Wafa nga e kwla uka be nga Ɲanmiɛn ndɛ’n lo be’n

1. ?Kɛ é bó jasin fɛ’n, sran wafa benin mun yɛ e to be-ɔ? (Sa Nga Be Yoli’n 13:​47, 48; 16:​14, 15)

KLISIFUƐ klikli’m be blɛ su’n, kɛ sran wie’m be tili Ɲanmiɛn ndɛ’n, be ka lɛ be fali su. (An kanngan Sa Nga Be Yoli’n 13:​47, 48; 16:​14, 15 nun.) Andɛ kusu’n, kɛ sran wie’m be ti jasin fɛ’n, be ka lɛ be fa su wie. I kpa bɔbɔ’n, be nga i bo bolɛ’n nun’n b’a sɔman jasin fɛ’n nun’n, kɛ ɔ́ kɔ́ i ɲrun’n be sɔ nun klanman. ?Kɛ é bó jasin fɛ’n, sɛ e to sran kun mɔ Ɲanmiɛn ndɛ’n lo i’n, ngue yɛ ɔ fata kɛ e yo-ɔ?

2. ?Ngue ti yɛ e kwla se kɛ e jasin fɛ bolɛ junman’n ɔ ti kɛ fie difuɛ’m be junman’n sa-ɔ?

² E kwla fa e jasin fɛ bolɛ junman’n e sunnzun fie difuɛ’m be junman’n. Kɛ fie difuɛ kun wun kɛ i fie su ninnge’m b’a blo’n, ɔ sisimɛn i bo naan w’a ti be. Sanngɛ atrɛkpa’n blɛ kunngba sɔ’n nun’n, ɔ di junman uflɛ i fie’n i bue uflɛ su. I wafa kunngba’n, kɛ e to sran kun mɔ Ɲanmiɛn ndɛ’n lo i’n, nán e sisi e bo naan y’a ukɛ i naan ɔ kaci Zezi i sɔnnzɔnfuɛ. Sanngɛ blɛ kunngba sɔ’n nun’n, maan e uka be nga Ɲanmiɛn ndɛ’n timan be cinnjin’n naan be wun i wlɛ kɛ Ɲanmiɛn ndɛ’n ti cinnjin. (Zan 4:​35, 36) Sɛ e ti akunndanfuɛ’n, é wún wafa nga e kwla uka sran wafawafa kwlaa’n. Like suanlɛ nga nun’n, é wá tɛ́ kosan nga’m be su. ?Kpɛ klikli nga e to sran kun mɔ Ɲanmiɛn ndɛ lo i’n, ngue yɛ ɔ fata kɛ e yo-ɔ? ?Yɛ wafa sɛ yɛ e kwla ukɛ i sɔfuɛ mun naan b’a ɔ be ɲrun Ɲanmiɛn sulɛ’n nun-ɔn?

KƐ E WUN SRAN KUN MƆ ƝANMIƐN NDƐ’N LO I’N

3. ?Sɛ e wun sran kun mɔ Ɲanmiɛn ndɛ’n lo i’n, ngue yɛ ɔ fata kɛ e yo-ɔ? (1 Korɛntifuɛ Mun 9:26)

³ Sɛ e wun sran kun mɔ Ɲanmiɛn ndɛ’n lo i’n, maan e ja nun lɛ’n e ukɛ i naan w’a fa nguan atin’n su. I lɛ nun’n, maan e ka lɛ e se i kɛ e kunndɛ kɛ é klé i Biblu’n nun like, yɛ maan e yiɛ i aɲia’m be bo.—An kanngan 1 Korɛntifuɛ Mun 9:26 nun.

