Sran’m be lafiman politikifuɛ’m be su kun—?I su ndɛ benin yɛ Biblu’n kan-ɔn?

Afuɛ 2024 nga nun’n, mɛn wunmuan’n nun’n, sran’m bé wá yó vote bé klé sran nga be kunndɛ kɛ ɔ sie be’n. Sanngɛ ndɛ ng’ɔ o lɛ’n yɛle kɛ andɛ’n, sran kaka be lafiman politikifuɛ’m be su kun.

• Kɛ be usali Amlɛnkɛn mun’n, be nun sunman be seli kɛ ‘politikifuɛ’m be dan lika be buman sran’m be akunndan. Sanngɛ be bɔbɔ be wun akunndan yɛ be bu-ɔ.’a—Pew Research Center, Afuɛ 2023, Sɛptanblu i le 19.

Gbanflɛn nin talua’m be kusu be lafiman politikifuɛ’m be su kun.

• Zronali kun seli kɛ: “Gbanflɛn nin talua’m be kunndɛ kɛ mɛn’n nun sa’m be wie. Sanngɛ be waan be lafiman su kɛ politikifuɛ’m bé kwlá yó sɔ.”—The New York Times, Afuɛ 2024, Zanvie i le 29.

• Zronali kun ekun seli kɛ: “Gbanflɛn nin talua’m be lafi be nga be yo video ɛntɛnɛti su’n be su tra politikifuɛ mun.”—The Korea Times, Afuɛ 2024, Zanvie i le 22.

?Politikifuɛ’m be kwla yo naan mɛn’n nun sa’m be wie? ?Wan yɛ e kwla lafi i su-ɔ?

Nán e lafi sran ngba su

Sɛ sran’m be lafiman sran ngba su’n, i sɔ’n ti kpa. Afin Biblu’n waan: “Sran ng’ɔ siman sa’n, ɔ fa ndɛ kwlaa su, sanngɛ ngwlɛlɛfuɛ’n i liɛ’n, ɔ niɛn i ja kwlaa ng’ɔ tu’n su.”—Ɲanndra Mun 14:15.

• Kɛ a ti ndɛ kun’n, kɛ ɔ ko yo naan w’a wun i wlɛ sɛ ɔ ti nanwlɛ annzɛ ɔ ti ato’n, kanngan ndɛ nga nun: “Nian ɔ wun su ato ndɛ’m be lika.”

Asa’n, kannzɛ bɔbɔ politikifuɛ kun ti nanwlɛfuɛ naan ɔ kunndɛ kɛ ɔ́ úka sran’m be kpa’n, sanngɛ nán like ngba yɛ ɔ kwla yo-ɔ. I sɔ’n ti yɛ Biblu’n kan ndɛ yɛ’n niɔn. Ɔ se kɛ:

• “Nán amun fa be wla gua klɔ sran su. Be de be wiengu ɔ ɔ yoman ye.”—Jue Mun 146:3, Biblu Nyanmiɛn Ndɛ’n.

Siefuɛ kun mɔ e kwla lafi i su’n

Biblu’n kle kɛ Ɲanmiɛn kpali siefuɛ kun. I liɛ’n, ɔ kwla sa kaka yo, yɛ be kwla lafi i su. Siefuɛ sɔ’n yɛle Zezi Klisi. (Liki 1:32, 33) Zezi yɛ ɔ ti Ɲanmiɛn Sielɛ’n i su famiɛn’n niɔn. Sielɛ sɔ’n ti awa kun, yɛ ɔ o ɲanmiɛn su lɔ.—Matie 6:10.

• Nian like nga ti yɛ a kwla lafi Zezi su’n ɔ nin ninnge ng’ɔ́ wá yó be naan e su sa’m be kwlaa be wie’n. I lɛ nun’n, kanngan ndɛ “?Wan yɛ ɔ ti Ɲanmiɛn Sielɛ’n i su famiɛn’n niɔn?” ɔ nin ndɛ “?Ngue yɛ Ɲanmiɛn Sielɛ’n wá yó-ɔ?” be nun.