Maan e siesie e wun e Wla kpɛnlɛ cɛn i blɛ’n nun

Kɛ afuɛ 33 Nizan anglo’n i le 13 juli’n, Zezi si kɛ cɛn nga ɔ́ dí i asiɛ’n su wa’n, w’a sɔnman kun. Cɛn sɔ’n nun’n, ɔ nin i sɔnnzɔnfuɛ’m be dili Delɛ cɛn’n. Delɛ cɛn kasiɛn nga bé dí i likawlɛ’n yɛ ɔ o lɛ ɔ. I sin’n, Zezi kpɛli cɛn dilɛ uflɛ kun ba. Yɛle e Min’n i aliɛ’n. Ka naan b’a di Delɛ cɛn’n, Zezi sunmannin Piɛli nin Zan kɛ be ko siesie lika nga bé yía bé dí cɛn sɔ’n. (Lik 22:7-13) I kunngba’n, andɛ’n, Klistfuɛ’m be siesie be wun kpa naan b’a tran e Wla kpɛn cɛn’n i aɲia’n i bo. (Lik 22:19) Afuɛ’n, é yó e Wla kpɛnlɛ cɛn aɲia’n Avrili i le 3. ?Wafa sɛ yɛ e kwla siesie e wun ɔn?

Like ng’ɔ fata kɛ asɔnun kpɛnngbɛn’m be yo’n:

Lika nga amún yó e Wla kpɛnlɛ cɛn i aɲia’n, an koko su yalɛ. Ɔ fata kɛ bia’m be sɔn lika sɔ’n nun. Maan kannin’n kpaja lɔ kpa. Ɔ fataman kɛ i nun lɔ lo dan.
Amun kle aniaan ng’ɔ́ wá íjɔ nzra nun cɛn sɔ’n nun’n, nin aɲia’n i siesiefuɛ’n, ɔ nin aniaan nga bé wá srɛ́ Ɲanmiɛn’n.
Wie liɛ’n, asɔnun kpanngban bé yó aɲia’n sua kunngba’n nun. I lɛ nun’n, like nga aniaan’m bé yó naan w’a yoman sukusuku’n, ɔ nin dɔ nga asɔnun kun yó i aɲia liɛ’n, ɔ nin loto siewlɛ mun’n, maan amun nuan sɛ su.
Amun kle aniaan nga bé wá sɔ́ sran’m be nun’n, ɔ nin aniaan nga bé wá fá nzɔliɛ like mun sínsín’n.
Nzɔliɛ like nga bé fá yó aɲia’n, nin asiɛti mun, nin vɛli mun, nin divɛn’n, ɔ nin tabli’n nin tannin nga bé fá kátá tabli’n su’n, an kunndɛ be sie.

Like ng’ɔ fata kɛ jasin bofuɛ’m be yo’n:

Amun mian amun ɲin be yia sran kpanngban.
Amun klɛ be nga amun kle be Biblu’n nun like’n, ɔ nin amun janvuɛ suklu ba mun, nin amun osufuɛ mun, nin amun wiengu junman difuɛ’m be dunman. Kpɛkun amun yia be.
Biblu’n i bue ng’ɔ fata kɛ e kanngan nun e Wla kpɛnlɛ cɛn’n i blɛ nun’n, maan amun kanngan nun kpɛkun amun bu su akunndan.
Maan amun fua kpa kɛ amún sɔ́ be nga bé bá’n be nun klanman.