?Wan yɛle Zɔbu?

Bian kun tran klɔ kun mɔ be flɛ i Izi’n su lɔ. Be flɛ i kɛ Zɔbu. Ɔ su Zoova, ɔ le ninnge kpanngban kpa, yɛ i awlo’n nun sran mun be sɔnnin. I klun ti ufue kpa. Ɔ uka yalɛfuɛ mun nin bla nga be wun w’a wu’n, ɔ nin ba nga be si nin be nin b’a wu’n. ?Sanngɛ kɛ mɔ Zɔbu yo sa kpa’n ti’n, é sé kɛ sa su ɲɛnmɛn i le?

Satan fɛli i ɲin sieli i Zɔbu su, sanngɛ Zɔbu siman sɔ. Zoova seli Satan kɛ: ‘?A sieli min sufuɛ Zɔbu i nzɔliɛ? Sran fi timan kɛ i sa asiɛ’n su. I ɲin yi min, kpɛkun ɔ yo sa kpa.’ Satan tɛli su kɛ: ‘Nán ngbɛn ti yɛ Zɔbu i ɲin yi wɔ-ɔ. A sɛsɛ i, yɛ a yrɛ i su. A mɛn i asiɛ nin nnɛn mun. Sɛ a de i kwlaa sɔ’n i sa nun’n, ɔ́ yáci ɔ sulɛ.’ Zoova seli i kɛ: ‘A kwla sa Zɔbu nian. Sanngɛ nán kun i.’ ?Ngue ti yɛ Zoova mannin Satan i atin kɛ ɔ kle Zɔbu i yalɛ-ɔ? Zoova lafi Zɔbu su. Ɔ si kɛ ɔ su yacimɛn i sulɛ.

Satan fali ɲrɛnnɛn fanunfanun yili Zɔbu su. Ɔ yoli maan Sabefuɛ’m be wa wuali Zɔbu i nannin nin i aflunmun mun. I sin’n, sin yrɛli i bua’m be kwlaa. Kaldefuɛ’m be kusu be bali be wa wuɛli i ɲɔnngɔnmɛn mun. Be kunnin Zɔbu i junman difuɛ nga be nian nnɛn sɔ’m be su’n. I sin’n, ɲrɛnnɛn dan kpafuɛ’n wa tɔli i su. Yɛle kɛ cɛn kun’n, Zɔbu i mma’m be su di cɛn sua kun nun. Kpɛkun sua’n bu guali be su, ɔ kunnin be kwlaa. Zɔbu i wla boli i wun dan. Sanngɛ w’a yaciman Zoova i sulɛ.

Satan kunndɛli kɛ Zɔbu wun ɲrɛnnɛn dan. I sɔ’n ti’n, ɔ yoli maan Zɔbu i wunnɛn wunmuan’n yoli kannin. Nanwlɛ, Zɔbu fɛli kpa. Ɔ wunman like ti mɔ sa sɔ’m be ju i su’n. Ɔ nin i sɔ ngba’n, w’a yaciman Zoova sulɛ. Kɛ Ɲanmiɛn wunnin i kwlaa sɔ’n, i klun jɔli Zɔbu i wun.

I sin’n, Satan sunmannin sran nsan naan be ko kle Zɔbu i yalɛ. Be seli i kɛ: ‘Atrɛkpa a yoli sa tɛ wie, kpɛkun a fiali su. I sɔ’n ti yɛ Ɲanmiɛn su tu ɔ fɔ-ɔ.’ Yɛ Zɔbu seli kɛ: ‘M’an yoman sa tɛ fi.’ Sanngɛ Zɔbu buli i kɛ Zoova yɛ ɔ su fa sa sɔ mun yi i su-ɔ. Yɛ ɔ seli kɛ Ɲanmiɛn yoman sa i nuan su.

Kɛ sran sɔ’m be nin Zɔbu bé íjɔ’n, gbanflɛn kun mɔ be flɛ i Elii’n, ɔ fɛli i su sieli be ndɛ’n i bo. I sin’n, ɔ seli kɛ: ‘Ndɛ nga amun kɛnnin i lɛ’n ɔ timan su. Sa nga Zoova yo be’n, e kwlá wunman be kwlaa be bo. Ɔ yoman sa m’ɔ timan su’n. Ɔ wun like’n kwlaa, yɛ ɔ uka sran mun naan be wun sa nga be o be su’n be trawlɛ.’

I sin’n, Zoova kannin ndɛ kleli Zɔbu. Ɔ seli i kɛ: ‘?I nun nga ń yí nglo’n nin asiɛ’n, a o nin? ?Ngue ti yɛ ɔ waan n yoman sa i nuan su-ɔ? A kan ndɛ mun, sanngɛ a siman sa nga ti yɛ sa’m be ju’n.’ Zɔbu wunnin kɛ ndɛ ng’ɔ kannin’n, ɔ timan su. Ɔ seli kɛ: ‘N fɔnnin. Laa’n, be kannin ɔ ndɛ yɛ n tili-ɔ. Sanngɛ m’an si wɔ siɛn’n. A kwla sa’n kwlaa yo. Nga n kannin’n, ɔ timan su, yaci cɛ min.’

Zoova yoli maan Zɔbu yoli juejue. Kpɛkun ɔ mɛnnin i ninnge kpanngban trali laa liɛ’n. Zɔbu cɛli asiɛ’n su, yɛ ɔ dili aklunjɔɛ. Kɛ mɔ blɛ kekle nun’n, Zɔbu i ɲin yili Zoova’n ti’n, Zoova yrɛli i su. ?Sɛ sa kekle tɔ e su’n, é nían Zɔbu i ayeliɛ’n su é sú Zoova titi?