NDƐ NG’Ɔ KLƐ FLUWA’N SU’N | ?ƝANMIƐN SIELƐ’N: I NDƐ TI WƆ CINNJIN?

Ɲanmiɛn Sielɛ’n: like nga ti yɛ i ndɛ yoli Zezi i cinnjin’n

I nun mɔ Zezi o asiɛ’n su wa’n, ɔ kannin ninnge sunman be ndɛ. I wie yɛle kɛ, ɔ kleli i sɔnnzɔnfuɛ mun wafa ng’ɔ fata kɛ be srɛ Ɲanmiɛn’n. Kpɛkun, like ng’ɔ fata kɛ be yo naan Ɲanmiɛn klun w’a jɔ be wun’n, ɔ nin like ng’ɔ fata kɛ be yo naan be liɛ w’a yo ye’n, ɔ kannin be ndɛ wie. (Matie 6:5-13; Mark 12:17; Lik 11:28) Sanngɛ i kwlaa sɔ’n nun’n, like nga i ndɛ kanlɛ yoli i awlɛn su like’n, yɛle Ɲanmiɛn Sielɛ’n.​—Lik 6:45.

Zezi “kannin Nyanmiɛn ndɛ, ɔ boli Nyanmiɛn sielɛ jasin fɛ’n.” Like ng’ɔ yoli i cinnjin’n, yɛ ɔ o lɛ ɔ. (Lik 8:1) Ɲanmiɛn Sielɛ’n i ndɛ kanlɛ’n ti’n, ɔ nantili kilo kpanngban kpa ɔli Izraɛli mɛn’n i klɔ’m be su. Junman sɔ mɔ Zezi dili’n, i sɔnnzɔnfuɛ nnan be klɛli i su ndɛ. Fluwa nga be klɛli be’n be nun’n, be bo Ɲanmiɛn i Sielɛ’n i su kpɛ 100 tra su. Sanngɛ i kwlaa sɔ’n, Zezi yɛ ɔ kɛnnin i dan lika ɔ. I kpa bɔbɔ’n, be kwlá siman Ɲanmiɛn Sielɛ’n i ndɛ nga Zezi kannin’n i nuan.—Zan 21:25.

?Ngue ti yɛ Ɲanmiɛn Sielɛ’n i ndɛ kanlɛ’n yoli Zezi i cinnjin sɔ ɔ? Like nga ti yɛ ɔ yoli sɔ’n i bo sɔnnin. I kun yɛle kɛ, ɔ si kɛ i yɛ ɔ́ wá yó Ɲanmiɛn Sielɛ’n i su famiɛn ɔn. (Ezai 9:5; Lik 22:28-30) Sanngɛ, w’a kanman Ɲanmiɛn Sielɛ’n i ndɛ naan ɔ́ fá yó i wun dandan, annzɛ ɔ́ fá kúnndɛ dunman. (Matie 11:29; Mark 10:17, 18) Like kpafuɛ nga ti yɛ Ɲanmiɛn Sielɛ’n i ndɛ ti Zezi i cinnjin’n, yɛle like nga Ɲanmiɛn Sielɛ’n wá yó mɛ́n i awlɛn su sran mun’n.a I awlɛn su sran sɔ mun yɛle i Si Ɲanmiɛn nin i sɔnnzɔnfuɛ mun.

LIKE NGA ƝANMIƐN SIELƐ’N WÁ YÓ MÁN ZEZI I SI’N

Zezi klo i Si’n dan. (Nyanndra Mun 8:30; Zan 14:31) Afin, ɔ wun kɛ i Si’n ti sran klofuɛ, ɔ si aunnvuɛ, yɛ ɔ yo sa’m be nuan su sɛsɛsɛ. (Mmla’n 32:4; Ezai 49:15; 1 Zan 4:8) Ɔ maan, i Si’n i su ato ndɛ nga sran’m be kan m’ɔ guɛ i su nun’n, ɔ yo i ya dan. I wie yɛle kɛ, sran’m be se kɛ Ɲanmiɛn buman sran’m be ndɛ annzɛ Ɲanmiɛn i klun su yɛ sran’m be wun ɲrɛnnɛn ɔn. Like nga ti yɛ Zezi kannin “Nyanmiɛn sielɛ’n i jasin fɛ’n” i ndɛ’n yɛle kɛ sɛ i blɛ ju’n, Ɲanmiɛn Sielɛ’n ti’n, be su sacimɛn i Si’n i dunman kun. (Matie 4:23; 6:9, 10) ?Ngue yɛ Ɲanmiɛn Sielɛ’n wá yó mɔ be su saciman Ɲanmiɛn dunman’n i kun ɔn?