4. An bo sa kun m’ɔ kle kɛ sran wie’m be kwla kplin su kɛ e ka lɛ e kle be Biblu’n nun like’n i su.

⁴ Maan e kle i Biblu’n nun like. Be nga e bo jasin fɛ’n e kle be’n, be nun wie’m be kplin su kɛ e ka lɛ e kle be Biblu’n nun like. Kanada lɔ’n, Wue cɛn kun mɔ aniaan’m bé fá kakaklolo’n bé bó jasin fɛ’n, talua kun fali fluwa pɛplɛpɛ A kwla di aklunjɔɛ tititi! Aniaan bla ng’ɔ jin kakaklolo’n i wun lɛ’n seli i kɛ e fa fluwa sɔ’n e kle sran’m be Biblu’n nun like. Talua’n kplinnin su kɛ be kle i like. Ɔ maan be nɲɔn’n be fali be wiengu nimielo. Cɛn kunngba sɔ’n nun’n, talua’n klɛli aniaan bla’n i mesazi. Ɔ usɛli i cɛn nga bé bó like suanlɛ bo’n. Aniaan bla’n tɛli i su kɛ sɛ ɔ klo’n, ɔ kwla ba Fue’n. Sanngɛ talua’n seli i kɛ: “?Yɛ ainman li? Ainman’n, n wo lɛ.” Ɔ maan be boli like suanlɛ bo Ya cɛn. Kpɛkun Mɔnnɛn’n, talua’n trannin aɲia’n i bo. Kɛ ɔ fɛ i lɛ’n, ɔ ɔli i ɲrun Ɲanmiɛn sulɛ’n nun ndɛndɛ kpa.

5. ?Sɛ e waan é klé sran kun i Biblu’n nun like’n, ngue yɛ ɔ fata kɛ e wun i wlɛ-ɔ? (An nian foto mun wie.)

⁵ I yo, nán sran ngba yɛ ɔ́ ká lɛ sé kɛ e kle i Biblu’n nun like kɛ talua ngalɛ’n sa-ɔ. Sran wie’m be liɛ’n, ɔ́ fá blɛ kan ka naan b’a kplin su kɛ e kle be Biblu’n nun like. Be liɛ’n atrɛkpa’n, ɔ fata kɛ e nin be e koko ndɛ wie m’ɔ lo be kpa’n i su yalɛ ka naan b’a kplin su. I kwlaa yoli-o, sɛ e bu i sɔfuɛ’m be wun akunndan kpa naan e kle be kɛ be ndɛ lo e’n, ɔ su cɛman naan b’a kplin su kɛ e kle be like. ?Sanngɛ sɛ e kunndɛ kɛ é klé sran kun i Biblu’n nun like’n, ngue ndɛ yɛ e kwla kan-ɔn? Aniaan wie mɔ be si i sɔ liɛ’n i yo kpa’n, be kannin wafa nga be yo sɔ’n i ndɛ.

6. ?Sɛ e kunndɛ kɛ e nin sran’n é kókó yalɛ cɛn uflɛ ekun’n, ndɛ benin yɛ e kwla kan-ɔn?

⁶ Aniaan nga be usali be’n, be seli kɛ lika wie’m be nun’n, sɛ ɔ waan á klé sran kun i Biblu’n nun like’n, nán se kɛ: “N klo kɛ ń klé wɔ like” annzɛ “n klo kɛ e suan Biblu’n nun like.” Sanngɛ sɛ a se sran’n kɛ: “N klo kɛ e nin wɔ é kókó Biblu’n nun ndɛ’n su yalɛ” annzɛ “n klo kɛ ń fá ɔ ɲin ń síe i Biblu’n nun ndɛ kun su’n,” i bo’n gúa kpa. Asa’n, sɛ a kunndɛ kɛ a nin sran’n bé kókó yalɛ cɛn uflɛ ekun’n, a kwla se i kɛ: “?A si kɛ Biblu’n tɛ kosan cinnjin wie mɔ e fa usa e wun’n be su?” Annzɛ “?A si kɛ Biblu’n timan asɔnun fluwa ngbɛn sa, naan ɔ kwla uka e naan y’a wun e su sa’m be trawlɛ?” Kpɛkun a kwla kan gua su kɛ: “Sɛ a klo’n, ń bá cɛn uflɛ naan ń klé wɔ ndɛ kun m’ɔ kwla uka ɔ kpa’n. E su cɛman.” Kɛ á yó sɔ’n, nán bo cɛn trele nga á bá’n, yɛ nán se kɛ á kó niɛn i osu lemɔcuɛ kwlakwla. Afin sran’n kwla bu i kɛ sɛ ɔ kplin su’n, ɔ́ káci i ti su trɔ.

