Maan e bo jasin fɛ’n i kpa tra laa: Maan e fa fluwa Biblu’n kle e fa kle sran’m be Biblu’n nun like trele

?Ngue ti yɛ ɔ ti cinnjin ɔn? Kɛ e se sran’m be kɛ e kle Biblu’n nun like naan be tuaman sika’n, be nun kpanngban be wunmɛn i wlɛ. Be kwla bu i kɛ e kle sran’m be like kɛ nga be fa yo i suklu’m be nun, annzɛ ɛntɛnɛti su’n sa. I sɔ’n ti’n, nán maan e se sran’n i ngbɛn kɛ e kunndɛ kɛ é klé i Biblu’n nun like. Sanngɛ kɛ e to i cɛ’n, maan e nin i e bo Biblu’n nun like suanlɛ’n bo trele naan ɔ wun wafa nga e kle sran’m be Biblu’n nun like’n. Sɛ bɔbɔ sran’n leman blɛ kpanngban’n, e kwla fa blɛ kan sɔ’n e nin i e bo Biblu’n nun like suanlɛ bo.

?Wafa sɛ yɛ é yó i sɔ ɔ?

Maan e yo sran’n i like, kpɛkun e bo e dunman’n e kle i. I sin’n, e kwla usɛ i kɛ: “?Kɛ a niɛn i sa’n, lika’n yó kpa annzɛ ɔ́ yó tɛ́ tra laa’n?”
Maan e se i kɛ ndɛ sɔ’n ti sran kpanngban be cinnjin. Kpɛkun maan e fa e fluwa Biblu’n kle i nun ndɛ tre mun e kle i. I sin’n, maan e se i kɛ fluwa sɔ’n i nun ndɛ’n i wlɛ wunlɛ’n yoman ya. Naan e ɲrun lɔ sa mun nin sa uflɛ’m be su ndɛ nga Biblu’n kan’n, be o fluwa’n nun. Kpɛkun maan e se i kɛ ɔ kle e ndɛ tre ng’ɔ ti i cinnjin’n.
Maan e fa fluwa Biblu’n kle i kun e mɛn i, kpɛkun e fɛ i ɲin e sie i like suanlɛ m’ɔ yiyi ndɛ tre ng’ɔ ti i cinnjin’n nun’n, i su. I sin’n, maan e se i kɛ kosan nga be o ndɛ tre’n i flɛlɛ’n i bo lɛ’n, be su tɛlɛ’n o ndɛ kpɔlɛ’m be nun.
Sɛ ɔ ti i klun su’n, maan e se i kɛ ɔ kanngan ndɛ kpɔlɛ klikli’n nun. I sin’n, e usɛ i i su kosan’n. Kpɛkun maan e ukɛ i naan ɔ wun i su tɛlɛ’n. Biblu’n i nun ndɛ mma nga be suan kosan’n i su tɛlɛ’n i bo’n, maan e kanngan be nun naan e yiyi be nun. Kosan’n i su tɛlɛ nga e sieli i nzɔliɛ e bɔbɔ e fluwa liɛ’n nun’n, maan e fa kle i.
I sin’n, maan e fɛ i ɲin e sie i ndɛ kpɔlɛ nɲɔn su’n su. Maan e se i kɛ nán maan ɔ kanngan kosan’n i su tɛlɛ ng’ɔ o fluwa’n nun’n i nun tɛɛn guɛ i lɔ. Sanngɛ maan ɔ tɛ kosan’n su kɛ nga ɔ fa wun i wlɛ’n sa.
Maan e yo i mo. Kpɛkun cɛn nga e kwla sa e sin e gua like suanlɛ’n i bo’n, maan e nuan sɛ su.
Sɛ ɔ nin i fata’n, maan e fɛ i ɲin e sie i Biblu’n i nun like suanlɛ’n i su video ng’ɔ o e ɛntɛnɛti adrɛsi’n su’n i su. Be flɛ i kɛ ?Wafa sɛ yɛ e kle sran’m be Biblu’n nun like ɔ?

Anglo nga nun’n, maan e yo nga e nian:

Maan e srɛ Zoova kɛ ɔ uka e naan e nin sran kun e bo Biblu’n i nun like suanlɛ bo.—Fil. 2:13.
Maan e mian e ɲin e kle sran mun wafa nga be fa fluwa Biblu’n kle be suan Ɲanmiɛn Ndɛ’n. Annzɛ kɛ é bó jasin fɛ’n, maan e bo video ?Wafa sɛ yɛ e kle sran’m be Biblu’n nun like ɔ? e kle be.