Klolɛ’n ti’n maan e bo jasin fɛ’n titi

1. ?Afuɛ 2023 nun’n, kɛ anuannzɛ’n yó i afuɛ nuan aɲia’n, ndɛ benin yɛ be kannin-ɔn?

AFUƐ 2023 nun’n, kɛ anuannzɛ’n yó i afuɛ nuan aɲia’n,a be yiyili Biblu’n nun ndɛ wie’m be nun uflɛ, yɛ be boli jasin fɛ bolɛ’n i wun ajalɛ uflɛ wie mɔ b’a fa’n be su. Yɛle kɛ be seli kɛ atrɛkpa’n, kɛ be ko nunnun Babilɔnin Klɔ Dan’n bɔbɔ’n, sran wie’m be kwla ba Zoova i sulɛ. Asa’n be seli kɛ, kɛ ɔ fɛ i afuɛ 2023 Novanblu nun’n, nán junman kwlaa nga jasin bofuɛ’m be di i jasin fɛ bolɛ junman’n nun’n, yɛ bé klɛ́ i be rapɔru’n su-ɔ. ?I sɔ mɔ be kannin’n ti’n, é sé kɛ jasin fɛ bolɛ’n timan cinnjin kɛ laa’n sa kun? Cɛcɛ.

2. ?Ngue ti yɛ kɛ cɛn’m bé sín’n nn jasin fɛ bolɛ’n, ɔ́ yó cinnjin kpa ekun trá laa-ɔ? (Marki 13:10)

² Kɛ cɛn’m bé sín’n nn jasin fɛ bolɛ junman’n ɔ́ yó cinnjin kpa ekun trá laa’n. Afin blɛ ng’ɔ ka’n w’a sɔnman kun. Zezi kannin jasin fɛ nga é wá bó i mɛn’n i awieliɛ blɛ’n nun’n i ndɛ. (An kanngan Marki 13:10 nun.) Matie fluwa’n nun’n, Zezi seli kɛ bé bó jasin fɛ’n asiɛ’n wunmuan’n su kwlaa naan ‘mɛn’n w’a wie.’ (Mat. 24:14) Mɛn’n i awieliɛ sɔ’n yɛle Satan i mɛn’n i nunnunlɛ. Zoova w’a dun mmua w’a sie cɛn nin dɔ nga sa sɔ’m bé jú’n. (Mat. 24:36; 25:13; Yol. 1:7) Kɛ blɛ’n sín’n nn cɛn sɔ’n mántan koko. (Rɔm. 13:11) Kwlaa naan cɛn sɔ’n w’a ju’n, ɔ fata kɛ e bo jasin fɛ’n titi.

3. ?Ngue ti yɛ e bo jasin fɛ’n niɔn?

³ ?Ngue ti yɛ e bo jasin fɛ’n niɔn? I sɔ’n ti kosan cinnjin kpa kun m’ɔ fata kɛ e bu i akunndan-ɔn. Sɛ e waan é kpɛ́ i kpe’n é sé kɛ, klolɛ’n ti yɛ e bo jasin fɛ’n niɔn. Kɛ e bo jasin fɛ’n e kle kɛ e klo jasin fɛ’n bɔbɔ, e klo e wiengu mun, yɛ ng’ɔ ti cinnjin trɛ i ngba’n e klo Zoova nin i dunman’n. Maan e fa e ɲin e sie i ndɛ sɔ’m be su kunngunngun.

E KLO JASIN FƐ’N

4. ?Kɛ e ti jasin fɛ kun’n, ngue yɛ e yo-ɔ?

⁴ Wienun-ɔn, e osufuɛ kun w’a wu ba, annzɛ y’a kunndɛ junman lele y’a ɲɛn i. I sɔ’n ti ndɛ fɛ. ?Nɛ́n i-ɔ? I lɛ nun’n, e su sisiman e bo naan y’a bo su y’a kle e osufuɛ nin e janvuɛ mun. I wafa kunngba’n, kɛ e tieli Ɲanmiɛn Sielɛ’n i su jasin fɛ’n e wun mɔ bliblili e’n ti’n, e kunndɛli kɛ é bó su klé sran uflɛ.

5. ?Kpɛ klikli nga a tili ndɛ nanwlɛ’n, i sɔ’n yoli ɔ sɛ? (An nian foto mun wie.)