7. ?Blɛ benin nun yɛ sran wie’m be lafili ndɛ nanwlɛ’n su-ɔ? (1 Korɛntifuɛ Mun 14:​23-25)

⁷ Maan e yiɛ i aɲia’m be bo. Akoto Pɔlu blɛ su’n, kɛ sran wie’m be trannin aɲia kun bo’n, yɛ be lafili ndɛ nanwlɛ’n su-ɔ. (An kanngan 1 Korɛntifuɛ Mun 14:​23-25 nun.) E blɛ su kusu’n, i kunngba’n niɔn. Be nga e kle be Biblu’n nun like’n be nun sunman, kɛ be bo aɲia’m be bo tranlɛ bo’n, be kɔ be ɲrun ndɛndɛ Ɲanmiɛn sulɛ’n nun. ?Blɛ benin nun yɛ e kwla yia sran kun kɛ ɔ tran e aɲia’m be bo-ɔ? Fluwa A kwla di aklunjɔɛ tititi! i like suanlɛ 10 nun’n, be kan e aɲia’m be bo tranlɛ’n i ndɛ. Sanngɛ ɔ fataman kɛ e minndɛ kɛ e ju lɔ ka naan y’a yia sran’n aɲia’m be bo. Kpɛ klikli nga e nin i e koko yalɛ’n, e kwla yiɛ i aɲia nga e yo i Fue’n annzɛ Mɔnnɛn’n i bo. I sɔ yolɛ nun’n, e kwla bo nzra nun ijɔlɛ’n i flɛlɛ’n su, annzɛ e kwla kan ndɛ cinnjin kun m’ɔ o Sasafuɛ Tranwlɛ’n i bue nga é súan nun like’n nun’n i ndɛ e kle i.

8. ?Kɛ é yía sran kun e aɲia’m be bo’n, ngue yɛ e kwla kɛn i ndɛ-ɔ? (Ezai 54:13)

⁸ Kɛ é yía sran kun e aɲia’m be bo’n, maan e kle i ngbaciɛ ng’ɔ o e aɲia mun ɔ nin Ɲanmiɛn sulɛ wafa onga’m be liɛ’n be afiɛn’n. Kpɛ klikli nga like suanfuɛ kun trannin aɲia kun bo’n, be suannin Sasafuɛ Tranwlɛ’n i nun like. Kɛ bé súan’n, ɔ usali aniaan bla ng’ɔ kle i like’n kɛ: “?Sran ng’ɔ tinngɛ aɲia’n, ɔ si be kwlaa nga be o wa’n be dunman?” Aniaan bla’n seli i kɛ e kwlaa e mian e ɲin naan y’a si e wiengu dunman, kɛ nga e fa si e awlofuɛ’m be dunman’n sa. I sɔ’n boli like suanfuɛ’n i nuan dan. Afin be asɔnun’n liɛ’n nun’n, be nun sunman be siman be wiengu dunman. Asa’n, maan e kan sa nga ti yɛ e yo aɲia mun’n i ndɛ e kle sran’n wie. (An kanngan Ezai 54:13 nun.) Zoova i sulɛ, nin i su like suanlɛ, ɔ nin e wiengu fanngan wlalɛ ti yɛ e yo aɲia mun-ɔn. (Ebr. 2:12; 10:​24, 25) I sɔ’n ti’n, kɛ é yó aɲia mun’n, ninnge’m be timan sukusuku. Kpɛkun e kan ninnge nga be kwla uka sran mun sakpa’n be ndɛ. (1 Kor. 14:40) Asa’n, wafa nga be kplannin e Ɲanmiɛn Sielɛ sua mun’n, ɔ timan tɛkɛtɛkɛ kɛ asɔnun sua onga’m be sa. Afin e kɔ lɔ naan é súan like. Asa ekun’n, e kanman politiki ndɛ lɔ, yɛ e kanman politiki anuannzɛ fi i ndɛ lɔ. Afin e liɛ’n e yoman politiki. Sɛ e fa video ng’ɔ suan ?Ngue yɛ be yo i Ɲanmiɛn Sielɛ Sua’n nun lɔ-ɔ? e kle i’n, ɔ ti kpa. I liɛ’n, ɔ́ sí wafa nga e yo e aɲia mun’n.

9-10. ?Ngue ndɛ yɛ e kwla kan naan aɲia’m be bo tranlɛ’n w’a yo sran’n i fɛ-ɔ? (An nian foto’n wie.)