Ɲanmiɛn Sielɛ’n ti’n, sran kpa’m be liɛ wá yó ye. I wie yɛle kɛ, Ɲanmiɛn Zoova wá “núnnún be nyinmuɛn’n kwlaa.” Ninnge nga ti yɛ sran’m be sun’n, Zoova maan bé wíe mlɔnmlɔn. Yɛle kɛ, “wie’n su tranman lɛ kun. Be su yo-man sɛ kun, be su sun-man kun, be su wun-man nyrɛnnɛn kun.” (Sa Nglo Yilɛ 21:3, 4) Nanwlɛ, Ɲanmiɛn wá núnnún sran’m be su afɛ’n kwlakwla i Sielɛ’n i dunman nun.b

?Like nga ti yɛ Zezi tuli i klun kannin Ɲanmiɛn Sielɛ’n i ndɛ’n, a wun i wlɛ siɛn’n? Zezi si kɛ Ɲanmiɛn Sielɛ’n wá yí i Si Ɲanmiɛn i Kpli m’ɔ ti’n, ɔ nin i sran aunnvuɛ silɛ’n be nglo. (Zak 5:11) Asa ekun, ɔ si kɛ Ɲanmiɛn Sielɛ’n wá yó Ɲanmiɛn i sufuɛ mɔ be ti sran kpa’n, be ye wie.

LIKE NGA ƝANMIƐN SIELƐ’N WÁ YÓ MÁN SRAN KPA MUN’N

Zezi nin i Si Ɲanmiɛn be trannin lele naan w’a ba asiɛ’n su wa. I blɛ sɔ’n nun’n, Ɲanmiɛn maan ɔ yili ninnge’n kwlakwla. Ɲanmiɛn su lɔ ninnge’n kwlakwla kɛ nzraama mun sa o, ɔ nin asiɛ’n su ninnge’m be kwlakwla’n, i yɛ Ɲanmiɛn maan ɔ yili be ɔ. (Kolɔsfuɛ Mun 1:15, 16) Sanngɛ ninnge kwlaa sɔ’m be nun’n, sran mun yɛ be wun “yo [i] fɛ” ɔ.​—Nyanndra Mun 8:31.

Like kwlaa nga Zezi yoli i asiɛ’n su’n, ɔ yoli i sran’m be klolɛ ti. Kɛ ɔ boli junman’n i dilɛ bo’n, ɔ kɛnnin i weiin kɛ ɔ bali kɛ ɔ́ ‘bó jasin fɛ’n’ klé sran mun. (Lik 4:18) Sanngɛ, nán ndɛ ngbɛn ngunmin yɛ Zezi kan kleli sran mun ɔn. Ɔ yoli ninnge wie mun fa kleli kɛ ɔ klo sran mun sakpa. I wie yɛle kɛ cɛn kun’n, sran’m be bali kpanngban kpa kɛ bé tíe i ndɛ’n. Kɛ ɔ wunnin be’n, “be yoli i annvɔ, naan w’a yo tukpacɛfuɛ’m bɔ be o nun’n be juejue.” (Matie 14:14) Cɛn kun ekun’n, bian kun mɔ tukpacɛ tɛ kpa kun wo i wun’n, ɔ kotoli i bo, ɔ srɛli i kɛ ɔ yaci naan ɔ yo i juejue. Bian’n yoli Zezi i annvɔ. Ɔ maan, ɔ seli bian’n kɛ: “M’an ti, maan ɔ kokowe’n wie weiin.” (Lik 5:12, 13) Kɛ Lazar m’ɔ ti Mali i niaan bian’n, ɔ wuli’n mɔ Mali sún’n, Zezi “i anwlɛn’n kpɛli i klun, i wun yo i nyɛiin.” Kpɛkun, ɔ “sunnin.” (Zan 11:32-36) I sin’n, ɔ yoli abonuan sa kun. Yɛle kɛ, ɔ cɛnnin Lazar mɔ be sieli i w’a di cɛn nnan’n.​—Zan 11:38-44.

Zezi bɔbɔ si kɛ abonuan sa kwlaa ng’ɔ yoli be lɛ’n, be ti nzɔliɛ kun. Be kle kɛ cɛn wie lele’n, tukpacifuɛ’m be kwlakwla bé yó juejue. Yɛ sran kwlaa nga b’a wu’n, bé sá be sin nguan nun ekun. Ɲanmiɛn Sielɛ’n yɛ ɔ́ wá dí junman sɔ’n niɔn. Ɔ su dimɛn i asiɛ’n i bue kunngba su. Sanngɛ, ɔ́ dí junman sɔ’n i asiɛ wunmuan’n su. I blɛ sɔ’n nun’n, ɲrɛnnɛn sa wie fi su tranman lɛ kun mlɔnmlɔn. I sɔ’n ti yɛ kannzɛ Zezi yoli abonuan sa mun’n, sanngɛ ɔ kannin “Nyanmiɛn sielɛ’n i jasin fɛ’n” i ndɛ juejue su’n niɔn. (Matie 9:35) Blɛ mɔ Ɲanmiɛn Sielɛ’n wá yó abonuan sa mun asiɛ wunmuan’n su’n, w’a wie ju. Sa nga Ɲanmiɛn wá yó mɔ Biblu’n kan be ndɛ’n, i wie yɛ:

Tukpacɛ fi su tranman lɛ kun.

