Maan Biblu’n yo kɛ ɔ niannun sa

Zaki m’ɔ ti Zezi i sɔnnzɔnfuɛ’n seli kɛ Biblu’n ti kɛ niannun sa. Ɔ uka e naan y’a wun sran wafa nga e ti i sakpasakpa’n i wlɛ. (Zak. 1:​22-25) ?Á yó sɛ naan Biblu’n w’a yo kɛ ɔ niannun wie sa?

Bo ɔ ɲin ase kanngan nun kpa. Sɛ like wie o ɔ ɲrun nun naan a nian niannun’n nun fla’n, a su kwlá wunmɛn i naan w’a siesie i ye. I wafa kunngba’n, kɛ ɔ ko yo naan w’a wun ɔ ayeliɛ wie m’ɔ timan kpa naan w’a kaci i’n, nán kpli kanngan Ɲanmiɛn Ndɛ’n nun. Sanngɛ bo ɔ ɲin ase kanngan nun kpa.

Nán nian ɔ wiengu’m be nzuɛn’n, nian ɔ bɔbɔ liɛ’n. Ɔ ju wie’n, sɛ niannun’n cia kan’n, e wiengu mun yɛ e wun be-ɔ. Ɔ maan e kwla wun be lika wie mɔ b’a siesiemɛn i ye kpa’n. I wafa kunngba’n, kɛ á kánngan Biblu’n nun’n sɛ w’a nianman ɔ wun kpa’n, fɔ ng’ɔ o ɔ wiengu’m be nun’n, yɛ á wún i-ɔ. Sɛ a yo sɔ kusu’n, i sɔ’n su ukaman wɔ naan w’a kaci ɔ ayeliɛ wie m’ɔ fata kɛ a kaci i’n.

Maan ɔ wun akunndan nga a bu’n, ɔ yo sɛsɛ. Sɛ e nian niannun nun naan like nga e klomɛn i’n i su yɛ e fa e ɲin sie i dan’n, e sa sin kwla bubu e. Kɛ á kánngan Ɲanmiɛn Ndɛ’n nun kusu’n, maan ɔ wun akunndan nga a bu’n ɔ yo sɛsɛ. Yɛle kɛ nán kunndɛ kɛ ɔ nzuɛn’n yo kpa dan tra nga Zoova kunndɛ’n su.—Zak. 3:17.