⁵ Kpɛ klikli nga e tili ndɛ nanwlɛ m’ɔ o Biblu’n nun’n, wafa nga e wun yoli e’n maan e bu i akunndan e nian. E wunnin i wlɛ kɛ e Si Ɲanmiɛn klo e, naan ɔ kunndɛ kɛ e trɛn i sufuɛ’m be nun wie, naan cɛn wie lele’n ɔ́ wá yó maan afɛ nin ɲrɛnnɛn’n bé wíe. Asa’n, e wunnin i wlɛ kɛ e awlɛn su sran nga be wuli’n, be kwla sa be sin nguan nun ekun mɛn uflɛ’n nun lɔ. Yɛ e wunnin ninnge uflɛ wie mun ekun. (Mar. 10:​29, 30; Zan 5:​28, 29; Rɔm. 8:​38, 39; Ngl. 21:​3, 4) Kɛ e tili ndɛ sɔ mun’n, ɔ yoli e fɛ dan. (Lik. 24:32) E kloli like nga be kleli e’n, yɛ e kunndɛli kɛ é bó su é klé sran kwlaa.—An nian Zeremin 20:9 nun.

6. ?Ngue yɛ aniaan bian Ɛɛnɛsi nin i yi Rozu be su ndɛ’n kle e-ɔ?

⁶ Maan e fa e ɲin sie i sa kun su. Be flɛ aniaan bian kun kɛ Ɛɛnɛsi. Kɛ i baba wú’n nn ɔ le afuɛ blu. Aniaan bian’n waan blɛ sɔ’n nun’n, ɔ usɛli i wun kɛ: “?Min baba w’a ɔ ɲanmiɛn su, annzɛ kusu i liɛ yɛ ɔ wieli lɛ-ɔ?” I waan kɛ ɔ wun i wiengu mɔ be si liɛ’m be te o lɛ’n, m’ɔ bu i liɛ’n i akunndan’n, i sɔ’n yo i ya. I sɔ’n ti’n, ɔ ɔli i si i asieliɛ’n su lɔ titi. Kɛ ɔ ju lɔ’n, ɔ koto i ndia’n su lɛ. Kpɛkun ɔ srɛ Ɲanmiɛn se kɛ: “Ɲanmiɛn, yaci, kle min lika nga min baba wo’n.” Kɛ i si wuli m’ɔ dili afuɛ kɔe 17, Zoova i Lalofuɛ kun seli i kɛ ɔ́ klé i Biblu’n nun like. Yɛ ɔ kplinnin su. Kɛ ɔ wunnin kɛ be nga be wuli’n, ɔ ti kɛ be su lafi kpa sa’n, naan cɛn wie lele’n Ɲanmiɛn wá cɛ́n be’n, i sɔ’n yoli i fɛ kpa. (Aku. 9:​5, 10; Yol. 24:15) Kosan ng’ɔ fa usɛli i wun lele’n, ɔ wa wunnin wafa nga Biblu’n tɛ be su’n. Like nga Biblu’n kle’n, ɔ yoli Ɛɛnɛsi i fɛ kpa. Kɛ ɔ́ súan Biblu’n nun like’n, i yi mɔ be flɛ i Rozu’n, ɔ wa trɛnnin i bo wie. I kusu’n, like ng’ɔ suannin’n, ɔ yoli i fɛ wie. Afuɛ 1978 nun’n, be yoli be nɲɔn’n be batɛmun. Be boli jasin fɛ’n juejue su be kleli be osufuɛ mun nin be janvuɛ mun, ɔ nin sran uflɛ wie mun. Be kleli sran 70 tra su be Biblu’n nun like lele be yoli be batɛmun.

7. ?Kɛ e klo like nga e suɛn i Biblu’n nun’n, ngue yɛ e kunndɛ kpa kɛ é yó-ɔ? (Liki 6:45)

⁷ Nanwlɛ, kɛ e klo Biblu’n nun like nga e suan’n, e kwlá muanman e nuan. (An kanngan Liki 6:45 nun.) E wun yo e kɛ Zezi i sɔnnzɔnfuɛ klikli mun sa. Be seli kɛ: “Like nga e wunnin i’n, ɔ nin ndɛ nga e tili’n, e kwlá yaciman be ndɛ kanlɛ.” (Yol. 4:20) Kɛ mɔ e klo ndɛ nanwlɛ’n dan’n ti’n, e kunndɛ kɛ é bó su é klé sran kpanngban.

