Kɛ sanvuɛsa tɔ’n wafa nga e kwla uka sran mun’n

Andɛ’n, sanvuɛsa’m b’a sɔn kpa. Kɛ sanvuɛsa tɔ’n, ɔ fata kɛ e siesie e wun kpa naan y’a kwla uka be nga be mian ukalɛ wun’n. I ti’n, Anuannzɛ’n i Ɲrun Dinfuɛ’m be kpɛli biolo kun ba Betɛli kwlaa nun naan sɛ i sɔ’n sa’n ju’n aniaan nga be o biolo sɔ’n nun’n be siesie junman’n.

Ɔ maan kɛ sanvuɛsa tɔ’n, ndɛndɛ kpa aniaan nga be o biolo sɔ’n nun’n be flɛ asɔnun kpɛnngbɛn mun naan b’a wun wafa nga be kwla uka aniaan mun’n. Sɛ ninnge’m be sacili dan naan aniaan nga be o lika sɔ’n nun’n be sa sɔnman junman’n su’n, Betɛli’n kpa aniaan wie mun naan be ko nian junman’n su. Aniaan sɔ’m be kwla se aniaan’m be kɛ be w’a uka be annzɛ be bobo sika kan naan be fa yo ninnge trele wie mun. Annzɛ kusu’n, be kwla toto ninnge wie mɔ aniaan’m be mian be wun’n fa cɛcɛ be.

I sɔ yolɛ’n ti kpa, afin sɛ aniaan’m be yo ninnge mun kɛ nga be bɔbɔ be klo’n sa’n, bé klé be wun yalɛ ngbɛn yɛ ninnge’m bé yó sukusuku. Asa’n, bé sáci sika nin ninnge uflɛ wie mun.

Aniaan nga Betɛli’n kpa be’n, be si sika nin aniaan nga be mian be wun naan b’a di junman sɔ’n. Asa’n, be nin lika sɔ’n nun lɔ awa janunfuɛ’m be kwla ti be wun aniɛn. I liɛ’n be kwla uka aniaan mun naan junman’n w’a wɔ i ɲrun ndɛndɛ. Ɔ maan sɛ b’a manman amun atin’n, nán amun se aniaan’m be kɛ be bobo sika annzɛ be fa like wie ko man aniaan nga sa sɔ’n wo be su’n. Asa’n, nán amun tu ajalɛ be wɔ lɔ.

Kɛ sanvuɛsa tɔ’n e kunndɛ kɛ e uka e niaan mun afin e klo be! (Ebr 13:16) ?Ɔ maan ngue yɛ e kwla yo-ɔ? Like cinnjin kpa nga e kwla yo’n yɛle kɛ e srɛ e man aniaan nga sa sɔ’n tɔli be su’n nin be nga be ɔli be ukalɛ’n. Asa’n, e kwla man e sa ti like suan mɛn’n wunmuan’n nun junman’n i bo. Aniaan nga be o Betɛli’m be nun’n be si lika nga aniaan’m be mian ukalɛ wun kpa’n. Ɔ maan Anuannzɛ’n i Ɲrun Dinfuɛ’m be man be atin naan be fa e sa ti like nga e man’n be uka aniaan mun. Sɛ i sɔ’n sa’n ju naan e kunndɛ kɛ é yó like uflɛ úka be’n, maan e dun mmua klɛ fluwa nga be flɛ i kɛ Demande d’admission comme volontaire local développement/construction (DC-50) su.

AN NIAN VIDEO NGA BE FLƐ I KƐ NZUE’N DILI LIKA’N BLEZILI LƆ. I SIN’N, AN TƐ KOSAN NGA SU:

?Afuɛ 2020 nun’n, kɛ nzue’n dili lika Blezili lɔ’n ngue yɛ Zoova i Lalofuɛ’m be yoli m’ɔ yo ɔ ɲɛnmɛn-ɔn?