Zezi wá yó maan sran’m be su yoman be wiengu tɛ kun

Zezi si like nga be flɛ i klunwi’n ɔ nin sran lufle bulɛ’n. Afin i bɔbɔ’n, sran’m be tɔnnin i suɛn, be boli i tɛ kpa, jɔlɛ difuɛ’m be dili i ndɛ kwlɛ, yɛ be buli ndɛ’n yili i su. I sin’n, be kleli i ɲrɛnnɛn lele be kunnin i. Zezi w’a yoman sa tɛ le. Sanngɛ i klunklo su ‘ɔ fɛli i nguan’n mannin fa kpɔli sran kpanngban be ti.’ (Matie 20:28; Zan 15:13) Dɔ nga su’n, w’a kaci Ɲanmiɛn Sielɛ’n i su Famiɛn. Yɛ ɔ cɛ kan’n, ɔ́ yó maan sran’m bé yó sa nuan su sɛsɛsɛ asiɛ wunmuan’n su. Ɔ maan be su yoman klunwi sa mun kun.—Ezai 42:3.

Kɛ Zezi wá yó sɔ’n, wafa nga lika’n wá yó’n, Biblu’n kɛnnin i ndɛ. Ɔ se kɛ:

• “Be su wunman klunwifuɛ’m be kun. Á wá nían kan be o lɛ’n, yɛ á wá wún kɛ be nunman lɛ kun. Sanngɛ asiɛ’n yó wɛtɛɛfuɛ’m be liɛ, yɛ fɔundi dan mɔ bé dí’n ti’n, be klun jɔ́ kpa fɔuun.”—Jue Mun 37:10, 11.

?Wafa sɛ yɛ e kwla kle kɛ e si like nga Zezi yoli’n ɔ nin like ng’ɔ́ wá yó’n i su ye-ɔ? I kun yɛle kɛ ɔ fata kɛ e si “Ɲanmiɛn Sielɛ’n i jasin fɛ’n.” Jasin fɛ sɔ’n yɛ Zezi boli-ɔ. (Liki 4:43) Kanngan ndɛ “?Ngue yɛle Ɲanmiɛn Sielɛ’n?” i nun.