i nganniɛn no 38 Novamblu nun!
1. ?Be nga be wuli’n be su kosan benin yɛ sran’m be usa ɔ? ?Novamblu nun’n, wafa sɛ yɛ é úka be naan b’a wun kosan sɔ’m be su tɛlɛ’n niɔn?
1 Wie’n kle e ngba e yalɛ. Ɔ leman kɛ sran kun lafi Ɲanmiɛn su annzɛ ɔ lafimɛn i su. (1 Kor. 15:26) Sran kpanngban be usa be wun kɛ nin yɛ be nga be wuli’n be o ɔ. Yɛ be usa be wun sɛ bé kwlá wún be ekun o. I sɔ’n ti’n, mɛn wunmuan’n nun’n, é fá anglo wunmuan kun é cɛ́cɛ́ Sielɛ Blɛ’n i nganniɛn no 38. Fluwa sɔ’n i flɛlɛ’n yɛ: “?Ɔwuliɛ’m be kwla sa be sin nguan nun ekun?” É bó i bo Novamblu i le klikli’n su. Kɛ blɛ sɔ’n ko sin’n, é fá Sielɛ Blɛ’n i nganniɛn no 38 é bó jasin kɛ nga e fa fluwa nɲa mun e bo jasin fɛ’n sa.
2. ?Sɛ be se e kɛ e kan Sielɛ Blɛ’n i nganniɛn no 38 i su ndɛ kan’n, é sé sɛ?
2 Fluwa’n i nun ndɛ mun: Wafa nga be yili Sielɛ Blɛ’n i nganniɛn no 38, ɔ yo maan be kwla bu nun nɲɔn. I flɛlɛ’n ti kosan, ɔ o i bue klikli’n su. Kpɛkun be usa kɛ: “?Amún tɛ́ su kɛ...ɛɛn? cɛcɛ? ɔ kwla yo sɔ?” Fluwa’n nun’n, be kleli wafa nga Biblu’n tɛ kosan sɔ’n su’n, ɔ nin wafa nga i su tɛlɛ sɔ’n kwla yo sran’n i ye’n. Asa ekun’n, like nga ti yɛ sran’n kwla lafi su kɛ ndɛ nga Biblu’n kan’n ti su’n, ɔ kɛn i ndɛ wie. Asa kusu’n, kosan cinnjin kpa kun o i bue kasiɛn’n su. Sran’n kwla bu kosan sɔ’n i su akunndan kpa, yɛ ɔ kwla kunndɛ kɛ ɔ́ sí nun ekun.
3. ?Wafa sɛ yɛ é fá Sielɛ Blɛ’n i nganniɛn no 38 é cɛ́cɛ́ sran mun ɔn?
3 Wafa nga é fá cɛ́cɛ́ sran mun’n: Ajalɛ nga e fa naan y’a yia sran mun E wla kpɛnlɛ aɲia’n nin e nvle kun aɲia’m be bo’n, i su yɛ é nían ɔn. Asa ekun’n, asɔnun kpɛnngbɛn’m bé nían fluwa mɔ be klɛ ko mannin be Avrili i le klikli su’n i nun naan b’a kle wafa ng’ɔ fata kɛ e di junman’n naan e sa w’a yia e jasin bowlɛ’n. Asɔnun nga be jasin bowlɛ’n ti kaan’n be kwla uka asɔnun nga be mantan be mɔ be jasin bowlɛ liɛ’n cɛnnin kpa’n. Sɛ e kɔ Sielɛ Blɛ’n i nganniɛn no 38 i falɛ’n, maan e fa nga e kwla fa bo jasin fɛ’n le mɔcuɛ kun nun’n. E kwla fa fluwa’n e cɛcɛ sran mun akpɔ’m be nuan wie. Sanngɛ maan e dun mmua e wie i cɛcɛ awloawlo’m be nun ka. Sɛ e fɛ i kwlaa e cɛcɛ sran mun naan anglo’n nin a wieman’n, maan e fa fluwa ng’ɔ fata kɛ e fa bo jasin fɛ’n anglo sɔ’n nun’n e man. Novamblu anglo’n i Fue cɛn klikli’n nun’n, e su boman Biblu’n nun like klelɛ bo kɛ nga e fa yo i titi’n sa. Sielɛ Blɛ’n i nganniɛn’n i cɛcɛlɛ’n su yɛ é fá e ɲin é síe ɔ. Fue cɛn nin Mɔnnɛn cɛn’n, sɛ ɔ nin i fata’n e kwla fa periodiki mun e man sran mun wie. Maan e siesie e wun ikisa naan y’a kwla tu e klun y’a di junman sɔ’n wie.