“I blɛ sɔ nun’n aɲansifuɛ’m bé wún ase, sutrefuɛ’m bé tí sa. Blɛ sɔ nun’n, cɛcɛwafuɛ’m bé tú kpɛ́n kɛ flete mun sa. Yɛ aklunjuɛ’n ti bobofuɛ’m bé kpán.” Kpɛkun, sran “fi su seman kɛ: ‘N kpinndinman.’”​—Ezai 33:24; 35:5, 6.

Wie’n su tranman lɛ kun.

“Mɛn’n ɔ́ yó sran kpa’m be liɛ. Bé trán nun tititi.”​—Jue Mun 37:29.

“Ɔ́ núnnún wie’n mlɔnmlɔnmlɔn. Anannganman ɔ́ núnnún sran’m be kwlaa be ɲinmuɛn’n.”​—Ezai 25:8.

Be nga b’a wu’n bé sá be sin nguan nun ekun.

“Be kwlaa nga be o ndia nun’n, bé tí i nɛn, yɛ bé fín ndia’n nun fite.”​—Zan 5:28, 29.

“Sran kpa mun o, sran tɛ mun o, bé cɛ́n.”​—Sa Nga Be Yoli’n 24:15.

Sran’m be kwlakwla bé ɲán sua kpa be la nun yɛ bé ɲán junman kpa bé dí.

“Sɛ min sran’m be kplan sua’n, bé trán be nun, sɛ be ta vinyi’n, bé dí i su mma. Be su kplan-man sua be yaci man-man sran wie kɛ ɔ tran nun. Be su ta-man waka be yaci man-man sran uflɛ kɛ ɔ di i su mma. [...] Yɛ min sran kpa’m bé dí be bɔbɔ be sa nuan ninnge’m be su.”​—Ezai 65:21, 22.

Alɛ kunlɛ’n wíe.

“Kɛ ɔ fɛ i lele b’ɔ́ fá jú mɛn’n i awieliɛ lɔ’n, w’a yo maan alɛ kunlɛ’n w’a wie.”​—Jue Mun 46:10.

“Nvle kun su faman alɛ wlɛmɛn i nvle uflɛ sin kun. Be su suanman alɛ dilɛ’n kun.”​—Ezai 2:4.

Awe’n su kpɛnman kun.

“Fie’m be su ninnge’m be yoli kpa, Nyanmiɛn b’ɔ ti e Nyanmiɛn’n, ɔ́ yó e wun sa ye.”​—Jue Mun 67:7.

“Maan ble’n ɔ su lele ɔ bu mɛn’n nun. Maan kpɔlɛ’m be su’n, be wun kɛ aunngban’n ɔ keje ble ja kpanngban.”​—Jue Mun 72:16.

Yalɛ dilɛ’n wíe.

“Anannganman wla fiman nyrɛnnɛnfuɛ mun.”—Jue Mun 9:19.

“Sɛ nyrɛnnɛnfuɛ’n kpan flɛ i’n, ɔ́ dé i. Ɔ́ dé yalɛfuɛ b’ɔ lɛman wie’n. Sran b’ɔ kwla-man nun’n ɔ nin nyrɛnnɛnfuɛ’n bé yó i annvɔ. Ɔ́ dé be.”​—Jue Mun 72:12, 13.

?Like nga ti yɛ Zezi kannin Ɲanmiɛn Sielɛ’n i ndɛ dan kleli sran mun’n, a wun i wlɛ siɛn’n? Zezi si kɛ sa kwlaa ng’ɔ o sran’m be su’n, Ɲanmiɛn Sielɛ’n ti yɛ be su tranman lɛ kun ɔn. I sɔ’n ti yɛ kan kwlaa ng’ɔ to sran lɛ’n, ɔ kannin Ɲanmiɛn Sielɛ’n i ndɛ’n niɔn.

Sa nga Ɲanmiɛn Sielɛ’n wá yó be’n mɔ Biblu’n kan be ndɛ lɛ’n, be yo ɲɛnmɛn dan. ?Nɛ́n i ɔ? ?Sanngɛ, ngue yɛ a kwla yo naan w’a si Ɲanmiɛn Sielɛ’n i su ndɛ ekun ɔn? ?Ngue yɛ a kwla yo naan w’a ɲan Ɲanmiɛn Sielɛ’n i su mmlusuɛ’n wie ɔ? Ndɛ akpasua ng’ɔ́ bá lɛ’n, ɔ́ wá tɛ́ su.

[Ja ngua lɛ ndɛ mun]