E KLO E WIENGU MUN

8. ?Ngue ti yɛ e klo kɛ é bó jasin fɛ’n é klé e wiengu mun-ɔn? (An nian kuku nga be flɛ i kɛ “Klo sran mun—Yo maan be kaci Zezi i sɔnnzɔnfuɛ” nun.) (An nian foto’n wie.)

⁸ Kɛ Zoova nin i Wa’n sa’n, e klo sran mun. (Ɲan. 8:31; Zan 3:16) Kɛ e wun be nga ‘be nin Ɲanmiɛn be nunman nun’n’ mɔ ‘be leman like mɔ bé fá be wla gúa su’n,’ be yo e annvɔ dan. (Efɛ. 2:12) Be ti kɛ sran mɔ b’a tɔ kunman dan kun nun sa. Yɛ ɲanman ng’ɔ kwla fa be fite’n, ɔ o e sa nun. Ɲanman sɔ’n yɛle Ɲanmiɛn Sielɛ’n i jasin fɛ mɔ e bo’n. Kɛ mɔ e klo be mɔ e si be aunnvɔɛ’n ti’n, e kunndɛ kɛ é yó like kwlaa nga e kwla yo’n naan y’a bo jasin fɛ’n y’a kle be. Kɛ e bo jasin fɛ’n e kle be’n, be kwla ɲan like mɔ bé fá be wla gúa su-ɔ. Asa’n, be kwla di aklunjɔɛ i kpafuɛ’n dɔ nga su. Yɛ cɛn wie lele’n, bé kwlá ɲán “nguan kpafuɛ’n.” Yɛle kɛ bé ɲán nguan m’ɔ leman awieliɛ’n Ɲanmiɛn i mɛn uflɛ’n nun.—1 Tim. 6:19.

9. (1) ?Sa benin mun yɛ bé wá jú e ɲrun lɔ mɔ e bo su e kle sran mun-ɔn? (2) ?Yɛ ngue ti yɛ e bo su kle be-ɔ? (Ezekiɛli 33:​7, 8)

⁹ Klolɛ mɔ e klo sran mun’n ti’n, e se be kɛ mɛn tɛ nga i awieliɛ’n w’a mantan koko. (An kanngan Ezekiɛli 33:​7, 8 nun.) E osufuɛ nin e mantanfuɛ nga be suman Zoova’n, be yo e annvɔ. Be nun kpanngban be siman sa nga bé wá jú e ɲrun lɔ’n. Kɛ be jaso’n, be su ko yo be ninnge mun. Be siman kɛ ɔ cɛ kan’n, ɲrɛnnɛn’n ɔ́ yó dan, naan kɛ ɔ fɛ i mɛn’n i bo bolɛ nun lele andɛ’n, i sɔ ɲrɛnnɛn liɛ’n i wunsu nin-a juman le, naan i wunsu su juman kun le. (Mat. 24:21) Blɛ sɔ’n nun mɔ Ɲanmiɛn wá dí sran’m be jɔlɛ’n, sa wie’m bé wá jú. Yɛle kɛ bé núnnún Ɲanmiɛn sulɛ wafa ng’ɔ timan su’n. Yɛ Aamagedɔn alɛ’n nun’n, bé núnnún mɛn tɛ nga. E kunndɛ kɛ be si sa sɔ’n nun. (Ngl. 16:​14, 16; 17:​16, 17; 19:​11, 19, 20) É srɛ́ kɛ sran kpanngban be ti ndɛ nga e kan’n, naan be wa su Zoova wie dɔ nga su. ?Yɛ e osufuɛ mun, ɔ nin sran uflɛ wie mun ekun mɔ dɔ nga su’n, be tieman ndɛ nga e kan kle be’n be li? ?Be liɛ’n yó sɛ?

10. ?Ngue ti yɛ ɔ ti cinnjin kpa kɛ e kan sa ng’ɔ́ wá jú’n, i ndɛ e kle sran mun-ɔn?

