?Wan mun yɛ be ti ɔ janvuɛ ɛntɛnɛti su-ɔ?

Kɛ be kan janvuɛ ndɛ’n yɛle sran ng’ɔ fɛ i wun mantan e kpa mɔ kusu i ɲin yi e’n. I wie yɛle Davidi nin Zonatan be liɛ’n. Kɛ Davidi kunnin Goliati’n ɔ nin Zonatan be wa trali janvuɛ yɛ be janvuɛ tralɛ sɔ’n ɔ yoli tankaan kpa. (1Sa 18:1) Nzuɛn nga sran kun ko yi i nglo naan i wiengu kun w’a fɛ i wun w’a mɛntɛn i’n yɛ be nɲɔn’n be yili i nglo-ɔ. Ɔ maan sɛ e waan e nin sran kun e janvuɛ tralɛ’n i bo wla ase kpa’n ɔ fata kɛ e si i kpa. Kpɛ sunman’n kɛ ɔ ko yo naan y’a si sran kun’n ɔ fata kɛ e mian e ɲin kpa yɛ ɔ fa blɛ. Sanngɛ ɛntɛnɛti su liɛ’n janvuɛ tralɛ’n timan kekle. Kɛ a ko tin butɔn kun su cɛ’n kpɛkun a nin sran’n b’a kaci “janvuɛ.” Ɛntɛnɛti su’n sran’m be kwla siesie ndɛ nga be waan bé kán’n sɛsɛsɛ yɛ kusu ninnge nga sran’m be klo be’n yɛ be fa sie i lɔ-ɔ. Kɛ m’ɔ ti sɔ’n sran wie’m be yo sɔ fa fia sran wafa nga be ti’n su. I ti’n ɔ fata kɛ e nian e wun su kpa sran wafa nga e tra be janvuɛ ɛntɛnɛti su’n be lika. Sɛ sran kun mɔ e simɛn i kunndɛ kɛ ɔ nin e trá janvuɛ ɛntɛnɛti su’n nán e kplin su. Nán maan wafa nga sran’n i wun’n yó i’n ti’n srɛ kun e. Kɛ sran wie’m be wun sa ng’ɔ kwla ɲan be ɛntɛnɛti su’n, be kpɛ i kpo be nin sran kokoman yalɛ ɛntɛnɛti su. ?Sanngɛ sɛ e fa ajalɛ kɛ e nin sran mun é kókó yalɛ ɛntɛnɛti su’n, ngue yɛ ɔ fataman kɛ e wla fi su-ɔ?

AN NIAN VIDEO NGA BE FLƐ I KƐ NIAN Ɔ WUN SU ƐNTƐNƐTI SU YALƐ KOKOLƐ’N NUN. I SIN’N, AN TƐ KOSAN NGA’M BE SU:

• ?Kwlaa naan y’a klɛ ndɛ wie annzɛ kusu y’a fa foto wie y’a sie i ɛntɛnɛti su’n ngue yɛ ɔ fata kɛ e bu i akunndan-ɔn?

• ?Kɛ é trá janvuɛ ɛntɛnɛti su’n, ngue ti yɛ ɔ fata kɛ e nian e wun su kpa-ɔ?

• ?Ngue ti yɛ ɔ fataman kɛ e di dɔ kaka ɛntɛnɛti su-ɔ? —Efɛ 5:15, 16