An fa ninnge nga anuannzɛ’n sie be ɛntɛnɛti su’n fa kle ba’m be like
1. ?Wafa sɛ yɛ e ɛntɛnɛti adrɛsi’n i lika nga be flɛ i “Enfants,” ɔ kwla yo bakanngan’m be ye ɔ?
1 Ɛntɛnɛti adrɛsi jw.org ɔ ti e kwlaa e liɛ. I kpɛnngbɛn o, i bakan o, i gbanflɛn nin talua o. I lika kun nun’n, be klɛli “Enfants.” (An tin La Bible et vous su, i sin’n an tin Enfants su.) I nun ndɛ’n uka bakanngan mun naan be nin Zoova be afiɛn w’a mantan kpa. Asa ekun’n, ɔ uka be naan be nin be si nin be nin be afiɛn w’a mantan kpa wie. (Mml. 6:6, 7) ?Wafa sɛ yɛ amun kwla fa lika sɔ’n i nun ndɛ’n kle amun mma’m be like ɔ?
2. ?Wafa sɛ yɛ siɛ nin niɛn’m be kwla nian ba’m be afuɛ’n su naan b’a kle be like ɔ?
2 An bu ba’m be akunndan: Bakanngan’m be ngba be timan kun. (1 Kor. 13:11) ?Ɔ maan wafa sɛ yɛ amun kwla nian be afuɛ’n su naan amun a kle be like ɔ? Amun usa amun wun kɛ: ‘?Ndɛ benin yɛ ɔ kwla lo min mma’m be kpa ɔ? ?Be kwla wun ndɛ sɔ’n i wlɛ kpa? ?Be kwla fa be ɲin sie su lele guɛ i ti nin i bo?’ Sɛ ba’n nin a ɲanman afuɛ nnan’n, amun kwla tin lika nga be klɛli “Comptines Bibliques” su, kpɛkun amun nin i be koko i nun ndɛ’n su yalɛ. Awlobo wie’m be nun’n, lika nga be flɛ i “Enseignez vos enfants” i nun ndɛ’n yɛ be fa kle be mma’m be like ɔ. Maan e fa e ɲin e sie i ninnge uflɛ wie’m be su.
3. ?Wafa sɛ yɛ siɛ nin niɛn’m be kwla fa lika nga be flɛ i “Pour le culte familial” i nun ndɛ’n be uka be mma mun ɔ?
3 Awlobo’m be Ɲanmiɛn sulɛ (Pour le culte familial): Lika nga be flɛ i “Pour le culte familial” i nun ndɛ’n kwla uka siɛ nin niɛn mun naan be nin be mma mun b’a suan like. An tin “Télécharger” su naan an kanngan “Guide des parents” i nun ndɛ’n nun. Desɛn wie’m be o lika nga be flɛ i “Pour le culte familial” nun. Amun fa kle ba’m be like. Amun kwla se be kɛ be kan desɛn sɔ’m be ayre. Desɛn uflɛ o lika nga be flɛ i “Apprends en t’amusant” i nun. Amun mma nga b’a yo kaklaka kan’n be liɛ ɔ. Amun kle be wafa nga be kwla fa di junman’n. Desɛn sɔ’n nin be onga’m be kwlaa be ti like suanlɛ kun. I sɔ’n ti’n, kɛ awlobo’m bé sú Ɲanmiɛn awlo lɔ’n, bakanngan’m be kwlaa be kwla ɲan junman be di.
4. ?Ngue yɛ ɔ o lika nga be flɛ i “Deviens l’ami de Jéhovah” i nun ɔn?
4 Kaci Zoova i janvuɛ (Deviens l’ami de Jéhovah): Video nin jue, yɛ junman kanngan wie’m be o lika sɔ’n nun lɔ. Be uka siɛ nin niɛn mun naan b’a fa Ɲanmiɛn Ndɛ’n b’a kle be mma kanngan’m be like. (Mml. 31:12) Ɔ le video kun nin afɔtuɛ cinnjin m’ɔ man ɔn. Kɛ ɔ ko yo naan afɔtuɛ sɔ’m be ɲin w’a fite kpa ekun’n, be wla bakanngan’m be fanngan kɛ be di junman kanngan wie mun lika sɔ’n nun. Yɛle kɛ be kwla se be kɛ be kunndɛ ninnge wie mɔ be ti fiawa’n. E wun kɛ blɛ sunman’n, bakanngan’m be klo jue tolɛ. I sɔ’n uka be naan be wla w’a kpɛn like nga be suannin’n su. Ɔ maan e jue fluwa’n i nun jue wie mun, yɛ jue uflɛ wie’m be o lika sɔ’n nun lɔ.
5. ?Ngue ti yɛ ɔ fata kɛ siɛ nin niɛn’m be srɛ Zoova kɛ ɔ uka be naan b’a ta be mma mun ɔn?
5 Siɛ nin niɛn mun, Zoova kunndɛ kɛ amun si amun mma’m be ta. Ɔ maan, amun srɛ i naan ɔ uka amun naan amun a kwla kle be ndɛ nanwlɛ’n. (Jɔl. 13:8) Zoova m’ɔ suan amun bo’n ti’n, amun kwla uka be naan b’a ‘si ngwlɛlɛ mɔ maan sɛ be lafi Krist su-ɔ be nyan be ti’n.’—2 Tim. 3:15; Nya. 4:1-4.