Wafa nga e kwla fa kakaklolo e bo jasin fɛ’n

Kɛ e fa e fluwa mun e sie i kakaklolo kun nun, annzɛ tabli kun su e bo jasin fɛ’n, i sɔ’n yo maan be nga be awlɛn ti kpa’n, be ba Zoova sin. (Zan 6:44) I sɔ’n ti’n, anuannzɛ’n seli asɔnun kpɛnngbɛn’m be kɛ be siesie i sɔ yolɛ’n be jasin bowlɛ’n nun, kɛ nga sran kpanngban sin lɛ’n. Lika kpanngban nun’n, ɔ timan cinnjin kɛ e ko srɛ awa i atin naan y’a fa kakaklolo y’a di junman. ?Wan yɛ ɔ kwla di i sɔ junman’n wie ɔ? Aniaan nga be yo ninnge mun ngwlɛlɛ su, mɔ be wlawla be wun kpa, mɔ be nin sran kwla koko yalɛ klanman’n, be yɛ be kwla di junman sɔ’n wie ɔ. Maan e kan ninnge wie m’ɔ fata kɛ e yo’n, ɔ nin ng’ɔ fataman kɛ e yo’n be ndɛ.

Like ng’ɔ fata kɛ e yo’n:

Maan e nin sran mun e koko yalɛ kɛ sran kun nin i janvuɛ sa. Maan e sɔ be nun klanman. Yɛ maan sran’m be ukalɛ’n yo e fɛ. Jasin bofuɛ wie’m be liɛ’n, be sri puɛɛ, kpɛkun be yo sran’m be like juejue su. Sɛ e wun kɛ sran kun su sin, naan ɔ nian kakaklolo’n i siin’n, e kwla se i kɛ: “Sɛ a klo’n a kwla fa fluwa’m be nun kun.”
Lika wie’m be nun’n, kɛ jasin bofuɛ’m be jran kakaklolo’n i wun koko’n, yɛ sran’m be fa be wun mantan be ɔ. Sanngɛ lika uflɛ wie’m be nun’n, sɛ aniaan’m be o kakakolo’n i wun koko dan’n, sran’m be sisi be bo naan b’a ba. I sɔ’n ti’n, aniaan’m be jran mmua kan. Kpɛkun, be minndɛ kɛ sran kun jran kakaklolo’n i wun lɛ, naan b’a wunnge lɔ. I sɔ’n ti’n, maan e jran lika nga e si kɛ sɛ e jran lɛ’n, sran’m be su sisiman be bo naan b’a ba’n. Kɛ sran kun ko jran kakaklolo’n i wun lɛ’n, maan e nin i e koko yalɛ. E kwla usɛ i kɛ: “?W’a usa ɔ wun kosan nga le?”
Sɛ e ɲɛn i wun atin’n, maan e kanngan Biblu’n nun.
E kwla bo video ?Ngue ti yɛ Biblu’n nun like suanlɛ’n ti cinnjin ɔn? e kle i.
Sɛ Ɲanmiɛn ndɛ’n ti sran kun i cinnjin’n, e kwla klɛ i dunman’n nin i nimielo’n, ɔ nin i tranwlɛ’n. Sɛ ɔ tranman e jasin bowlɛ nun’n, maan e klɛ i su ndɛ fluwa nga be flɛ i Veuillez suivre l’intérêt (S-43) su, kpɛkun e fa fluwa sɔ’n e man e asɔnun’n i fluwa klɛfuɛ’n.

Like ng’ɔ fataman kɛ e yo’n:

Nán e jran sran’m be wun tɔkii kɛ be fa e fluwa mun, yɛ nán e jran kakaklolo’n i wun lɛ kɛ sonja wie sa.
Nán maan e bu i kɛ sran’m be fluwa cɛcɛlɛ ti yɛ e o lɛ ɔ. Kɛ é bó jasin fɛ’n, like nga e kunndɛ’n yɛle sran’m be Biblu’n nun like klelɛ’n. I sɔ’n ti’n, maan e nin sran mun e koko yalɛ.
Nán maan e jran kakaklolo’n i ɲrun. Yɛ nán e nin aniaan nga e nin i e su bo jasin fɛ’n, e afiɛn yalɛ kokolɛ’n ti’n, e ɲin kpa junman’n su. Sɛ e su ijɔ telefɔnu nun’n, maan e cuɛn e wun kan.
Nán e nin be nga be kunndɛ kɛ bé tánndan e ɲrun’n, e si akplowa. Sɛ e kpɔfuɛ wie waan ɔ́ yó e like yaya’n, e kwla fa kakaklolo’n e ko bo jasin fɛ’n lika uflɛ.