Nán maan e cuɛncuɛn e ja ase jasin fɛ’n bolɛ’n nun

E o mɛn nga i awieliɛ blɛ’n nun. Sɛ e waan é fíte nun’n, ɔ fataman kɛ e cuɛncuɛn e ja ase. Sɛ e ɲin tran ninnge wie’m be su’n, e su cuɛncuɛnman e ja ase. Ninnge sɔ mun yɛ:

• Maan e srɛ titi kɛ Ɲanmiɛn Sielɛ blɛ’n ju.​—Mat. 6:10.

• Maan e kanngan Biblu’n nun cɛn kwlakwla naan e awlɛn’n yo kpa.​—Ebr. 3:12.

• Nán maan e saci blɛ nga e le i’n.​—Efɛ. 5:15, 16; Fil. 1:10.

• Maan e ɲinma’n yo ‘kpa.’ Nán maan e klo mɛn’n nun ninnge mun.​—Mat. 6:22, 25; 2 Tim. 4:10.

• Maan e ɲin tran sa nga Biblu’n kannin be ndɛ mɔ be su kpɛn su’n, be su titi. I liɛ’n, é kwlá trán é mínndɛ.​—Mar. 13:35-37.

Sɛ e wun i wlɛ kɛ mɛn’n su wa wie’n, e su cuɛncuɛnman e ja ase. Sanngɛ, é tú e klun bó jasin fɛ’n é gúɛgúɛ i bo.​—Zan 4:34, 35.