Maan e si jasin fɛ’n i bo kpa tra laa​—Maan e bo jasin fɛ’n telefɔnun nun

?NGUE TI YƐ Ɔ TI CINNJIN-ƆN?: Telefɔnun nun jasin bolɛ’n ti cinnjin afin ɔ yo maan e bo “jasin fɛ’n” i kpa ekun. (Yol 20:24)a Sɛ sa wie’m be ti’n, e kwlá ko nianman sran kun i osu’n, e kwla flɛ i telefɔnun nun naan e nin i y’a koko yalɛ.

?WAFA SƐ YƐ É YÓ I SƆ-Ɔ?:

• 

  Maan e siesie e wun. Maan e bu ndɛ ng’ɔ́ yó sran i fɛ’n i akunndan. Yɛ ndɛ nga e klo kɛ é kán klé sran’n, maan e bu i akunndan e sie wie. Asa’n, sɛ e flɛ sran kun naan ɔ sɔman su’n, e kwla kan sa nga ti yɛ e flɛli i’n i ndɛ kpe kan, i liɛ’n sɛ ɔ yo’n sran’n kwla tie. Ɔ maan kɛ é síesíe e wun’n, maan e bu i sɔ liɛ’n i akunndan wie. Maan e tran tabli kun sin kpɛkun e fa ninnge kwlaa nga be kwla uka e’n e sie e wun lɛ. Ɔ kwla yo ajulisu mannzin wie mɔ JW Library^® o su’n annzɛ m’ɔ kɔ jw.org^® su’n. Kpɛkun e tike su.

• 

  Maan e ijɔ kɛ nga e fa ijɔ titi’n sa. Maan e sri puɛɛ, yɛ e yo kɛ sran’n wo e ɲrun lɛ sa. Nán e sikposikpo dan. Sɛ e nin aniaan wie mun yɛ e bo jasin fɛ’n ɔ ti kpa. Sɛ sran’n usa kosan’n, maan e flan kosan’n nun naan aniaan ng’ɔ o e wun lɛ’n ɔ ti wie. I liɛ’n, ɔ́ kwlá úka e naan y’a tɛ sran’n su.

• 

  Maan e mian e ɲin naan e ko nian sran’n i osu. Sɛ sran’n kle kɛ ndɛ’n ti i cinnjin’n, maan e usɛ i kosan kun naan cɛn uflɛ’n e nin i y’a koko su yalɛ. Asa’n, e kwla fa fluwa kun annzɛ video annzɛ kusu ndɛ wie m’ɔ o e fluwa’m be nun’n e ko man sran’n i ɛntɛnɛti adrɛsi’n su. Asa ekun’n, e kwla se sran’n kɛ ɔ kwla wun ninnge uflɛ wie mun e ɛntɛnɛti adrɛsi’n su.