?Wafa sɛ yɛ Zoova bu min ɔn?
1. ?Ngue ti yɛ e kwla se kɛ Biblu’n ti kɛ niannun sa ɔ?
1 ?Amun nian niannun nun kpɛ nɲɛ? E nun sunman e yo i sɔ cɛn kwlakwla, afin niannun’n uka e maan e siesie e wun kpa. Biblu’n kusu ti kɛ niannun sa. Kɛ e kanngan nun’n, e wun wafa nga e awlɛn’n fa ti’n. E awlɛn’n kusu yɛ Zoova nian ɔn. (1 Sam. 16:7; Zak 1:22-24) Ɲanmiɛn Ndɛ’n kwla uka e naan y’a si “e klun akunndan’n ɔ nin e klun sa’n.” (Ebr. 4:12) ?Sanngɛ wafa sɛ yɛ Biblu’n nun kannganlɛ’n, nin i su akunndan bulɛ cɛn kwlaa’n, ɔ kwla uka e naan e sa w’a tɔ jasin fɛ’n bolɛ’n nun kpa ɔ?—Jue. 1:1-3.
2. ?Wafa sɛ yɛ Biblu’n kwla uka e naan y’a si sran wafa nga e ti’n niɔn?
2 Maan Biblu’n yo kɛ e niannun sa: Sran nga be nin Zoova be nantili klanman’n be su ndɛ nga Biblu’n kan’n, ɔ kle e nzuɛn nga be yo Zoova ɲɛnmɛn’n. Sran sɔ’m be nun kun yɛle Davidi. Davidi w’a kplinman su kɛ sran’m be yo Ɲanmiɛn dunman’n i finfin. (1 Sam. 17:45, 46) Ezai kusu yoli yakpafuɛ, afin ɔ boli jasin fɛ’n kleli ɲin keklefuɛ mun. Zezi kloli i Si m’ɔ o nglo lɔ’n dan. I sɔ’n ti’n, w’a buman jasin fɛ’n bolɛ’n i junman kekle, sanngɛ junman sɔ’n i dilɛ’n yoli i fɛ dan. (Zan 4:34) Klistfuɛ klikli’m be wlali be wun ase boli jasin fɛ’n, be fali be wla guali Zoova su, kpɛkun b’a yaciman junman sɔ’n i dilɛ le. (Yol. 5:41, 42; 2 Kor. 4:1; 2 Tim. 4:17) Sɛ e bu be kwlaa ngalɛ’m be akunndan’n, i sɔ’n úka e naan y’a wun sran wafa nga e ti’n. Kpɛkun wafa nga e kwla kaci e sa naan y’a su Zoova kpa y’a tra laa’n, é wún i wlɛ.
3. ?Ngue ti yɛ ɔ fataman kɛ e sisi e bo naan y’a kaci e ayeliɛ nga be timan kpa’n niɔn?
3 Maan e mian e ɲin naan e kaci e sa: Nanwlɛ, sɛ e nian niannun kun nun naan e siesieman e wun ye’n, nn nán like fi yɛ e yoli ɔ. I sɔ’n ti’n, maan e srɛ Zoova kɛ ɔ uka e naan e wun e ayeliɛ nga be timan kpa’n. Kpɛkun, maan e srɛ i kɛ ɔ uka e naan e kaci e sa. (Jue. 139:23, 24; Lik 11:13) Kɛ mɔ e ɲrun w’a ka koko’n ti’n, sɛ e wun kɛ e ayeliɛ wie timan kpa’n, nán maan e sisi e bo. Maan e kaci e sa ndɛndɛ kpa.—1 Kor. 7:29; 1 Tim. 4:16.
4. ?Sɛ sran kun bo i ɲin ase suan Ɲanmiɛn Ndɛ’n naan ɔ nian su fa ajalɛ’n, mmlusuɛ benin yɛ ɔ́ ɲɛ́n i ɔ?
4 E klun akunndan’n mɔ i li yɛ Zoova nian’n, ɔ ti cinnjin tra e wun wlawlalɛ nin e wun siesielɛ’n. (1 Piɛ. 3:3, 4) ?Sɛ sran kun bo i ɲin ase suan Ɲanmiɛn Ndɛ’n naan ɔ nian su fa ajalɛ’n, mmlusuɛ benin yɛ ɔ́ ɲɛ́n i ɔ? Sran mɔ “kɛ ɔ ti mmla’n i wla fi-man sanngɛ ɔ fa su’n, Nyanmiɛn maan like ng’ɔ yo’n ɔ́ yó ye.” (Zak 1:25) Nanwlɛ, sɛ ‘e wun wafa nga e Min’n i dan’n ti’n i kwlaa kɛ niannun nun sa’n,’ e sa tɔ́ jasin fɛ’n bolɛ’n nun kpa, kpɛkun é dí su aklunjuɛ.—2 Kor. 3:18.