⁹ Sran wie’m be sisi be bo naan b’a tran e aɲia’m be bo afin be bu i kɛ sɛ be ba’n, é sé be kɛ be kaci Zoova i Lalofuɛ. I sɔ’n ti’n, se sran’n kɛ e sɔ be kwlaa nga be ba e aɲia’m be bo’n be nun klanman yɛ e mianman be kɛ be kaci e asɔnun’n nunfuɛ. Se i kɛ ɔ nin i awlofuɛ’m be kwla ba. Sɛ i mma’m be te yo kanngan bɔbɔ’n, ɔ nin be kwla ba. E aɲia’m be bo’n, be faman ba kanngan’m be kɔman lika uflɛ be ko kleman be like lɔ. I Siɛ-o, i niɛn-o, i ba-o, be kwlaa be tran likawlɛ yɛ be kle be like-ɔ. Kɛ ɔ yo sɔ’n, siɛ nin niɛn’m be kwla nian be mma’m be su, yɛ be si like nga be kle be mma mun’n. (Mml. 31:12) Asa’n, be yiman cɛlɛ lɔ, yɛ be faman gbogbo be sinman sran’m be ɲrun naan be gua nun sika. Afin Zezi seli kɛ: “N fɛ i sɔ yolɛ’n n cɛli amun, amun kusu nán amun de like fi.” (Mat. 10:8) Asa ekun’n, se sran’n kɛ ɔ nunman nun kɛ ɔ wla tralɛ nga be le gua’n naan w’a tran e aɲia’m be bo. Afin like ng’ɔ o sran kun i awlɛn nun’n yɛ Ɲanmiɛn nian-ɔn, nán wafa ng’ɔ wlɛwlɛ i wun’n niɔn.—1 Sam. 16:7.

¹⁰ Sɛ sran’n ba aɲia’n bo’n, yo naan ɔ wun i wun fɛ. Fɛ i kle asɔnun kpɛnngbɛn mun ɔ nin aniaan onga mun. Sɛ sran’n wun i wun fɛ’n, cɛn uflɛ’n ɔ́ bá ekun. Sɛ be su kanngan Biblu’n nun’n, sɛ ɔ leman wie’n, a nin i be nian ɔ liɛ’n nun. Yɛ sɛ be su ijɔ nzra nun annzɛ e su suan e fluwa kun i nun like’n, ukɛ i naan ɔ wun ndɛ nga be su yiyi nun’n i wlɛ.

KƐ E BO SRAN’N I LIKE KLELƐ BO’N

11. ?Sɛ e nin sran kun e nuan sɛli dɔ kun su’n, ngue yɛ ɔ fata kɛ e yo-ɔ?

¹¹ ?Ka naan y’a wɔ sran kun i Biblu’n nun like klelɛ’n, ngue yɛ ɔ fataman kɛ e wla fi su-ɔ? Nán e wla fi su kɛ sran’n le like uflɛ yo. Ɔ maan sɛ e kleli i dɔ kun’n, maan e di su. Kannzɛ bɔbɔ e asa’n sufuɛ’m be yoman ninnge mun dɔ su’n, sanngɛ maan e mian e ɲin naan e ju lɔ dɔ su. Asa’n, kpɛ klikli nga e nin sran’n é súan like’n, nán maan like suanlɛ’n cɛ dan. Aniaan wie mɔ be si sran’m be like kle kpa’n, be seli kɛ kannzɛ bɔbɔ sran’n waan ɔ́ súan like kan ekun’n, sanngɛ maan e jrɛn i lɛ sɔ. Asa ekun’n, nán e ijɔ kaka. Maan e yaci like suanfuɛ’n nun naan ɔ kɛn i klun ndɛ.—Ɲan. 10:19.

12. ?Kɛ e bo sran kun i Biblu’n nun like klelɛ bo’n, ngue yɛ ɔ fata kɛ e yo-ɔ?

