Ninnge nga e kwla yo be naan y’a ɲan jasin fɛ bolɛ aɲia’n i su ye’n

Jasin fɛ bolɛ aɲia’n ti kɛ aɲia onga’m be sa. Ɔ fin Zoova. Aɲia sɔ’n yo maan e kle kɛ e klo e wiengu yɛ ɔ uka e naan y’a kwla di junman’n i kpa. (Ebr 10:24, 25) Ɔ fata kɛ ɔ di miniti nnun annzɛ nso. Blɛ sɔ nun’n aniaan ng’ɔ tinngɛ aɲia’n ɔ siesie aniaan mun, ɔ kle be lika ng’ɔ fata kɛ be bo jasin fɛ’n yɛ i bɔbɔ annzɛ sran uflɛ srɛ Ɲanmiɛn. (Sɛ be yoli aɲia naan i sin’n ɔ fata kɛ be yo jasin fɛ bolɛ aɲia’n, ɔ fata kɛ ɔ yo kpe kan.) Ɔ fata kɛ aɲia’n i tinngɛfuɛ’n ɔ siesie i wun kpa naan like ng’ɔ́ fá klé aniaan nga bé bó jasin fɛ’n cɛn sɔ nun’n ɔ uka be kpa. Sɛ kɛ ɔ fɛ i Fue annzɛ Mɔnnɛn ng’ɔ sinnin lɛ’n aniaan’m be sunman be nian-a boman jasin fɛ’n, aɲia’n i tinngɛfuɛ’n kwla fa be ɲin sie i wafa nga e nin sran mun e kwla koko yalɛ’n su. I sɔ’n yɛ ɔ kwla uka be kpa-ɔ. ?Ninnge benin wie mun ekun yɛ sɛ amun koko su yalɛ’n ɔ ti kpa-ɔ?

• Wafa nga e nin sran mun e kwla koko yalɛ’n i wun ajalɛ m’ɔ o fluwa Klisifuɛ mun nin be junman’n—Aɲia fluwa nun’n.

• Wafa nga e kwla jran sa kun m’ɔ juli koko nun wa’n su naan e nin sran mun y’a bo yalɛ kokolɛ bo’n.

• Wafa nga e kwla tɛ kosan kun mɔ sran’m be usa fa tanndan e ɲrun’n su’n.

• Wafa nga e kwla tɛ sran kun m’ɔ lafiman su kɛ Ɲanmiɛn o lɛ’n annzɛ m’ɔ bu i kɛ ninnge’m be boli nun sa ngbɛn’n annzɛ m’ɔ kanman e aniɛn’n i su’n. Annzɛ wafa nga e kwla tɛ sran kun mɔ be tɛmɛn i Ɲanmiɛn sulɛ wafa’n i wun e asa liɛ’n su lɔ’n i su’n.

• Wafa nga e kwla fa Biblu’n annzɛ ninnge nga be o jw.org annzɛ JW Library^® su e di junman’n.

• Wafa nga e kwla fa like kun e Like Klelɛ Ninnge’m be siewlɛ nun e di junman’n.

• Wafa nga e kwla si ninnge trele wie’m be yo jasin fɛ bolɛ’n nun’n. I wie yɛle telefɔnun nun jasin fɛ bolɛ’n annzɛ lɛtri m’ɔ e klɛ e man sran mun’n, annzɛ nzra nun jasin fɛ bolɛ’n annzɛ sran osu nianlɛ’n annzɛ kusu sran’m be Biblu’n nun like klelɛ’n.

• Kɛ é bó jasin fɛ’n e kwla kan wafa nga e kwla sasa e wun’n nin wafa nga e kwla kacikaci ndɛ nga e kan’n ɔ nin wafa nga e kwla yi nzuɛn kpa nglo’n be ndɛ. Asa ekun’n e kwla kan wafa nga e kwla bu sran’m be wun akunndan kpa’n, annzɛ ninnge uflɛ wie mun ekun be ndɛ.

• Fluwa Mian ɔ ɲin naan si kanngan yɛ si like kle i nun ndɛ tre kun annzɛ video kun.

• Wafa nga e kwla uka aniaan nga e nin i e bo jasin fɛ’n yɛ e wla be fanngan’n.

• Biblu’n nun ndɛ mma wie mɔ e jran su e bo jasin fɛ’n annzɛ jasin fɛ bolɛ’n i su ndɛ fɛ wie mun.