?NGUE YƐ Ɔ KWLA YO MAAN SRAN KPƆLƐ’N WIE-Ɔ?

1 | Nán kpa sran nun

Ndɛ nga Biblu’n kan’n:

“Ɲanmiɛn kpaman sran nun. Sanngɛ nvle kwlaa nun’n, sran ng’ɔ sro i m’ɔ yo sa ng’ɔ ti kpa’n, i sɔfuɛ’n yɛ i klun jɔ i wun-ɔn.”—SA NGA BE YOLI’N 10:34, 35.

Like nga ndɛ sɔ’n kle e’n:

Ɲanmiɛn Zoovaa jranman e finwlɛ annzɛ e wunnɛn kplo, ɔ nin wafa nga e yo ninnge’m be su diman e jɔlɛ. Like ng’ɔ ti i cinnjin yɛle akunndan nga bu’n nin ninnge nga e konvi sɔ be’n. Biblu’n se kɛ: “Sran’m be nian nga be nyinma wun i’n, sanngɛ min liɛ’n, n nian lele ju awlɛn’n i bo lɔ.” —1 Samiɛl 16:7.

Like nga a kwla yo’n:

Kannzɛ e kwlá siman sran’m be klun akunndan’n, sanngɛ e kwla yo kɛ Ɲanmiɛn sa. Yɛle kɛ nán e kpa sran nun. Kɛ a wun sran kun’n, nán se kɛ, kɛ mɔ akpasua sɔ nunfuɛ’m be ti sa’n ti’n, i kusu ɔ ti sɔ wie. Sɛ a bu sran kun i wun akunndan tɛ afin i finwlɛ annzɛ i wunnɛn kplo’n nin ɔ liɛ’n be timan kun’n, srɛ Ɲanmiɛn naan ɔ uka ɔ naan a yaci akunndan sɔ’n i bulɛ. (Jue Mun 139:23, 24) Sɛ a tu ɔ klun srɛ Zoova kɛ ɔ uka ɔ naan w’a kpaman sran nun kun’n, a kwla lafi su kɛ ɔ́ tíe ɔ srɛlɛ’n yɛ ɔ́ úka ɔ.—1 Piɛli 3:12.

a Zoova ti Ɲanmiɛn i dunman.—Sa Nglo Yilɛ 4:11

“Lele m’ɔ́ fá jú yɛ’n, e nin blɔfuɛ fi e ti nin-a sɛman le […] Siɛn’n, n wun i wlɛ kɛ n le niaan mɛn wunmuan’n nun yɛ be klo be wun.”—TITI

Sran kun i su ndɛ—TITI

Ɔ yacili sran kpɔlɛ

Be flɛ bian kun kɛ Titi, ɔ fali ya afin be kpɛli mmla kun m’ɔ yo maan sran’m be kpɔ sran akpasua wie mun. Ɔ maan ɔ fɛli i wun wlɛli i sran wie mɔ be bu akunndan kɛ i sa’n be nun’n. Ɔ seli kɛ: “E ɲinfu e kɔ lika ng’ɔ fataman kɛ sran ble’n be wɔ lɔ’n be nun. Ɔ kwla yo otɛli annzɛ nzan nɔnwlɛ’m be nun. E yo sɔ naan é kúnndɛ be utre.” Titi seli kɛ sran kpɔlɛ’n m’ɔ yoli dan i awlɛn’n nun’n ti’n, ɔ wa yoli sran mɔ i like yolɛ yo ya-ɔ. Yɛ ɔ kan guali su kɛ: “Sɛ e nin sran kun e su kan ndɛ, maan ɔ yo bla annzɛ yasua, naan ndɛ ng’ɔ kan’n timan n liɛ su’n, i ɲin m’ɔ bo i bla-ɔ m’an to i acɔliɛ.”

Kɛ Zoova i Lalofuɛ’m be boli Titi i Biblu’n nun like kekle bo’n, ɔ wa kacili i nzuɛn. Kɛ ɔ kanngan Biblu’n nun’n ɔ wluwlu i wun ɔ maan ɔ wa kacili i akunndan bulɛ wafa’n. Ndɛ ng’ɔ yoli i fɛ kpa’n yɛle nda nga Ɲanmiɛn tali e’n m’ɔ kan mɛn uflɛ kun i ndɛ’n. Mɛn sɔ’n nun’n “wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.”—Sa Nglo Yilɛ 21:3, 4.

I bo bolɛ nun’n, kɛ ɔ ko yo naan Titi w’a yaci sran kpɔlɛ’n, ɔ yoli kekle. Ɔ seli kɛ: “Min akunndan bulɛ wafa’n i kacilɛ’n w’a yoman pɔpɔ.” Sanngɛ ndɛ ng’ɔ o Sa Nga Be Yoli’n 10:34, 35 nun’n ɔ ukɛli i kpa. Ndɛ sɔ’n kle kɛ Ɲanmiɛn kpaman sran nun.

?Wafa sɛ yɛ i bo guali-ɔ? Titi bɔbɔ tɛ su kɛ: “Like ng’ɔ ukali min naan m’an wun i wlɛ kɛ Zoova i Lalofuɛ’m be o Ɲanmiɛn sulɛ kpafuɛ’n nun’n yɛle kɛ be klo be wiengu mun. Be nianman sran kun wunnɛn kplo’n annzɛ i finwlɛ’n naan b’a klo i. Ka naan b’a yo min batɛmun bɔbɔ’n e asɔnun’n nun lɔ’n, aniaan bian kun m’ɔ ti blɔfuɛ’n yiali min i awlo lɔ naan e ko wla asa. Ɔ yoli min kɛ n su cɛn laliɛ sa. Lele m’ɔ́ fá jú yɛ’n, e nin blɔfuɛ fi e ti nin-a sɛman le. Sanngɛ andɛ’n, min yɛ n ti blɔfuɛ kun i awlo yɛ e su di like yɛ. Siɛn’n, n wun i wlɛ kɛ n le niaan mɛn wunmuan’n nun yɛ be klo be wun.”