¹² Kɛ e ko bo sran kun i Biblu’n nun like klelɛ bo’n, ɔ fata kɛ e ukɛ i naan ɔ si Zoova nin Zezi naan ɔ klo be. I lɛ nun’n, maan e fɛ i ɲin e sie i Ɲanmiɛn Ndɛ’n su. Nán e fɛ i ɲin sie i e bɔbɔ e su, yɛ nán e se kɛ é kán Biblu’n nun ndɛ nga e bɔbɔ e si i’n. (Yol. 10:​25, 26) I sɔ yolɛ nun’n, akoto Pɔlu kleli e ajalɛ kpa. Kɛ ɔ́ klé sran’m be like’n, ɔ fali be ɲin sieli i Zezi Klisi su. Afin i yɛ Zoova sunmɛnnin i kɛ ɔ wa uka e naan e si i naan e klo i-ɔ. (1 Kor. 2:​1, 2) Asa’n, Pɔlu seli kɛ ɔ ti cinnjin kɛ e uka be nga be kacili Klisifuɛ ɔ nin-a cɛman’n naan be fa nzuɛn kpakpa wie mun. Ɔ fali nzuɛn sɔ mun sunnzunnin sika ɔkwlɛ nin sika ɔ nin yɔbuɛ kpakpa mun. (1 Kor. 3:​11-15) Nzuɛn sɔ’m be nun wie yɛle Ɲanmiɛn sulafilɛ’n, ngwlɛlɛ silɛ’n, sa wlɛ wunlɛ’n, ɔ nin Zoova i srolɛ’n. (Jue. 19:​9, 10; Ɲan. 3:​13-15; 1 Piɛ. 1:7) Maan e nian Pɔlu i ajalɛ’n su. Yɛle kɛ maan e uka be nga e kle be like’n naan be lafi Ɲanmiɛn su kpa naan be nin i be afiɛn mantan kpa.—2 Kor. 1:24.

13. ?Kɛ é klé sran kun i like’n, wafa sɛ yɛ e kwla ukɛ i-ɔ? (2 Korɛntifuɛ Mun 10:​4, 5) (An nian foto’n wie.)

¹³ Kɛ é klé sran kun i like’n, maan e yo kɛ Zezi sa. Maan e tra e awlɛn i wun yɛ e wun sa ng’ɔ o i su’n i wlɛ. Nán maan e usɛ i kosan wie m’ɔ́ yó i kɛnsrɛn-ɔn. Sɛ ndɛ wie i wlɛ wunlɛ ti kekle mɛn i’n, maan e wɔ e ɲrun. Kpɛkun blɛ uflɛ nun’n, e kwla sa e sin e koko su yalɛ ekun. Sɛ ndɛ wie su falɛ ti kekle mɛn i’n, nán e miɛn i kɛ ɔ fa su kekle nun. Sanngɛ maan e mɛn i blɛ naan ɔ bu su akunndan naan w’a kwla fa su. (Zan 16:12; Kol. 2:​6, 7) Biblu’n se kɛ ato ndɛ’m be ti kɛ talɛ ngblingbli wie mun sa. (An kanngan 2 Korɛntifuɛ Mun 10:​4, 5 nun.) Atrɛkpa’n, like suanfuɛ’n lafi ato ndɛ wie’m be su w’a cɛ kpa. Ɔ maan sɛ é kwlá sé’n, ɔ kisa talɛ ngblingbli sɔ’m be su. Nán e bubu talɛ sɔ mɔ like suanfuɛ’n kisa su’n. Sanngɛ maan e ukɛ i naan ɔ yaci talɛ sɔ’m be su kisalɛ naan ɔ fa Zoova kaci i fiawlɛ.—Jue. 91:9.

KƐ SRAN’N BO AƝIA’M BE BO TRANLƐ BO’N

14. ?Wafa sɛ yɛ ɔ fata kɛ e bu be nga be ba e aɲia’m be bo’n niɔn?

¹⁴ Zoova kunndɛ kɛ e bu be kwlaa nga be bo e aɲia’m be bo tranlɛ bo’n be sran. Kannzɛ be finwlɛ’n ti sɛ ti sɛ-o, sɛ be le sika annzɛ be ti yalɛfuɛ-o, annzɛ be aniɛn’n nin e liɛ’n timan kun-o, Zoova kunndɛ kɛ e bu be sran. (Zak. 2:​1-4, 9) ?Ɔ maan wafa sɛ yɛ e kwla kle kɛ e bu be nga be ba e aɲia’m be bo’n be sran-ɔn?