¹⁰ Like suanlɛ ng’ɔ sinnin lɔ’n nun’n, e wunnin kɛ kɛ bé wá núnnún Babilɔnin Klɔ Dan’n, sran wie’m be akunndan’n kwla kaci. Yɛ atrɛkpa’n, Zoova dé be. Sɛ ɔ́ yó sɔ sakpa’n, i sɔ’n kle kɛ ɔ ti cinnjin kpa kɛ e kan Babilɔnin Klɔ Dan’n i nunnunlɛ’n i ndɛ e kle be dɔ nga su. Sɛ e kɛn i sɔ ndɛ e kle be dɔ nga su’n, kɛ i sɔ sa’n wá jú’n, be wla kwla kpɛn su. Nán e wla fi i sɔ’n su. (An nian Ezekiɛli 33:33.) Atrɛkpa’n, be wla kpɛ́n ndɛ sɔ mɔ e kan kleli be’n su. Kpɛkun blɛ mɔ te yo ye’n, bé bá Zoova i sulɛ. Akoto’m be blɛ su’n, kɛ Filipu lɔ bisua sunianfuɛ kun wunnin kɛ asiɛ’n kejeli dan kpa’n, i akunndan’n kacili. I wafa kunngba’n, atrɛkpa’n kɛ sran wie’m bé wún kɛ b’a nunnun Babilɔnin Klɔ Dan’n, mɔ lika’n kéje’n, bé káci akunndan.—Yol. 16:​25-34.

E KLO ZOOVA NIN I DUNMAN’N

11. ?Wafa sɛ yɛ e kle kɛ sɛ be manman Ɲanmiɛn, be yi i ayɛ, yɛ sɛ be se kɛ ɔ le tinmin’n, ɔ ti su-ɔ? (Sa Nglo Yilɛ 4:11) (An nian foto mun wie.)

¹¹ Like cinnjin kpafuɛ nga ti yɛ e bo jasin fɛ’n, yɛle kɛ e klo Zoova, yɛ e klo i dunman m’ɔ ti sanwun’n. E wun i wlɛ kɛ jasin fɛ bolɛ’n, ɔ o Ɲanmiɛn mɔ e klo i’n i manmanlɛ’n nun wie. (An kanngan Sa Nglo Yilɛ 4:11 nun.) E wun i wlɛ kpa kɛ sɛ be manman Ɲanmiɛn Zoova’n, be yi i ayɛ naan be se kɛ ɔ le tinmin’n, ɔ ti su. Kɛ e yiyi nun e kle sran mun kɛ Ɲanmiɛn yɛ ɔ “yili like kwlaa” naan i dunman nun ti yɛ e o lɛ’n, i sɔ’n ti i manmanlɛ nin i ayɛ yilɛ. Kɛ e fa e blɛ’n nin e wunmiɛn’n, ɔ nin e ninnge mun e fa yo e liɛ nga e kwlɛ i yo jasin fɛ bolɛ nun’n, e kle kɛ tinmin’n ti i liɛ. (Mat. 6:33; Lik. 13:24; Kol. 3:23) Ɔ maan sɛ e waan é kpɛ́ i kpe’n, é sé kɛ klolɛ mɔ e klo Ɲanmiɛn’n i ti yɛ e klo i ndɛ kanlɛ-ɔ. Asa’n, e klo kɛ é yó naan sran’m be si i dunman’n, ɔ nin i nzuɛn’n. ?Ngue ti-ɔ?

12. ?Wafa sɛ yɛ jasin fɛ nga e bo’n, ɔ yo maan Ɲanmiɛn i dunman’n yo sanwun-ɔn?

¹² Kɛ mɔ e klo Zoova’n ti’n, e kunndɛ kɛ é yó naan i dunman’n yo sanwun. (Mat. 6:9) E kunndɛ kɛ é yó naan sran’m be wun i wlɛ kɛ Zoova i su ndɛ nga Satan kannin’n, ɔ ti ato. (Bob. 3:​1-5; Zɔb. 2:4; Zan 8:44) Kɛ é bó jasin fɛ’n e kunndɛ kpa kɛ é kán Ɲanmiɛn i su ndɛ nanwlɛ’n é klé sran mun. E kunndɛ kɛ sran kwlaa si kɛ i nzuɛn cinnjin kpafuɛ’n yɛle klolɛ’n. Yɛ e kunndɛ kɛ be si kɛ, kɛ ɔ́ síe sran mun’n, ɔ yo sa i nuan su sɛsɛ. Asa’n, e kunndɛ kɛ be si kɛ ɔ ka kan’n, Ɲanmiɛn Sielɛ’n wá yó maan ɲrɛnnɛn’n kwlaa wíe. Yɛ sran’m bé dí fɔundi nin aklunjɔɛ. (Jue. 37:​10, 11, 29; 1 Zan 4:8) Kɛ é bó jasin fɛ’n mɔ e kɛn i sɔ ndɛ e kle sran mun’n, e yo maan i dunman’n yo sanwun. Asa’n, e di aklunjɔɛ. Afin e wun kɛ e yo dunman ng’ɔ o e su’n, i nuan su sa.

