Kɛ E wla kpɛnlɛ cɛn’n su mantan koko, maan e kle kɛ e si ye

1. ?Ngue yɛ e kwla yo i E wla kpɛnlɛ cɛn aɲia’n i blɛ’n nun ɔn?

¹ Avrili i le 14 su’n, é yó E wla kpɛnlɛ cɛn aɲia’n. Blɛ sɔ’n nun yɛ e kwla kle kpa kɛ e si Zoova i klun ufue’n su ye ɔ. Ndɛ ng’ɔ o Lik 17:11-18 nun’n kle kɛ ye silɛ’n ti like cinnjin Zoova nin Zezi be ɲrun. Zezi yoli kokowefuɛ blu be juejue. Sanngɛ be nun sran kunngba cɛ yɛ ɔ ko lɛli i ase ɔ. Cɛn wie lele’n, e ti kpɔlɛ tɛ nga Zezi yili’n ti’n, tukpacɛ fi su tranman lɛ kun, kpɛkun é ɲán anannganman nguan. Nanwlɛ, blɛ sɔ’n nun’n, é lá Zoova i ase cɛn kwlakwla. Sanngɛ ikisa bɔbɔ’n e kwla lɛ i ase. ?Wafa sɛ yɛ e kwla yo i sɔ’n le mɔcuɛ nga bé bá lɛ’n be nun ɔn?

2. ?Ngue yɛ ɔ kwla uka e naan y’a si e ti kpɔlɛ tɛ’n su ye ɔ?

² Maan e suan ye silɛ: Kɛ e bu like nga be yo man e’n i su akunndan’n, yɛ e kwla si su ye ɔ. I sɔ’n ti’n, Biblu’n i bue ng’ɔ fata kɛ e kanngan nun E wla kpɛnlɛ cɛn’n i blɛ nun’n, anuannzɛ’n wá fá síe i jw.org su ka naan E wla kpɛnlɛ cɛn’n w’a ju. E kwla wun Biblu’n nun ndɛ sɔ mun e kananndrie nin e fluwa Maan e nian Ɲanmiɛn Ndɛ’n nun cɛn kwlaa be nun. Awlo lɔ’n, sɛ e fa e ɲin sie i ndɛ sɔ’m be su likawlɛ’n, ɔ ti kpa. Afin i sɔ’n úka e maan e ye silɛ’n yó dan kɔ́ i ɲrun. Kpɛkun e nzuɛn’n kusu yó kpa.​—2 Kor. 5:14, 15; 1 Zan 4:11.

3. ?Wafa sɛ yɛ e kwla kle kɛ e si ye E wla kpɛnlɛ cɛn aɲia’n i blɛ’n nun ɔn?

³ Maan e yi i nglo kɛ e si ye: Sɛ sran kun ti ye sifuɛ’n, be wun i sɔ liɛ’n i ayeliɛ’n nun. (Kol. 3:15) Kokowefuɛ ng’ɔ sili ye’n, ɔ kunndɛli Zezi lele. Kɛ ɔ wunnin i’n, ɔ lɛli i ase. Kpɛkun atrɛkpa’n, ɔ kannin delɛ nga Zezi deli i’n i ndɛ kleli sran mun. (Lik 6:45) ?E kusu’n, ɔ fataman kɛ e bo e ti kpɔlɛ tɛ’n i jɔ kle sran mun? E wla kpɛnlɛ cɛn aɲia’n i blɛ nun’n, e kwla yo cɛn kunngun atin bofuɛ. Annzɛ e kwla wla e wun ase e bo jasin fɛ’n i kpa tra titi liɛ’n. Sɛ e yo sɔ’n, é klé kɛ e si e ti kpɔlɛ tɛ’n i su ye sakpa. Avrili i le 14 i nnɔsua nun’n, maan e sɔ be nga e yiali be’n be nun klanman. Sɛ be usa e kosan’n, maan e tɛ su.

4. ?Ngue yɛ e kwla yo naan afuɛ’n E wla kpɛnlɛ cɛn’n w’a sinman sa ngbɛn ɔn?

⁴ ?E wla kpɛnlɛ cɛn nga e ko yo’n i kasiɛn’n yɛle afuɛ’n liɛ’n? (1 Kor. 11:26) E siman nun. Sanngɛ nga e si i’n yɛle kɛ, sɛ e yaci i lɛ naan ɔ sin sa ngbɛn’n, nn cɛn dan kun yɛ w’a san e wun lɛ ɔ. I sɔ’n ti’n, maan e kle kɛ e si ye. Maan ndɛ ng’ɔ fin e nuan fite’n, ɔ nin akunndan nga e bu be e klun lɔ’n, be jɔ Zoova klun. Afin i yɛ ɔ yili e ti kpɔlɛ tɛ’n niɔn.​—Jue. 19:15.