Like suanlɛ’n i su afɔtuɛ wie mun

?Ngue su yɛ ɔ fata kɛ e dun mmua e fa e ɲin e sie-ɔ?

Andɛ’n, kɛ ɔ ko yo naan y’a ɲan blɛ naan e ngunmin y’a suan Biblu’n nun like’n ɔ ti kekle. ?Ɔ maan é yó sɛ naan y’a ɲan blɛ kan nga e fa suan like’n i su ye kpa? Like klikli nga e kwla yo’n, yɛle kɛ sɛ e kanngannin ndɛ wie nun’n, maan e fa blɛ kaka e bu su akunndan. Nán e se kɛ é fá e ɲin é síe i like kaka su. Sanngɛ e fa e ɲin e sie i like kan nga e suannin’n su kpa. Sɛ e yo sɔ’n, é ɲán su ye dan.

I sin’n, e fa e ɲin e sie i ninnge nga be ti cinnjin’n be su. (Efɛ. 5:15, 16) Maan e fa e ɲin e sie i ndɛ nga’m be su:

• Maan e kanngan Biblu’n nun cɛn kwlakwla. (Jue. 1:2) E kwla bo i bo Biblu’n i bue ng’ɔ fata kɛ e kanngan nun lemɔcuɛ kwlaa’n nun’n i su.

• Maan e siesie Sasafuɛ Tranwlɛ’n i nun like suanlɛ’n nin lemɔcuɛ afiɛn aɲia’n. Sɛ e siesie e wun kpa’n, é kwlá tɛ́ kosan’m be su aɲia’m be bo.—Jue. 22:22.

• Sɛ e ɲan blɛ kan’n, e fa e ɲin e sie i Ɲanmiɛn i sulɛ nun ninnge uflɛ wie’m be su. I wie yɛle kɛ e kwla kanngan periodiki mun nin ndɛ nga be o jw.org su’n be nun yɛ amun kwla nian video mun.

• Maan e suan ndɛ wie m’ɔ ti e cinnjin’n i su like. I lɛ nun’n, e kwla kunndɛ sa wie m’ɔ o e su’n i su like annzɛ e kwla kunndɛ kosan wie mɔ e fa usa e wun’n i su tɛlɛ’n. Annzɛ kusu’n, e kwla suan Biblu’n nun ndɛ wie mɔ e kunndɛ kɛ é wún i wlɛ kpa’n i su like.