Wafa nga e kwla fa fluwa Jasin fɛ e kle sran’m be like’n
1. ?Wafa sɛ yɛ be siesieli fluwa Jasin fɛ i nun ndɛ mun ɔn?
1 Zuie anglo’n nun’n, e kannin e fluwa Jasin fɛ kpa kun fin Ɲanmiɛn! i ndɛ. E seli kɛ ɔ ti e junman dilɛ ninnge’m be nun cinnjin kpa kun. Biblu’n i nun ndɛ mma wie’m be o fluwa sɔ’n nun. Sanngɛ b’a klɛman be nun ndɛ mun. Be yoli i sɔ naan sran nga e fa fluwa’n e mɛn i’n, i bɔbɔ kanngan ndɛ mma sɔ’m be nun Biblu’n nun trele. E fluwa nga e fa kle sran’m be like’n, wafa nga be klɛli be nun sunman’n ti’n, sran kun i ngunmin kwla suan be nun like kpɛkun ɔ wun i wlɛ. Sanngɛ fluwa Jasin fɛ, ɔ timan sɔ. Wafa nga be klɛli’n, ɔ fata kɛ sran kun yɛ ɔ fa kle sran uflɛ like ɔ. I sɔ’n ti’n, sɛ e fa man kun’n, ɔ fata kɛ e kle i wafa nga e fa kle sran’m be like’n. I liɛ’n, ɔ́ sí jasin fɛ ng’ɔ o Biblu’n nun’n, kpɛkun i klun jɔ́.—Mat. 13:44.
2. ?Kɛ e ko to sran’n, wafa sɛ yɛ e kwla fa fluwa Jasin fɛ e di junman ɔn?
2 Kɛ e ko to sran’n: E kwla se i kɛ: “Sa nga ti yɛ m ba’n, yɛle kɛ sran’m be usa be wun kɛ: ‘?E ɲrun lɔ’n yó sɛ?’ ?A bu i kɛ mɛn’n yó kpa ekun? [Maan sran tɛ su.] Biblu’n i nun ndɛ fɛ kpanngban be kwla gua e awlɛn su nzue. Kosan wie’m be o wa’n, Biblu’n tɛ be su.” I sin’n, maan e fa fluwa’n e man sran’n. Kpɛkun, e se i kɛ ɔ fa kosan nga be o fluwa’n i sin bui’n su’n, be nun kun. I sin’n, maan e fa fluwa’n i ndɛ tre ng’ɔ tɛ kosan sɔ’n su’n, kpɛkun maan e fɛ i kpɔlɛ klikli’n naan e kle i wafa nga e fa fluwa’n e kle sran’m be Biblu nun like’n. Wie liɛ kusu’n, e bɔbɔ e kwla fa fluwa’n i nun kosan kun e usa sran’n. Kpɛkun, wafa nga fluwa’n kwla ukɛ i naan w’a wun kosan’n i su tɛlɛ’n Biblu’n nun’n, maan e kle i. Sɛ ndɛ’n i su video wie o jw.org/bci su’n, jasin bofuɛ wie’m be bo be kle sran’n.
3. ?Wafa sɛ yɛ e kwla fa fluwa Jasin fɛ e kle sran’m be like ɔ?
3 Wafa ng’ɔ fata kɛ e fa kle like’n: (1) Maan e kanngan kosan nga be klɛli i tuun kpa’n mɔ nimielo wo i wun lɛ’n. I liɛ’n, sran’n i ɲin trán ndɛ ng’ɔ ti cinnjin’n su. (2) Maan e kanngan i bo lɛ ndɛ kpɔlɛ’n. (3) Maan e kanngan Biblu’n nun ndɛ mma nga be ciali be’n. Kpɛkun, wafa nga ndɛ mma sɔ’m be tɛ kosan nga nimielo wo i wun lɛ’n i su’n, maan e usɛ i kosan amanniɛn su naan ɔ wun i. (4) Sɛ ndɛ kpɔlɛ uflɛ o kosan i bo lɛ’n ekun’n, maan e flan ajalɛ 2 su’n nin 3 su’n be nun. Sɛ kosan’n i su video kun o lɛ naan e nin a boman e nin a klemɛn i’n, maan e bo e kle i. (5) Kasiɛn su’n, maan e fa ndɛ kpɔlɛ’n i su kosan’n e usɛ i ekun naan e nian, sɛ ɔ wun ndɛ’n i wlɛ o.
4. ?Ngue yɛ é yó naan y’a fa fluwa cinnjin sɔ’n y’a di junman kpa ɔ?
4 Maan e bɔbɔ e suan nun like naan e wun i nun ndɛ’n i wlɛ kpa. Sɛ e ɲɛn i wun atin’n, maan e fa di junman. Ka naan y’a fa kle sran kun i like’n, ɔ fata kɛ e bu wafa ng’ɔ wun ninnge’m be wlɛ’n i akunndan. Kpɛkun, wafa nga e nin i e kwla koko Biblu’n nun ndɛ mma nga be o like suanlɛ nun’n be su yalɛ naan w’a wun ndɛ’m be wlɛ’n, maan e bu i akunndan wie. (Nya. 15:28; Yol. 17:2, 3) Maan e fa fluwa sɔ’n e di junman titi. Sɛ e yo sɔ’n, é wún kɛ e junman dilɛ like cinnjin kpa kun ɔn. Ɔ maan é kúnndɛ kpa kɛ é fá klé sran’m be like naan be si ndɛ nanwlɛ’n.