Sɛ e waan é sí like kle kpa’n, ɔ fata kɛ e siesie e wun

Sran’m be usali Zezi like ng’ɔ fata kɛ be yo naan b’a ɲan anannganman nguan’n. Wafa nga sran sɔ’m be fa ti’n, i su yɛ Zezi niannin tɛli kosan’n su ɔ. (Lik 10:​25-28; 18:​18-20) I sɔ’n ti’n, kannzɛ fluwa nga e fa kle sran’m be like’n, e si be nun ndɛ’m be kpa’n, sanngɛ ka naan y’a wɔ sran kun i like klelɛ’n, kɛ é síesíe e wun’n, ɔ fata kɛ e bu sran’n i akunndan. E kwla usa e wun kɛ: ?Ndɛ benin mun yɛ be wlɛ wunlɛ annzɛ be su falɛ kwla yo kekle sran’n i sa nun ɔn? ?Biblu’n nun ndɛ mma benin mun yɛ ɔ fata kɛ e nin i e kanngan be nun ɔn? ?Ndɛ kpɔlɛ nɲɛ yɛ ɔ fata kɛ e suan nun like ɔ? Kɛ ɔ ko yo naan sran’n w’a wun ndɛ’n i wlɛ’n, e kwla bu sunnzun ase, annzɛ wafa nga é yíyí ndɛ wie’m be nun’n, annzɛ kosan wie mɔ e kwla usɛ i’n, be akunndan. Asa ekun’n, Zoova yɛ maan ndɛ nanwlɛ nga e lua’n kwla yo kpa ɔ. I sɔ ti’n, maan e srɛ man sran’n. Kpɛkun e srɛ Zoova naan ɔ yra e wun siesielɛ’n, nin e ɲin mɔ e mian e uka sran’n be su.​—1 Kor. 3:6; Zak 1:5.