13. ?Kɛ be flɛ e kɛ Zoova i Lalofuɛ’n, ngue ti yɛ i sɔ’n yo e fɛ-ɔ? (Ezai 43:​10-12)

¹³ Zoova fali e kɛ e yo i “lalofuɛ.” (An kanngan Ezai 43:​10-12 nun.) Afuɛ 2007 nun’n, lɛtri nga Anuannzɛ’n i Ɲrun Dinfuɛ’m be klɛli’n nun’n, be seli kɛ: “Cenjele like dan kun m’ɔ leman wunsu’n, yɛle kɛ Zoova i dunman’n wo e su.”b ?Ngue ti yɛ ndɛ sɔ’n ti su-ɔ? Maan e fa sunnzun ase kun e yiyi nun. Sɛ be fali ɔ ɔli jɔlɛ difuɛ’m be ja su naan a su kunndɛ lalofuɛ naan ɔ wa kpli ɔ ti’n, sran nga a si i kpa mɔ a kwla lafi i su’n, mɔ a si kɛ be kwla fa ndɛ ng’ɔ kan’n su’n, yɛ á fɛ́ i-ɔ. ?Nɛ́n i-ɔ? Ɔ maan kɛ Zoova fali e kɛ e yo i Lalofuɛ’n, i sɔ’n kle kɛ ɔ si e kpa, yɛ ɔ lafi su kɛ é sé sran’m be kɛ i kunngba cɛ yɛ ɔ ti Ɲanmiɛn Kpli’n niɔn. I Lalofuɛ mɔ e ti’n, ɔ ti e cenjele like. Ɔ maan blɛ kwlaa nga e ɲɛn i wun atin’n, e yo maan sran’m be si i dunman’n yɛ e uka be naan b’a si Ɲanmiɛn i su ndɛ nanwlɛ’n. I sɔ mɔ e yo’n, ɔ kle kɛ e ti Zoova i Lalofuɛ sakpa.—Jue. 83:18; Rɔm. 10:​13-15.

É BÓ JASIN FƐ’N LELE MƐN’N FÁ WÍE

14. ?Sa benin wie mun yɛ be kwla ju e ɲrun lɔ-ɔ?

¹⁴ E wun blibli e kpa kɛ é wún sa nga bé wá jú e ɲrun lɔ’n be nun. Yɛle kɛ, e lafi su kɛ Zoova fanngan nun’n, sran kpanngban be kwla bɛ i sulɛ ka naan ɲrɛnnɛn dan’n w’a bo i bo. Asa’n, ɲrɛnnɛn dan’n nun bɔbɔ’n, atrɛkpa’n sran wie’m bé jáso Satan i mɛn’n nun yɛ bé bá Zoova i sulɛ wie.—Yol. 13:48.

15-16. (1) ?Ngue yɛ y’a fua kpa kɛ é tú e klun é yó-ɔ? (2) ?Cɛn benin yɛ é jrɛ́n i-ɔ?

¹⁵ Kwlaa naan sa sɔ’m b’a ju’n, e le junman e di. Yɛle kɛ ɔ fata kɛ e bo Ɲanmiɛn Sielɛ’n i jasin fɛ’n asiɛ wunmuan’n su. Junman sɔ’n e su dimɛn i kun le. Kɛ é yó sɔ kusu’n, maan e kan mɛn’n i awieliɛ mɔ w’a mantan koko’n, i ndɛ e kle e wiengu mun. I liɛ’n, kɛ Zoova wá dí sran’m be jɔlɛ’n, bé wún i wlɛ kɛ jasin nga e boli’n ɔ fin i.—Eze. 38:23.

¹⁶ E klo jasin fɛ’n, e klo e wiengu mun. Yɛ ng’ɔ ti cinnjin trɛ i ngba’n, e klo Zoova ɔ nin i dunman’n. I sɔ’n ti’n, y’a fua kpa kɛ é tú e klun é bó jasin fɛ’n, lele naan Zoova w’a se kɛ: “W’a yo kpa sɔ!”