“Maan mmla nga [...] be ka amun klun”
Siɛ nin niɛn’m be ti kɛ bua tafuɛ sa. Ɔ maan, ɔ fata kɛ be nian be mma’m be su kpa, naan b’a faman atin tɛ su. (Nya. 27:23) ?Wafa sɛ yɛ be kwla yo sɔ ɔ? Ɔ fata kɛ siɛ nin niɛn’m be nin be mma’m be koko yalɛ cɛn kwlakwla naan be si be kpa. I liɛ’n, bé kwlá úka be. (Nya. 20:5) Asa ekun’n, ɔ fata kɛ siɛ nin niɛn’m be uka be mma mun naan be lafi Ɲanmiɛn su. I liɛ’n, bé kwlá jrán sa’m be ɲrun kekle. (1 Kor. 3:10-15) Video nga be flɛ i « Ces paroles devront être sur ton cœur » ɔ kan like nga ti yɛ ɔ ti cinnjin kɛ awlobofuɛ’m be su Ɲanmiɛn awlo lɔ titi’n i ndɛ. Amun nian video sɔ’n, kpɛkun amun koko kosan yɛ’m be su yalɛ.
(1) ?Ngue ti yɛ aniaan bian Toma nin i awlofuɛ’m be yacili Ɲanmiɛn i sulɛ awlo lɔ ɔ? (2) ?Kɛ be waan bé sú Ɲanmiɛn awlo lɔ’n, ngue ti yɛ w’a yoman ye ɔ? (3) ?Biblu’n nun ndɛ mma benin yɛ ɔ kwla uka siɛ nin niɛn mun naan b’a ta be mma’m be kpa ɔ? (Mml. 6:6, 7) (4) ?Ngue yɛ ɔ kwla uka awlobo’n i nunfuɛ mun naan b’a kwla koko be afiɛn yalɛ klanman ɔn? (5) ?Ngue yɛ ba’m be kunndɛ kɛ be si nin be nin’m be yo ɔ? (6) ?Ngue yɛ aniaan bian Matɛn nin i yi be yoli m’ɔ ukali Toma nin i awlo’n nunfuɛ mun ɔn? (Nya. 27:17) (7) ?Ngue yɛ ɔ fata kɛ awlobo kpɛn kun yo naan be Ɲanmiɛn sulɛ awlo lɔ’n, w’a yo ye ɔ? (8) ?Ngue yɛ aniaan bian Toma yoli naan b’a kwla su Ɲanmiɛn awlo lɔ ɔ? (9) ?Ngue ti yɛ ɔ ti cinnjin kɛ e su Ɲanmiɛn awlo lɔ titi? (Efɛ. 6:4) (10) ?Kɛ amún sú Ɲanmiɛn awlo lɔ’n, ngue yɛ an kwla fa amun ɲin sie su ɔ? (11) ?Wafa sɛ yɛ aniaan bian Toma ukali i wa Matiasi ɔ? (Zer. 17:9) (12) ?Wafa sɛ yɛ aniaan bian Toma nin i yi be ukali be wa Rebeka ɔ? (Mar. 12:30; 2 Tim. 2:22) (13) ?Wafa sɛ yɛ aniaan bian Toma nin i yi be kleli kɛ be lafi Ɲanmiɛn su ɔ? (Mat. 6:33) (14) ?Afɔtuɛ benin yɛ video nga man awlobo kpɛn mun ɔn? (1 Tim. 5:8) (15) ?Sɛ a ti awlobo kpɛn’n, ngue yɛ w’a fua kpa kɛ á yó ɔ?
AWLOBO KPƐN’M BE LIƐ: Be yili anɔ nga e Nvle kun aɲia nga e yoli i afuɛ 2011 nun’n, i bo lɔ. ?Blɛ sɔ’n nun’n, amun sieli i nzɔliɛ kɛ ɔ fata kɛ amun yo ninnge wie mun naan amun awlo lɔ Ɲanmiɛn sulɛ’n w’a yo amun awlobofuɛ’m be ye? ?Yɛ dɔ nga su’n nin? Sɛ ɔ fata kɛ an kaci amun sa ekun’n, amun srɛ Zoova naan ɔ uka amun. I liɛ’n, amún úka awlofuɛ mun naan b’a fite nun.—Efɛ. 5:15-17.