15-16. ?É yó sɛ naan be nga be bali e aɲia’n bo uflɛuflɛ’n b’a wun be wun fɛ?

¹⁵ Sran wie’m be ba e aɲia’m be bo naan bé wún like nga e yo i lɔ’n sa ngbɛn. Wie’m be liɛ’n, be sifuɛ kun m’ɔ o lika uflɛ’n yɛ ɔ seli be kɛ be tran e aɲia’m be bo-ɔ. Ɔ maan kɛ be ba’n, nán e sisi e bo naan y’a sɔ be nun. Sanngɛ nán e yo sɔ juejue su dan tratra su. Asa’n, maan e se be kɛ be kwla tran e wun lɛ. Kɛ bé kánngan Biblu’n nun, annzɛ fluwa nga e suan nun like’n i nun’n, maan e nin be e nian e liɛ’n nun. Sɛ e klo kusu’n, e kwla fa Biblu kun ɔ nin fluwa sɔ’n e man be. Asa ekun’n, maan e yo naan be wun be wun fɛ. Cɛn kun’n, bian kun ɔli e aɲia kun bo. Ɔ seli aniaan ng’ɔ sɔli i nun’n kɛ ɲannzuɛn kun i. Afin tralɛ ng’ɔ wlali’n ɔ nin aɲia’n i bo tranlɛ fataman. Aniaan bian’n yoli maan i wla guali ase. Yɛ ɔ seli i kɛ Zoova i Lalofuɛ’m be ti kɛ sran kwlaa sa. Kɛ ɔ́ kɔ́ i ɲrun’n be yoli bian’n i batɛmun. Sanngɛ i wla w’a fiman wafa nga aniaan’n sɔli i nun’n su. Nán e wla fi ndɛ cinnjin nga su. Yɛle kɛ ka naan aɲia’n w’a bo i bo ɔ nin kɛ ɔ ko wie’n, kɛ e nin be nga be bali e aɲia’n i bo’n é kókó yalɛ’n, nán e kan ndɛ wie annzɛ e usa be kosan wie m’ɔ kwla yo be kɛnsrɛn-ɔn.—1 Piɛ. 4:15.

¹⁶ Wafa nga e kwla yo naan b’a wun be wun fɛ’n, i kun ekun yɛle kɛ, kɛ e nin be é kókó yalɛ’n, annzɛ é tɛ́ kosan’m be su’n, annzɛ é dí junman wie aɲia’n bo’n, nán e kan be nga be suman Zoova’n be wun ndɛ tɛ. Yɛ nán e kan ndɛ nga be lafi su’n i ndɛ tɛ wie. Asa’n, nán maan wafa nga e kan ndɛ’n ɔ yo kɛ e su kpɛ be nzowa sa. (Tit. 2:8; 3:2) Sɛ e su kan ndɛ nga be lafi su’n i ndɛ’n, nán maan ɔ yo kɛ e su yo be finfin sa. (2 Kor. 6:3) I lɛ nun’n, ɔ fata kɛ aniaan nga be ijɔ nzra nun’n be nian be wun su kpa. Asa’n, kɛ aniaan sɔ’m bé kán ndɛ wie mɔ be nga be suman Zoova’n be simɛn i’n, maan be yiyi nun weinwein naan be wun i wlɛ.

17. ?Kɛ e wun be nga “be nin nguan m’ɔ leman awieliɛ’n fata’n,” ngue yɛ ɔ fata kɛ e yo-ɔ?

¹⁷ Kɛ lika’n cɛ́n m’ɔ́ sán’n, nn e jasin fɛ bolɛ junman’n ɔ́ yó cinnjin kpa trá laa’n. Kɛ é dí junman sɔ’n, e wun be nga “be nin nguan m’ɔ leman awieliɛ’n fata’n” titi. (Yol. 13:48) Sɛ e wun i sɔfuɛ mun’n, nán e sisi e bo naan y’a se be kɛ e klo kɛ é klé be Biblu’n nun like, annzɛ y’a yia be aɲia’m be bo. Sɛ e yo sɔ’n, bé bó atin mɔ i “agualiɛ’n yɛle nguan’n” i su falɛ bo.—Mat. 7:14.